ភ្នំពេញ ៖ រថយន្តស៊េរីទំនើប ម៉ាកBMW មួយគ្រឿងបើកបរដោយបុរសជនជាតិបរទេសម្នាក់ បោះពួយក្នុងល្បឿនយ៉ាងលឿនចុះពីស្ពានកោះនរា មិនប្រយ័ត្នស្រាប់តែរេចង្កូតទៅបុករះដើមឈើ និងបង្គោលភ្លើងបណ្តាលឲ្យបាក់រងការខូចខាត។
ហេតុការណ៍គ្រោះថ្នាក់ចរាចរណ៍ខាងលើនេះដែរ បានកើតឡើងវេលាម៉ោង ៣និង១៥នាទីទៀបភ្លឺឈានចូល ថ្ងៃទី១៦ ខែធ្នូ ឆ្នាំ២០២៣ចំណុចក្នុងបរិវេណស្ពានកោះនរា ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។
បើយោងតាមប្រភពព័ត៌មានពីបុរសជាសន្តិសុខម្នាក់ សុំមិនបញ្ចេញឈ្មោះនៅកន្លែងកើតហេតុ បានឲ្យដឹងថា មុនពេលកើតហេតុ ដោយរូបគាត់បានឃើញបុរសជនបរទេសម្នាក់ បានបើករថយន្តស៊េរីទំនើបម៉ាក BMW ពណ៌សមួយគ្រឿង បំពាក់ផ្លាកលេខភ្នំពេញ 2BP-0037 បើកចុះពីលើស្ពានកោះនរា ក្នុងទិសដៅពីលិចទៅកើត បោះពួយយ៉ាងលឿនលុះពេលបើកមកដល់ចំណុចកើតហេតុ ខាងលើស្រាប់តែរថយន្តរេចង្កូតទៅខាងឆ្វេង ដៃបុកឡើងរួចបន្តបុករះសួនច្បារ និងដើមឈើមួយចំនួន រថយន្តនៅមិនទាន់អស់ល្បឿន បានបន្តទៅបុកបង្គោលភ្លើងបាក់មួយដើមទៀត ទើបរថយន្តទៅមុខលែងរួច សំណាងល្អដែលមិនបង្កឲ្យមានគ្រោះថ្នាក់ដល់មនុស្ស ចំណែកអ្នកបើរថយន្តបង្កត្រូវបានសន្តិសុខប្រចាំការ នៅស្ពានកោះនរាឃាត់ខ្លួនបាន ទុកប្រគល់ជូនខាងជំនាញ។
ក្រោយកើតហេតុខាងលើសមត្ថកិច្ចមូលដ្ឋាន សហការជាមួយនឹងខាងជំនាញ បានចុះមកដល់ពិនិត្យជុំវិញទីតាំងរួចវាស់វែង និងធ្វើកំណត់ហេតុយករថយន្តបង្កខាងលើ ទៅដោយសារទុកនៅអធិការដ្ឋាននគរបាលខណ្ឌច្បារអំពៅ រង់ចាំឲ្យភាគីម្ចាស់រថយន្តដោះស្រាយ ដើម្បីសងជាសំណងទៅលើថ្លៃខូចខាតដើម្បីបញ្ចប់រឿង៕ រក្សាសិទ្ធដោយ ៖ សា មេត
