វាជាទម្លាប់មួយទៅហើយ សម្រាប់ក្មេងៗ ដែលចូលចិត្តលេងល្បែងកំសាន្តណាដែលរំភើបអស្ចារ្យៗ ដោយពួកគេពុំបានយកចិត្តទុកពិចារណាថា វាអាចបង្កគ្រោះថ្នាក់នោះឡើយ ។
យើងក៏តែងសង្កេតឃើញនៅក្នុងវីដេអូ Youtube បានបង្ហាញទាំងក្មេងៗ និងសូម្បីមនុស្សពេញវ័យ បានជួបគ្រោះយ៉ាងដំណំៗ ដោយសារតែល្បែងដ៏ហ៊ានៗនេះ ។ ជាក់ស្តែង វីដេអូថ្មីមួយ ដែលទើបត្រូវបានបង្ហោះឡើងអ៊ីនធើរណេត បានបង្ហាញឲ្យឃើញក្មេងស្រីម្នាក់ ចំណោមមិត្តភក្តិរបស់នាង២នាក់ បានជួបគ្រោះថ្នាក់គួរឲ្យរន្ធត់ ខណៈនាង និងមិត្តភក្តិស្រីៗរបស់នាង នាំគ្នាបន្តោកខ្លួនតាមចំហៀងជណ្តើរយន្ត ពីជាន់ខាងក្រោម ឡើងទៅជាន់ខាងលើនៃផ្សារទំនើបមួយ ។
តាមរយៈវីដេអូឃ្លីបបានបង្ហាញឲ្យឃើញក្មេងស្រីតូចជាងគេម្នាក់ បានតោងឡើងតាមជណ្តើរយន្តបានបន្តិច ក៏ទម្លាក់ខ្លួនចុះវិញ ខណៈក្មេងស្រីម្នាក់ទៀត បានចូលបន្តតាមក្រោយ ។ ក្មេងស្រីនោះ បានព្យាយាមបន្តោកខ្លួនតាមចំហៀងជណ្តើរយន្ត ជិតដល់ជាន់ខាងលើទៅហើយ ស្រាប់តែរបូត (អស់ដៃ) ធ្លាក់ចុះដីវិញ បណ្តាលឲ្យចុកឆ្អល់យ៉ាងខ្លាំងតែម្តង ។ គេក៏ពុំដឹងថា ក្មេងស្រីរូបនោះរងរបួសធ្ងន់ធ្ងរជាងនេះ ឬ យ៉ាងណានោះ ព្រោះតែវីដេអូត្រូវបានបញ្ចប់ត្រឹមនេះ ៕ ចន្ទី (liveleak)
