កាលពីម្សិលមិញនេះ ថ្ងៃទី២៣ ខែមករា ឆ្នាំ២០២៤ ប៉ុស្តិ៍លេខ ៣ របស់ថៃ បានរាយការណ៍ថា មានករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើងនៅផ្លូវក្រោមដី នៃផ្លូវហាយវេតភ្ជាប់រវាងតំបន់ភូមិលេខ២ និងភូមិលេខ១៤ ឃុំតាខាំអេន ស្រុកថាម៉ាកា ខេត្តកានចាន់បូរី ដោយមានមនុស្ស២នាក់បានបុកក្បាលរបស់ពួកគេ ទៅនឹងផ្លូវរូងក្រោមដី ខណៈពេលពិនិត្យ CCTV ឃើញថា មានរថយន្តប្រមូលសំរាមពណ៌បៃតង ដែលមានបុគ្គលិកពីរនាក់អង្គុយនៅលើក្បាលរថយន្ត ខណៈឡានដឹកសំរាមបើកឆ្លងកាត់ផ្លូវរូងក្រោមដីក្នុងល្បឿនយ៉ាងលឿន។
វីដេអូ CCTV ក៏បានបង្ហាញឲ្យឃើញថា ខណៈរថយន្តបើកចូលដល់ច្រកឆ្លងកាត់ ជាហេតុធ្វើឲ្យក្បាលបុគ្គលិកពីរនាក់ បានបុកទៅនឹងធ្នឹមផ្លូវក្រោមដីយ៉ាងពេញទំហឹង ប៉ុន្តែរថយន្តបានបន្តបើកបរដោយអ្នកបើកបរមិនដឹងថាមានគ្រោះថ្នាក់អ្វីកើតឡើងនោះទេ។ ប៉ុន្តែ បានដឹងពីជួបគ្រោះថ្នាក់នេះ គឺនៅពេលបើករថយន្តមកដល់ចំណុចប្រមូលសំរាមបន្ទាប់ ហើយអ្នកបើកបរបានប្រញាប់ប្រាប់ក្រុមសង្គ្រោះឱ្យមកជួយ ប៉ុន្តែជនរងគ្រោះទាំងពីរស្លាប់ទៅហើយ។
អ្នកស្លាប់ទាំង២នាក់ ត្រូវបានគេស្គាល់ថា ឈ្មោះ អាភិនី អាយុ២៤ឆ្នាំ និងឈ្មោះ ណារ៉ុងស័ក្តិ អាយុ២៧ឆ្នាំ មុខរបរជាបុគ្គលិករថយន្តប្រមូលសំរាម។ ចំពោះការស៊ើបអង្កេតបានដឹងថា អ្នកបើកបររថយន្តដឹកសំរាមបើកកាត់ផ្លូវក្រោមដីត្រង់ចំណុចកើតហេតុដូចសព្វមួយដង។ ប៉ុន្តែ គាត់មិនបានដឹងថា មានបុគ្គលិកឡើងលើរថយន្តនោះទេ។ ជាធម្មតា ពួកគេនៅខាងក្រោយរថយន្ត។ អ្នកបើកបរក៏បានឲ្យដឹងថា ពេលបើកឡានចេញពីផ្លូវក្រោម ដី មកឈប់នៅខាងមុខមន្ទីរពេទ្យមួយ ដើម្បីប្រមូលសំរាមបន្ទាប់ ពេលចុះពីរថយន្ត គាត់ក៏ឃើញមានប្រឡាក់ឈាមធ្លាក់ចុះមកចំហៀងរថយន្ត។ ភ្លាមៗនោះ គាត់ក៏ប្រញាប់ឡើងទៅមើល ក៏ប្រទះឃើញកម្មករ២នាក់ដេកស្លាប់ក្នុងថ្លុកឈាម។
សមត្ថកិច្ចបានបង្ហើបថា ជាធម្មតាអ្នកប្រមូលសំរាមរបស់រដ្ឋបាលឃុំ តាខាំអេន បានផ្លាស់ប្តូរកន្លែងប្រមូលសំរាមរៀងរាល់មួយឆ្នាំ។ ពួកគេទាំងពីរធ្លាប់ប្រមូលនៅកន្លែងផ្សែង មិនមានផ្លូវក្រោមដីបែបនេះទេ។ ហើយនៅពេលផ្លាស់ប្តូរមកតំបន់ថ្មី ពួកគេប្រហែលជាមិនគិតដល់ពីគ្រោះថ្នាក់បែបនេះកើតឡើងនោះទេ។ ទោះជាយ៉ាងណា ករណីនេះរដ្ឋបាលឃុំនឹងចាត់វិធានការតាមជំហានបន្ទាប់ ហើយជនរងគ្រោះទាំងពីរមានការធានារ៉ាប់រងផងដែរ៕ រក្សាសិទ្ធិដោយ៖ លឹម ហុង
