ភ្នំពេញ៖ សម្តេច នាយករដ្ឋមន្ត្រី បានប្រកាសប្រាប់ដល់ក្រសួងមហាផ្ទៃ ឲ្យពិនិត្យមើលលើទិដ្ឋភាពច្បាប់ ដែលមជ្ឈមណ្ឌលសិទ្ធិមនុស្ស កំពុងមានវត្តមាននៅកម្ពុជា ក្រោមការចង្អុលបង្ហាញរបស់បរទេស ដើម្បីឈានទៅបិទ មជ្ឈមណ្ឌលនេះជាស្ថាពរ។
ក្នុងកិច្ចសំណេះសំណាលជាមួយតំណាងកម្មករ កម្មការិនី នៅថ្ងៃអាទិត្យ ទី២៦ ខែវិច្ឆិកា ឆ្នាំ២០១៧នេះ សម្តេចតេជោ ហ៊ុន សែន បានមានប្រសាសន៍ថា មជ្ឈមណ្ឌលសិទ្ធិមនុស្សនៅភ្នំពេញត្រូវបិទចោល ព្រោះវាធ្វើតាមបរទេស ហើយក៏មិនមែនបង្កើតដោយខ្មែរខ្លួនឯងនោះទេ និងបានធ្វើតាមបង្គាប់របស់បរទេស។
សម្តេចតេជោ នាយករដ្ឋមន្ត្រី បានបញ្ជាក់ថា “ពូមិនទៅសុំបរទេស មកបង្គាប់ថា នែ វាឆ្ងាញ់បំផុតត្រង់ថា គេឲ្យខ្ញុំធ្វើនេះ គេឲ្យខ្ញុំធ្វើអីចេះ ហើយការពិតមជ្ឈមណ្ឌលសិទ្ធិមនុស្ស នៅទីក្រុងភ្នំពេញ ត្រូវតែបិទចោល ពីព្រោះវាបានធ្វើតាមបរទេស ហើយក្រសួងមហាផ្ទៃ គួរតែពិនិត្យមើល ការងារដែលមជ្ឈមណ្ឌលសិទ្ធិមនុស្ស កំពុងធ្វើការរាល់ថ្ងៃនេះ ។ មជ្ឈមណ្ឌលសិទ្ធិមនុស្ស បរទេសជាអ្នក ឲ្យមកបង្កើតនៅស្រុកខ្មែរ មិនមែនខ្មែរជាអ្នកបង្កើតទេ ។ មជ្ឈមណ្ឌលសិទ្ធិមនុស្ស បានប្រាប់មកខ្ញុំថា ឲ្យដកខ្លួនចេញ ពីនយោបាយមួយរយៈ ហើយគេឲ្យខ្ញុំ ទៅបង្កើតអង្គការក្រៅ រដ្ឋាភិបាល មានឈ្មោះថា “មជ្ឈមណ្ឌលសិទ្ធិមនុស្ស” ។ មជ្ឈមណ្ឌលសិទ្ធិមនុស្ស នេះ គឺបរទេសជាអ្នកឲ្យបង្កើត ហើយវាខុសរឿង ហើយបើសិនជាអង្គការក្រៅរដ្ឋាភិបាល មកបង្កើតដោយសុំច្បាប់កម្ពុជា មិនថាអីទេ ប៉ុន្តែនេះជនជាតិខ្មែរម្នាក់ ដែលត្រូវបានម្នាក់ មកបង្គាប់ឲ្យបង្កើត ហើយថាឲ្យធ្វើអីចេះធ្វើអីចុះ និងបានឲ្យផ្តួលរដ្ឋាភិបាលតាមរបៀបយូហ្គោស្លាវី និងស៊ែប៊ី ។ ប្រទេសកម្ពុជាមានច្បាប់ត្រឹមត្រូវ ហើយច្បាប់បានហាមឃាត់ការជាប់ពាក់ព័ន្ធជាមួយនឹងបរទេស បម្រើនយោបាយបរទេស “។
សម្តេចហ៊ុន សែន បានបញ្ជាក់ថា “យើងវ៉ៃកូនគេ ហើយកូនគេបានបម្រើដោយស្មោះត្រង់ជាមួយឪពុកគេ ចង់ឬមិនចង់ឪគេ បានការពារកូនគេហើយ កុំទៅឆ្ងល់ពេក ដូច្នេះបានជាចេះតែលូកលាន់ៗ ហើយខ្ញុំបានប្រាប់ទៅឪគេតែម្តងនៅម៉ាលីឡា”។
សូមបញ្ជាក់ថា មជ្ឈមណ្ឌលសិទ្ធិមនុស្ស ត្រូវបានបង្កើតឡើងដំបូង ដោយលោក កឹម សុខា នៅក្នុងខែវិច្ឆិកា ឆ្នាំ២០០២ ហើយបានលែងតំណែង ទើបលោកអ៊ូ វីរ មកធ្វើប្រធានជំនួសម្តង និងចុងក្រោយនេះ លោកស្រី ចក់ សុភាព ជាប្រធាន៕ ដោយ៖កូឡាប
