កាលពីពេលថ្មីៗនេះ អ្នកធ្វើដំណើរឆ្លងកាត់វាលស្រែ នៅក្នុងប្រទេសម៉ាឡេស៊ី ពិតជាមានការភ្ញាក់ផ្អើលយ៉ាងខ្លាំង ខណៈពួកគេកំពុងជិះម៉ូតូសុខៗ ស្រាប់តែបានឃើញទាហានឆ័ត្រយោង របស់កងទ័ពម៉ាឡេស៊ីមួយក្រុម បានបង្ហាញវត្តមាននៅលើអាកាស និងចុះមកសំដៅលើពួកគេតែម្តង។ ហើយអ្វីដែលញាក់សាច់នោះ គឺអ្នកជិះម៉ូតូវ័យចំណាស់ម្នាក់ បានផ្តួលម៉ូតូចោល ដើម្បីគេច។
នៅក្នុងវីដេអូរយៈពេល ១ នាទី ២៥ វិនាទី នៃឧបទ្ទវហេតុនេះ ដែលត្រូវបានចែករំលែកដោយអ្នកប្រើប្រាស់ TikTok ជនជាតិម៉ាឡេស៊ីម្នាក់ នោះគេអាចឃើញទាហានឆ័ត្រយោងម្នាក់ កំពុងធ្វើដំណើរឆ្ពោះទៅកាន់ទិសដៅក្រុមអ្នកជិះម៉ូតូ។
ខណៈពេលនោះ អ្នកថតវីដេអូ និងបុរសជិះម៉ូតូដទៃទៀតដែលនៅក្បែរគាត់ បានផ្តល់ផ្លូវឱ្យទាហានឆ័ត្រយោងចុះចតដោយសុវត្ថិភាព និងស្រែកប្រាប់ឲ្យបុរសជិះម៉ូតូចំណាស់ជៀសផ្លូវឲ្យលឿន។ ទោះជាយ៉ាងណា ដោយសារតែល្បឿនចុះចតលឿនដ៏មិននឹកស្មាន ជាហេតុធ្វើឲ្យទាហានឆត្រយោងចុះចត ស្ទើរតែបុកទង្គិច មុនពេលចុះចតលើវាលស្រែ។
បន្ទាប់មក ទាហានឆត្រយោងនោះ ក៏ត្រូវបានឮសួរថា តើបុរសនោះមានត្រូវរបួសដែរ ឬទេ ហើយអ្នកជិះម៉ូតូដែលដួលក៏បានឆ្លើយថា មិនអីទេ។
បន្ទាប់មក គេក៏បានឃើញទាហានឆ័ត្រយោងផ្សេងទៀត ចុះចតលើវាលស្រែដូចគ្នាពីចម្ងាយ ដោយពួកគេទាំងអស់បានជួបប្រជុំគ្នានៅកន្លែងតែមួយ បន្ទាប់ពីចុះចតដោយសុវត្ថិភាព។
ដោយផ្អែកលើការសន្ទនាដែលបានឮនៅក្នុងវីដេអូ នោះមូលហេតុដែលធ្វើឲ្យទាហានឆ័ត្រយោងទាំងនោះ ត្រូវចុះចតនៅលើវាលស្រែជំនួសឱ្យគោលដៅរបស់ពួកគេបែបនេះ គឺដោយសារតែខ្យល់បក់ខ្លាំង។ ជាក់ស្តែង ទាហានឆត្រយោងម្នាក់ ក៏បានបញ្ចេញមតិលើវីដេអូនេះ ដោយបញ្ជាក់ថា ពួកគេត្រូវផ្លាស់ប្តូរផ្លូវ និងចុះចតលើវាលស្រែ ដោយសារអាកាសធាតុមិនល្អ (ខ្យល់ខ្លាំង)៕ រក្សាសិទ្ធិដោយ៖ លឹម ហុង
