ដូចដែលប្រិយមិត្តជាច្រើនបានទទួលជ្រាបរួចហើយ ក្នុងរយៈពេលប៉ុន្មានថ្ងៃមកនេះ អ្នកជំនួញអនឡាញដ៏ល្បីលោកស្រី ទ្រី ដាណា បានបង្កឲ្យមានការរិះគន់ឡើងកក្រើកជាថ្មី ពីគ្រប់មជ្ឈដ្ឋានមហាជននៅលើបណ្តាញសង្គម ជុំវិញរឿងរ៉ាវដែលលោកស្រី បានបោះពាក្យសម្តីហាក់មើលងាយដ៏ជ្រុលហួសហេតុបំផុត ទៅកាន់ក្រុមអ្នកបម្រើសេវារត់តុ ឬហៅថា (អ្នក Service) និងបានហាមកូនចៅរបស់ខ្លួនកុំឲ្យ «លុយធីប» ដល់ពួកគេថែមទៀតផង ខណៈប្តីប្រពន្ធទើបរៀបការថ្មីថ្មោងមួយគូនេះកំពុងអង្គុយឡាយវីដេអូប្រូម៉ូតលក់ផលិតផល នៅរីសតមួយកន្លែង ស្ថិតនៅក្នុងខេត្តព្រះសីហនុ។
គួរបញ្ជាក់ថា រឿងរ៉ាវនេះបានផ្ទុះឡើង គឺនៅពេលដែលលោកស្រី ទ្រី ដាណា និងប្តីក្មេង កំពុងអង្គុយហូបបាយថ្ងៃត្រង់ ខណៈឡាយវីដេអូប្រូម៉ូតលក់ផលិតផល ប៉ុន្តែ ដោយសារតែមិនពេញចិត្តនឹងបុគ្គលិករត់តុ មិនឃើញមានអ្នកមកប្រចាំការបម្រើសេវាកម្មដល់ពួកខ្លួនឲ្យបានដិតដល់ លោកស្រី ទ្រី ដាណា ក៏បានបោះសម្តីនៅចំពោះការមុខការឡាយបែបនេះថា «កុំឲ្យលុយធីបពួកវាអ្ហាស! ម៉ោងលុយធីបម៉ោ ដល់ពេលម៉ោងធ្វើការអត់មានទេ ១រយក៏អត់អោយដែរ កុំអោយ! វាមិនដែលម៉ែឪអាណា ភ្ញៀវមកអង្គុយចាំគ្មាន Service មួយទេ! អ៊ីចឹង ដល់ពេលម៉ោងលុយធីប កុំអោយ ស្អប់ណាស់អញ!…»។
ពិតណាស់ ក្រោយពីបានឃើញអ្នកជំនួញមានងារជាជំទាវរូបនេះ ចេញមកនិយាយដ៏ហាក់ជ្រុលហេតុពេក មហាជនអ្នកលេងបណ្តាញសង្គមជាច្រើន បានសម្តែងការរិះគន់ដាក់ឲ្យបែបៗនេះថា៖ «គាត់ចេញមកមើលងាយគេអ្នករត់តុម៉ង ហៅសុទ្ធតែពួកវា ចេះយាយចេញរួច, អត់មាននរណាបង្ខំយើងឱ្យលុយធីបទេ។ បើមានចិត្តជ្រះថ្លាអាណិតឱ្យទៅចាំនិយាយក្នុងពេល live ។ មនុស្សអត់ដឹងរបៀបរបបកន្លែងគេវាភ្លាវអញ្ចឹងឯង, គាត់ប្រហែលធ្លាប់តែចូលហាងគុយទាវ មិនធ្លាប់ចូលកន្លែងលំដាប់ទេដឹងទើបបានមិនដឹងថានៅក្នុងអូតែលលំដាប់បុគ្គលិកគេធ្វើការយ៉ាងមិច។ ដឹងអ្នករត់តុណាមកសុំធីបទេបង បើឱ្យគ្នាយកហើយអរគុណជាទឹកចិត្តភ្ញៀវ ពាក្យខ្លះយាយមកធ្វើឱ្យគេឈឺចាប់,…»។
តែយ៉ាងណាមិញ ស្របពេលរឿងរ៉ាវលោកស្រី ទ្រី ដាណា ត្រូវមហាជនផ្ទុះការរិះគន់មិនសំចៃមាត់ ថ្មីៗនេះ នៅលើបណ្តាញសង្គមពិតមានការភ្ញាក់ផ្អើល និងពេញចិត្តខ្លាំងតែម្តង នៅពេលបានឃើញម្ចាស់រីសត២កន្លែង នៅក្នុងខេត្តពោធិ៍សាត់ បានប្រកាសមិនទទួលស្វាគមន៍លោកស្រី ទ្រី ដាណា ជាភ្ញៀវឡើយ ក្រោយពេលលោកស្រីនិយាយមាក់ងាយដល់អ្នករត់តុ នៅសណ្ឋាគារមួយក្នុងខេត្តព្រះសីហនុ (រឿងលុយធីប)។
ជាក់ស្តែង កាលពីថ្ងៃទី៣១ ខែធ្នូ ឆ្នាំ២០២៣ លោក ថៃ ថេរាគុណ ជាម្ចាស់ resorts 2កន្លែង នៅស្រុកវាលវែងភ្នំ1500 ផ្លូវអន្ទង់អាំង ក្នុងខេត្តពោធិ៍សាត់ បានបង្ហោះនៅលើគណនីហ្វេសប៊ុករបស់ខ្លួនយ៉ាងដូច្នេះថា៖ «សូមប្រកាសមិនទទួលភ្ងៀវ (អ្នកស្រី ទ្រី ដាណាTry Dana) ឬហៅអ្នកស្រីកំពូលល្បីម្នាក់នោះជាដាច់ខាត ចាប់ពីថ្ងៃនេះ(៣០. ១២. ២០២៣) តទៅជារៀងរហូត កិច្ចសន្មត់នេះបានបោះត្រាដោយខ្ញុំជាម្ចាស់រីសតដោយគ្មានការកែ្រប្រែឡើយ»៕ រក្សាសិទ្ធិដោយ៖ លឹម ហុង
