នៅពីថ្ងៃទី១៤ ខែកញ្ញា ឆ្នាំ២០២៣ ប្រភពព័ត៌មានមួយបានបញ្ចេញរឿងរ៉ាវដ៏ភ្ញាក់ផ្អើលមួយថា កាលថ្មីៗនេះ នៅលើរថភ្លើងល្បឿនលឿន ខណៈពេលដែលមនុស្សមួយចំនួនកំពុងគេងលង់លក់ ខណៈអ្នកខ្លះទៀតក៏កំពុងអង្គុយមើលទូរស័ព្ទ ឬមើលតាមបង្អួច ស្រាប់តែឮសំឡេងខ្លាំងៗបានកើតឡើង ដោយនារីវ័យក្មេងម្នាក់បានក្រោកឈរភ្លាមៗ និងធ្វើសកម្មភាពដ៏ចម្លែកបំផុត ហាក់ដូចស្រវឹងខ្លាំង ឈរគ្រវីក្បាល និងនិយាយពាក្យរកស្តាប់មិនយល់នោះទេ។
ដោយសារតែហេតុការណ៍បានកើតឡើងភ្លាមៗបែបនេះ ធ្វើឲ្យអ្នកដំណើរជាច្រើនមិនដឹងជួយអន្តរាគមន៍បែបណា គឺបានត្រឹមមានការភ័យស្លន់ស្លោគ្រប់គ្នា ខណៈនារីនោះឈរនៅកណ្តាលផ្លូវដើរ ហើយបន្តលោតរាំដូចជានាងកំពុងនៅក្នុងហាងឌីស្កូ។ តែដោយសារសំឡេងរបស់នាងបានស្រែកកាន់តែខ្លាំងឡើងៗ ដែលធ្វើឱ្យប៉ះពាល់ដល់អារម្មណ៍យ៉ាងខ្លាំង អ្នកដំណើរម្នាក់ក៏បានហៅអ្នកបម្រើលើរថភ្លើងមកដោះស្រាយបញ្ហា។
ពេលអ្នកបម្រើលើរថភ្លើងមកដល់ អាកប្បកិរិយារបស់នារីរូបនេះកាន់តែមានភាពតានតឹង។ មិនត្រឹមតែមិនឈប់ច្រៀងរាំទេ តែនាងចាប់ផ្តើមហែកសម្លៀកបំពាក់ដោះស្រាតទាំងស្រុង អាក្រាតកាយក្នុងរថភ្លើងតែម្តង។ នៅពេលនោះ គ្រប់គ្នាបានវិនិច្ឆ័យថា នារីនេះប្រហែលជាបានប្រើប្រាស់សារធាតុហាមឃាត់ហួសកំរិត ឬទទួលរងនូវជំងឺផ្លូវចិត្ត។ ឃើញបែបនេះ ពួកគេបានយកខោអាវមកឲ្យនាងស្លៀក បិទបាំងកេរ្តិ៍ខ្មាស ប៉ុន្តែពិបាកចូលទៅជិតណាស់ ដោយសារតែនាងខឹងខ្លាំង និងថែមទាំងជេរ និងវាយអ្នកបម្រើលើរថភ្លើង បណ្តាលឲ្យម្នាក់រងរបួស ដោយសារព្យាយាមចូលចាប់។
ទោះជាយ៉ាងណា នៅពេលដែលរថភ្លើងបានឈប់នៅស្ថានីយ៍ដែលនៅជិតបំផុត កម្លាំងប៉ូលីសបានកំពុងរង់ចាំជាស្រេច ហើយបាននាំនាងចេញទៅ។ នៅប៉ុស្តិ៍ប៉ូលីស ឪពុករបស់នាងក៏កំពុងរង់ចាំនៅទីនោះផងដែរ។ ឃើញស្ថានភាពកូនស្រីបែបនេះ ឪពុកវ័យចំណាស់ទប់ទឹកភ្នែកមិនបាន។
បុរសជាឪពុកដែលមកពីខេត្ត Hubei ប្រទេសចិន បានប្រាប់ឲ្យដឹងថា កូនស្រីរបស់គាត់ធ្លាប់មានភាពសប្បាយរីករាយ និងសកម្មជាមួយនឹងអនាគតដ៏ជោគជ័យនៅពេលខាងមុខ។ ប៉ុន្តែ អ្វីៗបានប្រែប្រួលស្ទើរមិនគួរឲ្យជឿ គឺនៅពេលនាងស្រឡាញ់បុរសម្នាក់ ហើយរងទុក្ខជាខ្លាំងក្នុងទំនាក់ទំនង។ ហេតុនេះ ក្រោយពេលបែកគ្នា ស្មារតីរបស់នាងត្រូវខ្ទេចខ្ទាំយ៉ាងខ្លាំង។ មិនត្រឹមតែបុគ្គលិកលក្ខណៈរបស់នាងបានផ្លាស់ប្តូរយ៉ាងខ្លាំងនោះទេ ប៉ុន្តែក៏មានអាកប្បកិរិយាមិនសមរម្យបានលេចឡើងផងដែរ។ ក្រោយពីក្រុមគ្រួសារយកនាងទៅមន្ទីរពេទ្យ គ្រូពេទ្យបានធ្វើរោគវិនិច្ឆ័យថានាងមានជំងឺវិកលចរិក ដោយសាររបួសផ្លូវចិត្ត។
ក្រោយសម្រាកព្យាបាលនៅមន្ទីរពេទ្យផ្លូវចិត្ត ដោយឃើញស្ថានភាពកូនស្រីបានធូរស្រាល គាត់ក៏នាំនាងទៅផ្ទះ។ ប៉ុន្តែ ដោយសារការធ្វេសប្រហែសរបស់ក្រុមគ្រួសារ ស្រាប់តែនាងលួចមកជិះរថភ្លើងល្បឿនលឿនខាងក្រៅខ្លួនឯង ហើយបណ្តាលឱ្យកើតមានហេតុការណ៍បែបនេះតែម្តង។
ដោយដឹងថាកូនស្រីរបស់គាត់បានវាយអ្នកបម្រើលើរថភ្លើង ឪពុកក៏បានសុំទោសដោយផ្ទាល់ និងសម្តែងការដឹងគុណចំពោះជំនួយរបស់ពួកគេ និងសុំចេញថ្លៃព្យាបាលរបួស។ ចំណែកអ្នកបម្រើការលើរថភ្លើងវិញ ក៏មានក្តីអាណិតអាសូរជាខ្លាំងដល់នាងផងដែរ។
បន្ទាប់ពីហេតុការណ៍នេះ ត្រូវបានបង្ហោះតាមប្រព័ន្ធអ៊ីនធឺណេត មតិភាគច្រើនបាននិយាយថា ករណីដូចក្មេងស្រីនេះ គួរមានការអធ្យាស្រ័យ និងការពារ។ ពិភពរបស់មនុស្សដែលមានជំងឺផ្លូវចិត្ត គឺខុសគ្នាទាំងស្រុងពីអ្វីដែលមនុស្សមានសុខភាពល្អដូចយើងឃើញ។ គ្រួសារគួរតែយកចិត្តទុកដាក់បន្ថែមទៀតចំពោះពួកគេ ហើយជៀសវាងការអនុញ្ញាតឱ្យពួកគេចេញទៅក្រៅតែម្នាក់ឯង ក្នុងករណីមានរឿងដែលមិននឹកស្មានដល់កើតឡើង៕ រក្សាសិទ្ធិដោយ៖ លឹម ហុង
