ភ្នំពេញ ៖ នៅថ្ងៃទី ២៥ តុលា ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអញ្ជើញជួបជជែកលេងជាមួយប្អូនប្រុស ម៉ិច ដារ៉ា លើប្រធានបទជាច្រើន រួមទាំងសិទ្ធិសេរីភាពនិងការទទួលខុសត្រូវរបស់អ្នកសារព័ត៌មាន ដែលចាំបាច់ត្រូវផ្សព្វផ្សាយព័ត៌មានពិត និងដោយប្រកាន់ខ្ជាប់នូវក្រមសីលធម៌វិជ្ជាជីវៈ ដើម្បីជៀសវាងការផ្សព្វផ្សាយព័ត៌មានខុសពីការពិត នាំឲ្យអ្នកស្ដាប់ឬអ្នកអានព័ត៌មាន មានការយល់ច្រឡំខុស។
សម្តេចមហាបវរធិបតី បានបញ្ជាក់ថា “ខ្ញុំធ្លាប់ស្គាល់ប្អូនប្រុស ម៉ិច ដារ៉ា កន្លងទៅជាច្រើនឆ្នាំមកហើយ ប៉ុន្តែយើងមិនដែលមានឱកាសបានអង្គុយជជែកគ្នាលេងដូចពេលនេះ”។
លោក ម៉ិច ដារ៉ា ត្រូវបានដោះលែងឱ្យនៅក្រៅឃុំ ដោយលោកទទួលបានអនុញ្ញាតឱ្យចាកចេញពីពន្ធនាគារ ខេត្តកណ្ដាល កាលពីក្រោយម៉ោង ១២ ថ្ងៃត្រង់ នៃថ្ងៃព្រហស្បតិ៍ ទី២៤ ខែតុលា បន្ទាប់ពីលោកបានសុំទោសចំពោះ សម្តេចតេជោ ហ៊ុន សែន ប្រធានព្រឹទ្ធសភា និង សម្តេចនាយករដ្ឋមន្ត្រី ហ៊ុន ម៉ាណែត តាមរយៈវីដេអូឃ្លីប កាលពីយប់ថ្ងៃទី២៣ ខែតុលា ឆ្នាំ២០២៤ ។
លោក ម៉ិច ដារ៉ា ត្រូវបានតុលាការចោទប្រកាន់ ហើយក៏ជាប់បម្រាមតុលាការចំនួន ៤ចំណុច គឺទី១ លោក ម៉ិច ដារ៉ា មិនអាចចេញក្រៅប្រទេសបាន ទី២ មិនអាចផ្លាស់ប្ដូរលំនៅដោយគ្មានការអនុញ្ញាត ទី៣ ត្រូវឆ្លើយតបតាមការកោះហៅរបស់មន្ត្រីមានសមត្ថកិច្ច និងទី៤ លោក ម៉ិច ដារ៉ា ត្រូវបង្ហាញខ្លួនចំពោះប៉ូលិសប៉ុស្តិ៍ផ្សារដើមថ្កូវ នៅរៀងរាល់បួនសប្ដាហ៍ម្ដង ។
លោក ម៉ិច ដារ៉ាត្រូវបានចាប់ខ្លួនកាលពីថ្ងៃទី30 ខែកញ្ញា ឆ្នាំ២០២៤ ក្រោមបទញុះញង់ទាក់ទងនឹងការបង្ហោះតាមបណ្ដាញសង្គម ដែលលោកបានធ្វើកាលពីដើមខែកញ្ញា ។ តុលាការបានច្រានចោលសំណើសុំនៅក្រៅឃុំរបស់ លោក ម៉ិច ដារ៉ា កាលពីសប្ដាហ៍មុន ។
លោក ម៉ិច ដារ៉ា ជាអ្នកសារព័ត៌មានកម្ពុជា ដែលបានរាយការណ៍យ៉ាងសកម្ម អំពីការជួញដូរមនុស្ស និងការឆបោកតាមប្រព័ន្ធអនឡាញនៅក្នុងប្រទេសកម្ពុជា ហើយក្នុងឆ្នាំ២០២៣ លោកឈ្នះបានពានរង្វាន់របស់ក្រសួងការបរទេសសហរដ្ឋអាមេរិក សម្រាប់ការរាយការណ៍អំពីអំពើជួញដូរមនុស្ស ។
លោក ម៉ិច ដារ៉ា ធ្លាប់ជាអ្នកសារព័ត៌មាននៃស្ថាប័នសារព័ត៌មានឯករាជ្យមួយចំនួន ដូចជា សារព័ត៌មាន ឌឹ ខេមបូឌា ដេលី (The Cambodia Daily) សារព័ត៌មានភ្នំពេញប៉ុស្តិ៍ និងវិទ្យុសំឡេងប្រជាធិបតេយ្យ វីអូឌី មុនពេលអាជ្ញាបណ្ណប្រព័ន្ធផ្សព្វផ្សាយមួយនេះត្រូវបានដកហូតកាលពីខែកុម្ភៈ ឆ្នាំ២០២៣ ។ មុនពេលចាប់ខ្លួន លោក ម៉ិច ដារ៉ា ជាអ្នកសារព័ត៌មានឯករាជ្យ (Freelance Journalist) ៕ រក្សាសិទ្ធដោយ ៖ សុទ្ធលី
