ខេត្តព្រះសីហនុ ៖ ប្រជាពលរដ្ឋមានលំនៅដ្ឋាន នៅជិតផ្ទះសំណាក់យីហោរលេខប្រាំបី(8) មានទីតាំងនៅជាប់មន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ចខេត្តព្រះសីហនុ ស្ថិតក្នុងសង្កាត់លេខ៣ ដែលគ្រប់គ្រងដោយជនជាតិចិន បានបង្កសំឡេងរំខានដល់ការរស់នៅរបស់ពួកគាត់ធ្ងន់ធ្ងរ។
ត្រង់ចំណុចនេះ ប្រជាពលរដ្ឋ បានសំណូមពរដល់អាជ្ញាធរមានសមត្ថកិច្ចស្ថាប័នពាក់ព័ន្ធ ឲ្យជួយចុះអន្តរាគន៍ដល់ពួកគាត់។
ការរំខានដោយសំឡេងលាន់ឮកងរំពងនោះ គឺកើតចេញពីការចាក់ធុងប៉ាស់ច្រៀងរាំតាំងពីព្រលប់ដល់ពេលយប់ជ្រៅ និងសំឡេងរំខានចេញពីម៉ាស៊ីនភ្លើង ដែលម្ចាស់ផ្ទះសំណាក់ខាងលើនេះបានយកមកដាក់នៅជាប់ជញ្ជាំងផ្ទះ របស់ពួកគាត់។
ផ្តើមពីបញ្ហានេះ ក្រុមប្រជាពលរដ្ឋ បានសំណូមពរថា ៖ ទី១- រាល់ការចាក់ធុងបាស ឬច្រៀងខារ៉ាអូខេ សូមកុំឲ្យបំពងសំឡេងចេញមកខាងក្រៅខ្លាំងៗពេក ជាពិសេសមិនគួរឲ្យមាន ក្នុងម៉ោងសម្រាកពេលយប់អាធ្រាត្រ ឬពេលសម្រាន្តយប់ជ្រៅពេកនោះទេ។ ទី២- ស្នើរសុំម្ចាស់ផ្ទះសំណាក់លេខប្រាំបី(៨) គ្រប់គ្រងដោយជនជាតិចិនខាងលើ ត្រូវរៀបចំរកទីតាំងដាក់ម៉ាស៊ីនភ្លើងឲ្យបានត្រឹមត្រូវ និងរកវិធីបន្ថយសំឡេងរំខាន ព្រោះសំឡេង ដែលលាន់ចេញពីម៉ាស៊ីនភ្លើងបានរំខានដល់ប្រជាពលរដ្ឋជាអ្នកជិតខាង។
បន្ថែមលើនេះ ប្រជាពលរដ្ឋ បានស្នើរឲ្យម្ចាស់ផ្ទះសំណាក់យីហោរ(៨)ខាងលើនេះ យកគំរូ តាម ផ្ទះសំណាក់ របស់ជនជាតិចិនមួយទៀតមានទីតាំងនៅក្បែរនោះ ដែលរស់នៅប្រកបអាជីវកម្ម ដោយគោរពសិទ្ធិអ្នកជិតខាងបានត្រឹមត្រូវ និងមានការទទួលខុសត្រូវខ្ពស់។
ប្រភពព័ត៌មានមួយបានឲ្យដឹងថា ផ្ទះសំណាក់(៨) ដែលគ្រប់គ្រងដោតជនជាតិចិនខាងលើនេះ បានបើកធ្វើអាជីវកម្ម ដោយមិនទាន់មានច្បាប់អនុញ្ញាតឲ្យបានត្រឹមត្រូវនៅឡើយទេ។
និយាយដល់ចំណុចនេះ ប្រជាពលរដ្ឋ ក៏ទទូចដល់អាជ្ញាធររដ្ឋបាលក្រុង-ខេត្តព្រះសីហនុ ជួយបញ្ជូនមន្ត្រីជំនាញចុះពិនិត្យការបើកធ្វើអាជីវកម្ម របស់ថៅកែផ្ទះសំណាក់(៨)គ្រប់គ្រង ដោយជនជាតិចិន មានទីតាំងតាមបណ្តោយផ្លូវចូលទៅវត្តក្រោម នៅខាងក្រោយវេទិកា៧មករា ជាប់របងមន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ចខេត្តព្រះសីហនុ ឲ្យបានឆាប់ផង៕ ដោយ៖ ដែន សីមា
