ការងារដ៏ប្លែកមួយនៅក្នុងតំបន់ទេសចរណ៍ Wuzhishan ក្នុងខេត្ត Hebei របស់ប្រទេសចិន បាននិងកំពុងទទួលការចាប់អារម្មណ៍ជាខ្លាំង នៅក្នុងប្រទេសចិន ដោយសារតែការងារនោះហាក់ដូចជាស្រួលខ្លាំង មិនលើកលឺសែងធ្ងន់ធ្ងរឡើយ ពោលគឺគ្រាន់តែតុបតែងខ្លួនជា «ស៊ុន អ៊ូខុង» និងរង់ចាំទទួលទានផ្លែឈើ ពីភ្ញៀវទេសចរឲ្យបានច្រើនៗ នោះនឹងទទួលបានប្រាក់ជិត ៩០០០ ដុល្លារ។
នេះបើយោងតាមប្រភពព័ត៌មាន CNN News Agency បានធ្វើការចុះផ្សាយកាលពីថ្ងៃទី០៦ ខែមករា ឆ្នាំ២០២៤ គួរឲ្យភ្ញាក់ផ្អើលថា តួនាទីការងារនេះ ត្រូវបានផ្តល់ប្រាក់បៀវត្សរ៍ប្រចាំខែចំនួន ៨៤២ ដុល្លារ និងភារកិច្ចតែមួយគត់ គឺនៅតែក្នុងរូងភ្នំ ដើម្បីរង់ចាំទទួលយកចេកឲ្យបានច្រើន ទៅតាមចំនួនដែលអ្នកទេសចរចូលមកលេងកម្សាន្ត។
បេក្ខជនដែលត្រូវបានជ្រើសរើស ដែលតុបតែងក្នុងរបាំងមុខស្វា និងសំលៀកបំពាក់ ជាតួអង្គ ស៊ុន អ៊ូខុង នឹងត្រូវស្នាក់នៅក្នុងរូងភ្នំនៅ Wuzhishan ដែលត្រូវបានគេស្គាល់ថាជា «ភ្នំម្រាមដៃប្រាំ» ដែលបង្ហាញពីការចាប់ចងដំបូងរបស់ស្តេចស្វាឡើងវិញ ដោយព្រះដែលមានកំហឹង។
យ៉ាងណាមិញ តាមរយៈរូបភាពត្រូវបានចែករំលែកនៅលើប្រព័ន្ធផ្សព្វផ្សាយសង្គម បានបង្ហាញពីកាតព្វកិច្ចដ៏រីករាយរបស់ ស៊ុន អ៊ូខុង កំពុងស្ថិតក្នុងរូងភ្នំ ខណៈរង់ចាំទទួលយកអាហារសម្រន់ពីក្មេងមកលេង រាប់ចាប់ពីផ្លែប៉ោម រហូតដល់មីកញ្ចប់ និងជាពិសេសគឺផ្លែចេកដ៏សម្បូរបែបតែម្តង។
ដោយមិនតម្រូវលើកំរិតការសិក្សា នោះគុណភាពចម្បងរបស់បេក្ខជន គឺរួមមានចំណង់ចំណូលចិត្តចង់ធ្វើជា ស៊ុន អ៊ូខុង មានទេពកោសល្យសម្ដែង និងអាកប្បកិរិយារស់រវើក និងរាក់ទាក់ជាមួយភ្ញៀវទេសចរ។
អ្នកគ្រប់គ្រងធានាដល់អ្នកដាក់ពាក្យដែលមានសក្តានុពលថា ការទទួលទានចេកច្រើនពេកមិនមែនជាកាតព្វកិច្ចទេ ព្រោះថា អ្នកធ្វើការសម្ដែងបច្ចុប្បន្នតែងតែចែករំលែកអាហារសម្រន់របស់ពួកគេ ជាមួយមិត្តរួមការងារ បន្ទាប់ពីការផ្លាស់ប្តូរម៉ោងសម្រាករបស់ពួកគេ។
ដោយឡែក បុរសម្នាក់ដែលកំពុងបម្រើការងារនេះបច្ចុប្បន្ន និងទទួលបានប្រាក់ខែជិត ៩០០០ ដុល្លារ បាននិយាយថា គាត់ស្រឡាញ់តួអង្គ ស៊ុន អ៊ូខុង តាមរយៈរឿងព្រេងបុរាណ «គ្រូថាំងចេងចម្លងធម៌» នេះតាំងពីកុមារភាពមកម្ល៉េះ ហើយសង្ឃឹមថា នឹងអាចឆ្លងកាត់នូវភាពរីករាយ និងការចងចាំមួយនេះ ខណៈដែលការផ្សព្វផ្សាយវប្បធម៌ចិន នឹងទាក់ទាញការយកចិត្តទុកដាក់ឲ្យក្មេងៗជំនាន់ក្រោយបានស្គាល់ និងដឹងផងដែរ៕ រក្សាសិទ្ធិដោយ៖ លឹម ហុង
