ព្រះវិហារ ៖ ក្រសួងធនធានទឹក បានស្នើសូមបង្កើនការប្រុងប្រយ័ត្ន ខណៈទឹកស្ទឹងសែន កំពុងហក់ឡើងខ្លាំង ។ ក្រសួងធនធាទឹក បានឲ្យដឹងថា បរិមាណទឹកភ្លៀងដែលបានធ្លាក់ជោកជាំជាប់ៗគ្នា នៅតំបន់ផ្ទៃរងទឹកភ្លៀងរបស់ស្ទឹងសែន ក្នុងភូមិសាស្ត្រខេត្តព្រះវិហារ បានធ្វើឲ្យស្ថានភាពទឹកនៅតាមដងស្ទឹងសែន មានការជន់ឡើងខ្លាំង ។ គិតត្រឹមម៉ោង ៧ ព្រឹក ថ្ងៃទី ៩ ខែសីហា ឆ្នាំ ២០១៨ នេះ ៖
ទឹកស្ទឹងសែនក្នុងខេត្តព្រះវិហារ មានកម្ពស់ ៨,១២ ម៉ែត្រ (កម្ពស់ប្រកាសឲ្យប្រុងប្រយ័ត្ន ១១,៥០ ម៉ែត្រ) ។
ទឹកស្ទឹងសែនក្នុងខេត្តកំពង់ធំ មានកម្ពស់ ១២,២៤ ម៉ែត្រ (កម្ពស់ប្រកាសឲ្យប្រុងប្រយ័ត្ន ១៣,៥០ ម៉ែត្រ) ។
ក្រសួងធនធានទឹក និងឧតុនិយម បានឲ្យដឹងថា បរិមាណទឹកភ្លៀងដែលបានធ្លាក់ច្រើនជាប់ៗគ្នា បានបង្កឲ្យមានជំនន់ទឹកភ្លៀងប៉ះពាល់ភូមិចំនួន ២ គឺភូមិបង្នន និងភូមិស្រែ របស់ឃុំរាបរយ ស្រុករវៀង ខេត្តព្រះវិហារ និងតំបន់មួយចំនួនទៀតនៅព្រំប្រទល់ខេត្តព្រះវិហារ-ខេត្តស្ទឹងត្រែង ។ មកដល់ម៉ោង ៤ រសៀល ថ្ងៃទី ៨ ខែសីហា ឆ្នាំ ២០១៨ នេះ ទឹកបាន និងកំពុងស្រកចុះវិញជាបណ្តើរៗហើយ ។
ប្រជាពលរដ្ឋជាច្រើនគ្រួសាររស់នៅ ភូមិបង្កននិងភូមិស្រែ ក្នុងឃុំរៀបរយ ស្រុករវៀង ខេត្តព្រះវិហារ កំពុងប្រឈមបញ្ហាទឹកជំនន់ ដោយសារទឹកអូរបានហក់ឡើងខ្លាំង នៅព្រឹកថ្ងៃទី៨ ខែសីហា ឆ្នាំ២០១៨នេះ។
លោកវរសេនីយ៍ឯក សាយ ដេត អធិការនគរបាលស្រុករវៀង បានឲ្យដឹងថា ប្រជាពលរដ្ឋប្រមាណ២០គ្រួសារ រស់នៅភូមិបង្នន និងភូមិស្រែ ឃុំរៀបរយ ស្រុករវៀង បានរងគ្រោះដោយទឹកជំនន់ ដោយសារទឹកអូរហក់ឡើងខ្លាំង បណ្តាលឲ្យលិចក្រោមផ្ទះ និងផ្លូវនានាក្នុងភូមិ ដែលករណីទឹកជំនន់យ៉ាងគំហុកនេះកើតឡើង គឺបណ្តាលមកពីរទឹកជន់នៅអូរឡង់ និងអូរលួច ប៉ុន្តែប្រជាពលរដ្ឋរងគ្រោះ ត្រូវបានសមត្ថកិច្ចជួយសង្គ្រោះរកទីទួលសុវត្ថិភាពហើយ។
លោកអធិការស្រុក បានឲ្យដឹងទៀតថា ទឹកអូរដែលបណ្តាលឲ្យជន់លិចភូមិប្រជាពលរដ្ឋនេះ គឺបណ្តាលមកពីទឹកភ្លៀង មិនមែនបណ្តាលមកពីទឹកស្ទឹងសែននោះទេ ដូច្នេះបើសិនជាមិនមានភ្លៀងធ្លាក់ខ្លាំង ក៏ទឹកអូរមិនឡើងជន់លិចភូមិប្រជាពលរដ្ឋបែបនេះឡើយ។ គិតត្រឹមមកដល់ពេលនេះ ទឹកចាប់ផ្តើមស្រកបន្តិចម្តងៗហើយ។ ប៉ុន្តែកម្លាំងសមត្ថកិច្ចនិងអាជ្ញាធរមូលដ្ឋាន ចុះទៅទីនោះប្រចាំការ ដើម្បីត្រៀមសង្គ្រោះប្រជាពលរដ្ឋ បើមេឃនៅតែបន្តធ្លាក់ភ្លៀងទៀត។
ទឹកទន្លេមេគង្គក្នុងភូមិសាស្ត្រខេត្តត្បូងឃ្មុំ នៅតែបន្តហក់ឡើងជារៀងរាល់ថ្ងៃធ្វើឲ្យភូមិប្រជាពលរដ្ឋក្នុង ស្រុកក្រូចឆ្នារ និងស្រុកត្បូងឃ្មុំ តាមដងទន្លេបានជនលិច ក្នុងនោះក៏មានប៉ុស្តិ៍រដ្ឋបាលចំនួន៦ មានប៉ុស្តិ៍រដ្ឋបាលព្រែកអាជី , ប៉ុស្តិ៍រដ្ឋបាលកោះពីរ ប៉ុស្តិ៍រដ្ឋ បាលកំពង់ទ្រាស, ប៉ុស្តិ៍រដ្ឋបាលពាមជីលាំង,ប៉ុស្តិ៍រដ្ឋបាល បឹងព្រួល និងប៉ុស្តិ៍រដ្ឋបាលជីរោទី១ ក្នុងស្រុកទាំង២ខាងលើក៏ បានជនលិចផងដែរ ។ លោកឧត្តម សេនីយ៍ទោ បែន រ័ត្ន បានលើកឡើងថា ឆ្នាំទឹកទន្លេបានជន់ លិចភូមិប្រជាពលរដ្ឋតាមដងទន្លេស្ទើរទាំងស្រុក ដែលការជន់លិចនេះបានបង្ករផលប៉ះពាល់យ៉ាងធ្ងន់ធ្ងរដល់ប្រជាពលរដ្ឋ ក្នុងរស់នៅ និងប្រកបររកស៊ីចិញ្ចឹមជីវិតក្នុងនោះមួយត្រូវបាន ជម្លៀសទៅទីទួលសុវត្ថិភាព។ លោកបន្តថា ក្នុងនោះប៉ុស្តិ៍ រដ្ឋបាលមួយចំនួនក៏ត្រូវជន់លិចបង្ករការលំបាក់ក្នុងបម្រើសេវា ជូនប្រជាពលរដ្ឋ តែយ៉ាងណាពួកគាត់បានប្រឹងប្រែងអស់ពី លទ្ធភាពជួយដល់ពលរដ្ឋដែលរងគ្រោះ៕ ដោយ ៖ បញ្ញាស័ក្តិ
