ខេត្តត្បូងឃ្មុំ: រថយន្តធុនធំមួយគ្រឿងបានបើកបរក្នុងល្បឿនលឿនលើកំណាត់ផ្លូវជាតិលេខ 71 C ដោយខ្វះការប្រុងប្រយ័ត្នជាហេតុបណ្ដាលឱ្យរ៉េចង្កូតទៅបុកពលរដ្ឋ ដែលឈប់នៅចិញ្ចើមផ្លូវពេញទំហឹងបណ្ដាលឱ្យស្លាប់ចំនួន០៤នាក់ភ្លាមៗនិងរបួសធ្ងន់ម្នាក់។ហេតុការណ៍នេះបានកើតឡើងនៅវេលាម៉ោង០៤យប់ទៀតភ្លឺឈានចូលព្រឹកថ្ងៃទី០៩មករាឆ្នាំ២០២៤ ត្រង់ចំណុចមុខផ្ទះឈ្មោះហ៊ីម យ៉ាន់ ភេទប្រុស ស្ថិតនៅភូមិត្រពាំងបី ឃុំគរ ស្រុកត្បូងឃ្មុំ ខេត្តត្បូងឃ្មុំ ។ ក្រោយកើតហេតុដោយមានអន្តរាគមន៍ពីរកម្លាំងសមត្ថកិច្ចអ្នករងគ្រោះត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យកម្ពុជា-ចិនស្ថិតនៅក្នុងខេត្តត្បូងឃ្មុំតែម្ដង។
សមត្ថកិច្ចមូលដ្ឋានបានប្រាប់ឲ្យដឹងថា:មុនហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងរថយន្តបើកបរដោយជនមិនស្គាល់អត្តសញ្ញាណគឺបើកក្នុងទិសដៅពីត្បូងមកជើងគឺចេញពីផ្លូវមុខសាលាខេត្តត្បូងឃ្មុំតម្រង់ទិសមកកាន់ស្រុកក្រូចឆ្មារ ក្នុងគោលបំណងឆ្លងស្ពានកាត់ទន្លេមេគង្គពោះមកកាន់ត្រើយម្ខាងទៀតនៅស្រុកស្ទឹងត្រង់ខេត្តកំពង់ចាម។ តែដោយសារអ្នកបើកបរប្រើប្រាស់ល្បឿនលឿនក៏ជ្រុលទៅបុកពលរដ្ឋដែលឈប់រង់ចាំនៅឡើងជិះគោយន្តកែច្នៃដើម្បីចេញទៅចំការ។
សមត្ថកិច្ចមូលដ្ឋានបានបន្តឲ្យដឹងទៀតថាស្របពេលដែលពួកគាត់កំពុងតែរង់ចាំនោះពុំទាន់នឹងបានឡើងជិះរថយន្តផងក៏ត្រូវបានរថយន្តប្រភេទសណ្ដោងធុនធំមួយគ្រឿងរ៉េសង្កូតមកបុកយ៉ាងពេញទំហឹងជាហេតុបណ្ដាលឱ្យស្លាប់មនុស្សរហូតទៅដល់០៤នាក់។
ចំពោះករណីគ្រោះថ្នាក់ចរាចរណ៍ រវាងរថយន្តនិងម៉ូតូចំនួន០៥គ្រឿង
-រថយន្ដម៉ាក់ FREIGHTLINER ពណ៌ស ពាក់ផ្លាកលេខ កំពង់ចាម 3A-3639 សឺមីរ៉ឺម៉ក ពណ៌ស ពាក់ផ្លាកលេខ វៀតណាម 51R-508.19 មិនស្គាល់ឈ្មោះ និងអាសយដ្ឋានអ្នកបើកបរ (រត់គេចខ្លួនបាត់) ។
-បង្កជាមួយម៉ូតូចំនួន០៥គ្រឿង បណ្តាលឲ្យស្លាប់មនុស្សចំនួន០៤នាក់ និងរបួសមនុស្សចំនួន០១នាក់ កម្រិតធ្ងន់ មានឈ្មោះដូចខាងក្រោម៖
១.ឈ្មោះ ទ្រី កាក់ ភេទប្រុស អាយុ៣៦ឆ្នាំ នៅភូមិក្បាលបឹងសេះ ឃុំគរ ស្រុកត្បូងឃ្មុំ ខេត្តត្បូងឃ្មុំ (ស្លាប់)។
២.ឈ្មោះ ឡុន សុខលីន ភេទស្រី អាយុ២០ឆ្នាំ (ស្លាប់) ។
៣.ឈ្មោះ សុន អ៊ុង ភេទស្រី អាយុ ៣១ឆ្នាំ (ស្លាប់) ។
៤. ឈ្មោះ យ៉ន ធឿន ភេទស្រី អាយុ៤២ឆ្នាំ (ស្លាប់) ។
៥.ឈ្មោះង៉ា គឹមសេង ភេទស្រី អាយុ៣៨ឆ្នាំ (របួសធ្ងន់) ទាំង៥ននាក់នេះ រស់នៅភូមិឃុំជាមួយគ្នា។
-ទិសដៅ: រថយន្តបើកបរមកពីត្បូងទៅជើងប្រើប្រាស់ល្បឿន វ៉េចង្កូតទៅបុកម៉ូតូឈប់ និងមនុស្សកំពុងអង្គុយនៅចិញ្ចើមផ្លូវខាងកើត។
-មូលហេតុ: ប្រើប្រាស់ល្បឿន ។
-ខូចខាត: រថយន្ត០១គ្រឿង កម្រិតស្រាល ម៉ូតូចំនួន០៥គ្រឿង កម្រិតធ្ងន់ ។ ជនរងគ្រោះឈ្មោះ ង៉ា គឹមសេង បញ្ជូនទៅសង្គ្រោះនៅមន្ទីរពេទ្យមិត្តភាពកម្ពុជា-ចិនត្បូងឃ្មុំ ។ គិតរហូតមកដល់ម៉ោងជាងមួយរសៀលថ្ងៃទី០៩មករា
សមត្ថកិច្ចនៅមិនទាន់ស្រាវជ្រាវដឹងពីអត្តសញ្ញាណអ្នកបើកបររថយន្តនោះនៅឡើយទេ។ចំពោះវត្ថុតាងត្រូវបានកម្លាំងជំនាញនគរបាលចរាចរណ៍ស្រុកនាំមករក្សាទុកនៅអធិការដ្ឋាននគរបាលស្រុកត្បូងឃ្មុំដើម្បីរង់ចាំដោះស្រាយតាមនីតិវិធី។ គិតរហូតមកដល់ព្រឹកថ្ងៃទី ១០មករា អ្នកបើកបររថយន្តនៅតែមិនទាន់ស្គាល់អត្តសញ្ញាណនៅឡើយ៕ រក្សាសិទ្ធដោយ៖ភ្នំប្រុសភ្នំស្រី
