នេះជាខណៈពេលដ៏គួរឲ្យរន្ធត់មួយ ដែលសត្វក្រពើ១ក្បាលត្រូវបានរកឃើញនៅក្នុងផ្ទះរបស់និវត្តជនម្នាក់ ហើយវាសូម្បីចង់វាយប្រហារលើប៉ូលីសទៀតផង ។
សត្វក្រពើប្រវែង ២ ម៉ែត្រ នេះត្រូវបានរកឃើញដោយស្ត្រីឈ្មោះ Naang Thongcharoen អាយុ ៧៣ ឆ្នាំ ដែលបានដើរឆ្លងកាត់សួនរបស់គាត់ នៅវេលាម៉ោង ៣ និង ៣០ នាទីព្រឹក នៅក្នុង Uthai Thani ប្រទេសថៃ ។
លោកយាយ Naang បានហៅទូរស័ព្ទដែលបានមកដល់ជាមួយក្រុមសង្គ្រោះជាច្រើននាក់ ចូលក្នុងផ្ទះរបស់គាត់ ដើម្បីចាប់វា ។ ទោះយ៉ាងណា ភ្ញាក់ងារប៉ូលីសក្នុងតំបន់ដែលពុំធ្លាប់ទទួលការហ្វឹកហាត់ចាប់ក្រពើ និងរួមទាំងក្រុមការងារសង្គ្រោះ ដែលត្រូវបានបញ្ជូនមក បានរត់យកប្រាសអាយុរៀងៗខ្លួន បន្ទាប់ពីវាយប្រហារតបនឹងការចាប់របស់ពួកគេ ។
ដោយសារតែគ្មានជំនាញចាប់ក្រពើ បុរសទាំងនោះបានប្រើក្រណាត់ បោះគ្របលើភ្នែករបស់វា មុនពេលចាប់លើកវាចូលទ្រុងរថយន្ត ។ ប៉ុន្តែ កិច្ចខំប្រឹងប្រែងទាំងខ្លាចរអារបស់ពួកគេ ពុំទទួលជោគជ័យដោយងាយស្រួលនោះទេ ព្រោះតែសត្វក្រពើនេះនៅមានកម្លាំងខ្លាំងក្លា បានលោតចេញពីលើរថយន្តចូលក្នុងផ្ទះវិញ ដែលធ្វើឲ្យពួកគេព្យាយាមចាប់វាទាំងព្រលឹងចុងសក់ ។
ទោះយ៉ាងណា នៅទីបំផុត មន្ត្រីប៉ូលីសបានចាប់ចងវាបានសម្រេច បន្ទាប់ពីប្រើពេល ៣ ម៉ោង ដើម្បីលើកឡើងរថយន្តជាថ្មី ។
លោកយាយ Naang និយាយថា៖ «ខ្ញុំភ្ញាក់ពីដំណេក និងបានដើរទៅខាងក្រោយផ្ទះ ដើម្បីកម្តៅអាហារ ។ ឆ្កែរបស់ខ្ញុំបានព្រួសយ៉ាងខ្លាំងនៅខាងមុខ ហើយខ្ញុំពិតជាមានការភ្ញាក់ផ្អើលយ៉ាងខ្លាំង នៅពេលឃើញអ្វីមួយកំពុងលូននៅក្នុងទីងងឹត» ។
«ខ្ញុំបានប្រើពិលមើលវា និងស្លុតរន្ធត់យ៉ាងខ្លាំង នៅពេលខ្ញុំបានឃើញវាជាសត្វក្រពើ ។ ខ្ញុំពិតជាភ័យខ្លាចណាស់ ដែលវាបានមកចូលនៅក្នុងផ្ទះខ្ញុំបែបនេះ ។ ឃើញបែបនេះ ខ្ញុំក៏បានចាក់សោរទ្វារ សម្ងំនៅខាងក្នុងផ្ទះជាមួយឆ្កែរបស់ខ្ញុំ និងបន្ទាប់មកទូរស័ព្ទហៅប៉ូលីសតែម្តង» ។
មន្ត្រីឈ្មោះ Somchai Thongsri មកពីប៉ុស្តិ៍ប៉ូលីស Nong Chang និយាយថា៖ «យើងបានត្រួតពិនិត្យគ្រប់ទីកន្លែង និងគ្មាននរណាម្នាក់ដឹងថាសត្វក្រពើនេះមកពីទីកន្លែងណានោះទេ ។ យើងបានលែងវាចូលទៅក្នុងប្រឡាយមួយ មានចម្ងាយពីទីនេះប្រហែល ១០ គីឡូម៉ែត្រ» ។
«យើងគិតថា សត្វក្រពើនេះបានលូនចូលផ្ទះលោកយាយខាងលើនេះ ខណៈវាកំពុងស្វែងរកចំណី» ៕ ឧត្តម (pattayaone.news)
