ថ្មីៗនេះ រូបភាពអ្នកជួលបន្ទប់រូបស្រស់ស្អាតម្នាក់ បានធ្វើឲ្យគ្រប់គ្នានៅលើបណ្តាញសង្គម ពិតជាមិននឹកស្មានដល់ និងហួសចិត្តយ៉ាងខ្លាំង បន្ទាប់ពីបានឃើញក្នុងបន្ទប់ជួល រក្សាទុកពោរពេញទៅដោយសំរាមគ្រប់បែបយ៉ាង ធុំក្លិនស្ទើរសន្លប់ ដែលប្រមូលច្រករហូតដល់ទៅ ១០ ថង់ហើយ នៅមិនអស់ទៀត។
ជាក់ស្តែង នៅថ្ងៃទី៩ ខែតុលា ឆ្នាំ២០២៣ គណនី TikTok ឈ្មោះ artter_ratcha បានបង្ហោះអំពីអ្នកជួលបន្ទប់ដ៏កខ្វក់បំផុតនៅលើពិភពលោក ដែលស្អាតតែរូប តែចរឹកមាយាទ មិនស្មានថារស់នៅជាមួយគំនរសំរាមបែបនេះសោះឡើយ ដោយបានរៀបរាប់ឲ្យដឹងថា បន្ទាប់ពីទាក់ទងអ្នកជួលរូបស្រស់ម្នាក់នេះមិនបាន ម្ចាស់ផ្ទះក៏បានមកពិនិត្យមើលដល់បន្ទប់។ ពុទ្ធោ គ្រាន់តែនៅខាងមុខទ្វារ ក៏ត្រូវបានឆូតខ្ទេចខ្ទីរហូតមានសភាពទ្រុឌទ្រោម។
តែអ្វីដែលធ្វើឲ្យរន្ធត់ចិត្តខ្លាំងនោះ គឺនៅពេលបើកទ្វារភ្លាមៗ ស្រាប់តែធុំក្លិនមិនល្អជះសាយភាយខ្លាំងតែម្តង ខណៈក្រឡេកខាងក្នុងបន្ទប់ទាំងមូល គឺពោរពេញទៅដោយសំរាម ដែលស្ទើរតែគ្មានផ្លូវសម្រាប់ដើរនោះទេ។ ដែលគំនរសំរាមទាំងនោះមានដូចជា កំប៉ុងភេសជ្ជៈ កញ្ចប់ថង់ប្លាស្ទិក ចានស្លោបាយ…. និងសូម្បីសំណល់អាហារវេចខ្ចប់គរចោលធុំក្លិនដ៏គួរឲ្យខ្ពើមរអើម។ លើសពីនេះ គំនរសំរាមដ៏គគ្រិចបំផុតនេះ ក៏បានធ្វើឲ្យពូករហូតដល់ថ្នាក់ខូចពុកផុយផងដែរ។
គណនី TikTok ខាងលើ ក៏បានប្រាប់ឲ្យដឹងថា ស្រ្តីអ្នកអនាម័យ បានធ្វើការសម្អាតរាប់ម៉ោង ទាំងអារម្មណ៍ស្ទើរក្អួត ហើយលទ្ធផលសំរាម គឺត្រូវប្រើប្រាស់ថង់ខ្មៅធំៗរហូត ១០ ថង់៕ រក្សាសិទ្ធិដោយ៖ លឹម ហុង
