នៅថ្ងៃទី២៥ ខែមករា ឆ្នាំ២០២៤ គេហទំព័រ CTWANT បានចុះផ្សាយនូវរឿងដ៏ហួសចិត្តខ្លាំងបំផុតមួយ ដែលបង្កឡើងដោយជំនឿអរូបី ដែលបានកើតឡើងក្នុងប្រទេសឥណ្ឌា។ នោះគឺផ្តើមពីគ្រួសារមួយរស់នៅក្នុងទីក្រុងដេលី បានជួបរឿងដ៏សោកស្តាយ នៅពេលកូនប្រុសអាយុ៥ឆ្នាំរបស់ពួកគេធ្លាក់ខ្លួនឈឺធ្ងន់ ហើយគ្រួសារបាននាំកូនទៅត្រាំក្នុងទឹកទន្លេគង្គា ដោយជឿថានឹង «ជួយនិងពន្យារអាយុជីវិត» ប៉ុន្តែលទ្ធផលគឺផ្ទុយពីនេះ ដោយកូនប្រុសរបស់ពួកគេបានស្លាប់ភ្លាមៗ។
យោងតាមប្រព័ន្ធផ្សព្វផ្សាយក្នុងស្រុក NDTV ក្មេងប្រុសអាយុ ៥ ឆ្នាំម្នាក់ មានជំងឺមហារីកឈាមដំណាក់កាលចុងក្រោយ។ គ្រូពេទ្យបានធ្វើរោគវិនិច្ឆ័យថាជាជំងឺមិនអាចព្យាបាលបាន។ ទោះបីជាយ៉ាងណា ក្រុមគ្រួសារមិនបានចុះចាញ់ឡើយ។ លុះដល់ថ្ងៃទី២៤ ខែមករា វេលាម៉ោង៩ព្រឹក ពួកគេបាននាំកូនប្រុសដែលឈឺ ជិះតាក់ស៊ីចេញពីក្រុងដេលី ដើម្បីធ្វើដំណើរទៅកាន់ទន្លេ Ganges នៅ Haridwar នៃរដ្ឋ Uttarakhand ជាកន្លែងពិសិដ្ឋមួយយោងទៅតាមជំនឿហិណ្ឌូ។
គ្រួសាររបស់ក្មេងប្រុសនេះជឿថា ទន្លេដ៏ពិសិដ្ឋនេះនឹងជួយកូនប្រុសរបស់ពួកគេឱ្យជាសះស្បើយ។ ពេលមកដល់ ពួកគេបានរៀបចំពិធី ដោយឪពុកម្តាយរបស់ក្មេងប្រុសធ្វើការងអធិស្ឋាននៅលើច្រាំង។ ខណៈពេលដែលម្តាយមីងរបស់ក្មេងប្រុសដែលទៅជាមួយ បានយកក្មួយប្រុស ទៅជ្រមុជនៅក្នុងទឹក ស្ថិតក្នុងអាកាសធាតុដ៏ត្រជាក់ ហើយទឹកក្នុងទន្លេក៏ត្រជាក់ខ្លាំងផងដែរ។ នៅពេលនោះ អ្នកនៅជុំវិញបានកត់សម្គាល់ឃើញថា ក្មេងប្រុសនោះនៅក្នុងទឹកយូរពេក។ ដូច្នេះ គេក៏បានប្រាប់ក្រុមគ្រួសារឲ្យឈប់ធ្វើបែបនេះទៀតទៅ ប៉ុន្តែ ពួកគេមិនជឿឡើយ។
សាក្សីដែលនៅក្នុងពិធីនោះបាននិយាយថា ពលរដ្ឋល្អមួយចំនួនបានព្យាយាមជួយទាញក្មេងប្រុសចេញពីទឹក។ ប៉ុន្តែម្តាយមីងរបស់ក្មេងប្រុសនោះមិនព្រម ហើយថែមទាំងវាយតប់ពួកគេទៀតផង ព្រោះខឹងមកជ្រៀតជ្រែកខណៈបើទោះបីក្មេងប្រុសត្រូវបានយកចេញពីទឹក ហើយក៏ត្រូវបានគេរកឃើញថាលែងមានចលនានិងសន្លប់។ ហើយបើទោះជានៅពេលនោះក្រុមគ្រួសារបានអង្គុយនៅក្បែរសពក្មេងក៏ដោយ ក៏ពួកជឿថា ក្មេងប្រុសនឹងរស់ឡើងវិញ។
ទោះជាយ៉ាងណា ទីបំផុត មានអ្នកជូនដំណឹងដល់សេវាសង្គ្រោះបន្ទាន់។ ក្មេងប្រុសត្រូវបានគេយកទៅមន្ទីរពេទ្យ។ ប៉ុន្តែគ្រូពេទ្យមិនអាចជួយជីវិតគាត់បានទេ។ ក្មេងប្រុសនេះបានស្លាប់ទៅហើយ ដោយសារខ្វះខ្យល់ពីការលង់ទឹក។ ប៉ូលិសនៅតំបន់នោះក៏ចុះទៅឃាត់ខ្លួនឪពុកម្តាយក្មេងប្រុសនោះ រួមទាំងម្តាយមីង ទៅធ្វើការស៊ើបអង្កេតដើម្បីចាត់ការតាមច្បាប់។
អ្នកបើកតាក់ស៊ីដែលបានទម្លាក់គ្រួសារចោល បាននិយាយថា ក្មេងប្រុសនេះពិតជាឈឺធ្ងន់នៅពេលនោះ។ ស្ថានភាពរបស់គាត់មើលទៅធ្ងន់ធ្ងរណាស់។ ប៉ុន្តែ ក្មេងប្រុសនោះនៅតែមានភាពក្លាហានអង្គុយក្នុងរថយន្តជាច្រើនម៉ោង។ គាត់បានបន់ស្រន់ និងបួងសួងឲ្យក្មេងកំសត់នោះមានអាយុវែងតាមដែលអាចធ្វើទៅបាន។ តែមិននឹកស្មានថា ក្មេងប្រុសនោះនឹងត្រូវបញ្ចប់ជីវិតភ្លាមៗ នៅគោលដៅជំនឿបែបនេះទេ៕ រក្សាសិទ្ធិដោយ៖ លឹម ហុង
