ក្រោយការតាមប្រមាញ់ជាបន្ទាន់ សម្រាប់ករណីបាញ់សម្លាប់លោក លឹម គឹមយ៉ា អាយុ ៧៤ ឆ្នាំ ជាអតីតសមាជិកសភាបក្សប្រឆាំងកម្ពុជា, ជនសង្ស័យត្រូវបានកំណត់អត្តសញ្ញាណបានហើយ ខណៈប៉ូលីសថៃបានលាតត្រដាងថា ធ្លាប់មានប្រវត្តិជាប់គុក២ដង មុនពេលត្រូវគេរំសាយចេញពីកងទ័ពជើងទឹក។
ឧត្តមសេនីយ៍ឯក Siam Boonsom ស្នងការប៉ូលិសក្រុង បាននិយាយថា បន្ទាប់ពីមន្ត្រីជំនាញបានប្រមូលភ័ស្តុតាង និងកំណត់អត្តសញ្ញាណជនសង្ស័យបានហើយ ពួកគេបានស្នើសុំដីកាពីតុលាការ។ ហើយបច្ចុប្បន្ន សមត្ថកិច្ចកំពុងតាមចាប់ជនដៃដល់ដើម្បីផ្តន្ទាទោសតាមច្បាប់។ តាមការស៊ើបអង្កេតដំបូង ជនសង្ស័យនេះគឺជាឃាតករស៊ីឈ្នួល ដែលពិតជាកំណត់មុខសញ្ញាបាន។
តែបើទោះជាក្នុងដំណាក់កាលនេះ មន្ត្រីបានទទួលព័ត៌មានដ៏មានប្រយោជន៍យ៉ាងណាក៏ដោយ ប៉ុន្តែពួកគេនឹងមិនទាន់បង្ហាញថាជានរណានៅឡើយទេ។ មន្ត្រីក៏បានដាក់ការសង្ស័យជាច្រើន ជុំវិញករណីអំពើឃាតកម្មដ៏សាហាវនេះ រហូតដល់ឃាត់ខ្លួនជនសង្ស័យ ទើបដឹងពីមូលហេតុពិតប្រាកដ ហើយត្រូវពង្រីកការស៊ើបអង្កេតស្វែងរកជនដៃដល់ពីក្រោយ។
យោងតាមការស៊ើបអង្កេតបឋម ជនរងគ្រោះបានធ្វើដំណើរពីខេត្តសៀមរាប ប្រទេសកម្ពុជា តាមរថយន្តក្រុង ជាមួយប្រពន្ធជាជនជាតិបារាំង និងសាច់ញាតិខ្មែរ មុនពេលកើតហេតុ។ ប្រពន្ធជនរងគ្រោះត្រូវបានសមត្ថកិច្ចធ្វើការសាកសួរ ប៉ុន្តែព័ត៌មានមិនអាចបញ្ចេញបានទេ ដោយសារបារម្ភថា ជនសង្ស័យនឹងដឹងអំពីសកម្មភាពរបស់មន្ត្រី ទើបធ្វើឱ្យពិបាកក្នុងការតាមចាប់ជនសង្ស័យ មកផ្តន្ទាទោសតាមច្បាប់នៅពេលនេះបាន។
តាមការស្រាវជ្រាវបានរកឃើញថា ជនសង្ស័យមានប្រវត្តិប្រព្រឹត្តបទល្មើសពាក់ព័ន្ធនឹងទ្រព្យសម្បត្តិ។ ហេតុនេះ ដើម្បីសុវត្ថិភាពមន្ត្រី លោកស្នងការ Siam Boonsom ក៏បានណែនាំដល់មន្ត្រីដែលបំពេញភារកិច្ចក្នុងការតាមប្រម៉ាញ់ ឲ្យមានការប្រុងប្រយ័ត្នខ្ពស់ ក្នុងដំណើរការចាប់ខ្លួន ព្រោះជនល្មើសមានប្រដាប់អាវុធ អាចទប់ទល់បាន។
យោងតាមរបាយការណ៍របស់សមត្ថកិច្ចថៃ បានឲ្យដឹងថា ជនសង្ស័យជិះម៉ូតូម៉ាកហុងដាវ៉េវ១០០ ពណ៌ក្រហម ពាក់ស្លាកលេខ ៨៤៥ ពាក់មួកសុវត្ថិភាព និងត្រូវបានជឿថាលាក់អាវុធនៅក្នុងកាបូប។ ជនដៃដល់បានជិះម៉ូតូរត់គេចខ្លួន បន្ទាប់ពីបានបាញ់សម្លាប់លោក លឹម គឹមយ៉ា កាលពីវេលាម៉ោង ៤ រសៀល នៅថ្ងៃទី៧ ខែមករា នៅជិតប្រាសាទព្រះបរមនិវេទវិហារ ក្នុងស្រុក Phra Nakhon។
វេជ្ជបណ្ឌិតផ្នែកកោសល្យវិច្ច័យនៅមន្ទីរពេទ្យ Vajira បានបញ្ជាក់ថា លទ្ធផលបង្ហាញឱ្យឃើញពីស្នាមរបួសដោយគ្រាប់កាំភ្លើងចំនួនពីរគ្រាប់ចំខ្នងខាងស្តាំ។ មូលហេតុនៃការស្លាប់ គឺដាច់សរសៃឈាមបេះដូងដោយសារគ្រាប់កាំភ្លើង ហើយមូលហេតុបន្ថែមទៀត គឺដាច់ថ្លើមដោយសារគ្រាប់កាំភ្លើង។
ប៉ូលីសថៃក៏បានបញ្ចេញរូបថត និងបង្ហាញឲ្យដឹងពីប្រវត្តិជនសង្ស័យថា ជនរូបនេះ ធ្លាប់បម្រើការនៅក្នុងកងទ័ពជើងទឹក និងធ្លាប់ប្រព្រឹត្តបទល្មើស ហើយត្រូវផ្តន្ទាទោសដាក់ពន្ធនាគារចំនួន២ដង គឺនៅក្នុងឆ្នាំ២០២១ និងឆ្នាំ២០២២ បន្ទាប់មកនៅឆ្នាំ២០២៣។ ជនសង្ស័យរូបនេះត្រូវបានគេរកឃើញថាមានកំហុសដោយសារអវត្តមានពីកាតព្វកិច្ច ដូច្នេះកងទ័ពជើងទឹកបានពិចារណាបណ្ដេញគាត់ចេញពីកាតព្វកិច្ច៕
