នេះជាសកម្មភាពមួយ ដែលឃើញហើយពិតជាគួរឲ្យអាណិតខ្លោចចិត្ត ខណៈដែលនារីម្នាក់ធ្វើដំណើរទាំងកណ្តាលយប់អាធ្រាត្រតែម្នាក់ឯង ក៏ត្រូវបានចោរមួយក្រុម ធ្វើសកម្មភាពប្លន់ម៉ូតូបានសម្រេច ខណៈនាងធ្វើដំណើរមកដល់ច្រកចូលផ្ទះទៅហើយ។
ជាក់ស្តែង តាមរយៈវីដេអូកាមេរ៉ាសុវត្ថិភាពដែលថតបានពីផ្ទះអ្នកជិតខាង បានបង្ហាញនារីរងគ្រោះជិះម៉ូតូ១គ្រឿង ដែលត្រូវបានមើលឃើញថាទំនងជាម៉ូតូ Scopy បានបត់ចូលច្រកចូលផ្ទះចេញពីផ្លូវបន្តិច នៅពេលនោះ នាងក៏ស្រាប់តែឈប់ម៉ូតូ (មិនដឹងថា ម៉ូតូមានបញ្ហារលត់ម៉ាស៊ីន ឬយ៉ាងណា) ហើយស្របពេលនោះ ចោរ២ជិះម៉ូតូ១គ្រឿង ក្នុងចំណោមគ្នីគ្នាម៉ូតូផ្សេងទៀតចាំបិទគូទ ដែលបានជិះដេញតាមពីក្រោយ ក៏បានបត់ម៉ូតូចូលមក រួចធ្វើសកម្មភាពប្លន់នារីរងគ្រោះទាំងកម្រោលតែម្តង។
បើតាមអ្នកជិតខាង ដែលបានបញ្ចេញវីដេអូកាមេរ៉ាសុវត្ថិភាព មានគណនីហ្វេសប៊ុកឈ្មោះ Sean Sok Phay បានបញ្ជាក់ប្រាប់ឲ្យដឹងថា ហេតុការណ៍នេះ បានកើតឡើងម៉ោង ៣:៣០ នាទី ថ្ងៃទី១ ខែមករា ឆ្នាំ២០២៤ ស្ថិតនៅផ្លូវ២៦បេតេ សង្កាត់បឹងទំពុន២ ខ័ណ្ឌមានជ័យ ភ្នំពេញ។
តែយ៉ាងណាមិញ នៅពេលមានបងប្អូនអ្នកលេងបណ្តាញសង្គម បាននាំគ្នាចោទប្រកាន់ថា «ដើរយប់អធ្រាតម្នាក់ឯងហើយស្រីទៀត អត់ប្លន់ទើបចម្លែក» ម្ចាស់គណនីខាងលើ ក៏បានឆ្លើយប្រាប់ថា មិនមែនដើរលេងទេ តែគាត់ចេញពីធ្វើការប៉ុណ្ណោះ។ ដោយឡែក នៅពេលមានអ្នកឆ្ងល់បានសម្តែងការហួសចិត្តថា «ដល់មុខផ្ទះហើយមិនជិះចូលនៅឈប់ធ្វើអី?, ឃើញគេជិះក្បែរបែរជាឈប់ ដល់ចោរចូលគៀកទើបថែមល្បឿន» ភ្លាមៗនោះ អ្នកជិតខាងជាម្ចាស់ឃ្លីប និងក៏ដូចបងប្អូននារីរងគ្រោះម្នាក់ដែលមានគណនីហ្វេសប៊ុកឈ្មោះ Mina Imm បានប្រាប់ឲ្យដឹងថា នៅពេលហ្នឹង ម៉ូតូបងស្រីរបស់ខ្លួនវារលត់ ចៃដន្យចំពេលចូលមក ធ្វើឲ្យរូបនាងស្រឡាំងកាំងតែម្តង៕ រក្សាសិទ្ធិដោយ៖ លឹម ហុង
