កណ្តាល ៖ នគរបាល ស្រុកស្អាង បានឲ្យដឹងថា គួរឲ្យសង្វេគណាស់ !!! លោកគ្រូបង្រៀនម្នាក់ ត្រូវរថយន្តបុកបណ្តាលឲ្យស្លាប់នៅនឹងកន្លែង ពេលកំពុងជិះម៉ូតូ ឯរថយន្តបង្ក បើករត់គេចបាត់ស្រមោល ដែលករណីគ្រោះថ្នាក់ដ៏រន្ធត់នេះ កើតហេតុនៅថ្ងៃចន្ទ ទី១៧ ខែកញ្ញា ឆ្នាំ២០១៨ វេលាម៉ោង២០និង២៥នាទី នៅចំណុចផ្លូវលេខ២១ ស្ថិតនៅភូមិព្រែកអុងប៉ាង ឃុំទឹកវិល ស្រុកស្អាង ខេត្តកណ្តាល ។
នគរបាលមូលដ្ឋាន បានបញ្ជាក់ថា ដោយមានរថយន្ត១គ្រឿង (មិនស្គាល់អត្តសញ្ញាណ) បានបើកបរក្នុងទិសដៅពីត្បូងទៅជើង លុះពេលធ្វើដំណើរមកដល់ចំណុចកើតហេតុខាងលើ ក៏បានបុកជាមួយម៉ូតូម៉ាក SUZUKI VIVA ពណ៌ខ្មៅ ពាក់ស្លាកលេខ កណ្ដាល1A-3051 បើកបរដោយឈ្មោះ មៃ ប៊ន ភេទប្រុស អាយុ ៤៨ឆ្នាំ មុខរបរជាគ្រូបង្រៀន មានទីលំនៅភូមិខ្ពបលើ ឃុំ ខ្ពប ស្រុកស្អាង ខេត្តកណ្តាល ដែលកំពុងធ្វើដំណើរបញ្ច្រាសទិគ្នា ពីជើងទៅត្បូង បណ្តាលឲ្យស្លាប់នៅនឹងកន្លែងកើតហេតុ ចំណែកអ្នកបើកបររថយន្តបានបើករថយន្តរត់គេចខ្លួនបាត់ ។ សាកសព សមត្ថកិច្ចបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។
នគរបាលបានសន្និដ្ឋានថា ករណីនេះបង្កឡើងដោយអ្នកបើករថយន្តប្រភេទទេសចរណ៍ បើកបរក្នុងល្បឿនលឿន(ត្រង់ចំណុចផ្លូវកោង) ខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់ចរាចរកើតឡើង បណ្តាលឲ្យអ្នកជិះម៉ូតូស្លាប់៕ ដោយ ៖ បញ្ញាស័ក្តិ
