សៀមរាប៖ លោកឧត្តមសេនីយ៍ត្រី ភឹង ចិន្តារ៉េត ស្នងការរងនគរបាលខេត្តសៀមរាប បានឲ្យដឹងថា កាលពីយប់ថ្ងៃទី១៨ ខែ ខែតុលា ឆ្នាំ២០១៨នេះ កងកម្លាំងនគរបាលផ្នែកព្រហ្មទណ្ឌ នៃអធិការដ្ឋាននគរបាលក្រុងសៀមរាប សហការជាមួយកម្លាំងនគរបាលការិយាល័យ ព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តសៀមរាប ឃាត់ខ្លួនជនសង្ស័យចំនួន៩នាក់ ក្នុងនោះមានស្រីម្នាក់ នៅចំណុចភូមិស្វាយដង្គំ សង្កាត់ស្វាយដង្គំ ក្រុងសៀមរាប ពាក់ព័ន្ធករណីផ្ទុះអាវុធចំនួន២គ្រាប់ កាលពីវេលាម៉ោង២៣ ថ្ងៃទី១៧ ខែតុលាឆ្នាំ២០១៨ នៅចំណុចភូមិភ្ញារជ័យ ក្នុងសង្កាត់ស្វាយដង្គុំ ខណៈពេលក្រោយពីមានហេតុការណ៍នេះ កម្លាំងសមត្ថកិច្ចបានធ្វើការស្រាវជ្រាវតាមចាប់ជនបង្ក ។
ជនសង្ស័យដែលឃាត់ខ្លួន រួមមាន : ១. ឈ្មោះ ពៅ វណ្ណៈ ហៅបារាំង ហៅកុត ភេទប្រុស ជាជនដៃដល់បាញ់បោះសេរី អាយុ២៦ឆ្នាំ , ២. ឈ្មោះ ហ៉ីង សុខផាន់ណា អាយុ២២ឆ្នាំ , ៣. ឈ្មោះ បេ គឹមសុង អាយុ១៨ , ៤. ឈ្មោះ វណ្ណ ដារ៉ា ភេទ ប្រុស អាយុ១៩ឆ្នាំ , ៥. ឈ្មោះ ម៉ាន់ គឹមរី ភេទប្រុស អាយុ ៣០ឆ្នាំ , ៦. ឈ្មោះខា ប៉ក់ ភេទប្រុស អាយុ២៧ឆ្នាំ , ៧. ឈ្មោះ ម៉ាត់ សាលី ភេទប្រុស អាយុ៣៤ឆ្នាំ , ៨. ឈ្មោះ ស្រី ណារី ភេទស្រី អាយុ ២១ឆ្នាំ និង ៩. ឈ្មោះ ព្រហ្ម គីរីរតន:សម្បត្តិ ភេទប្រុស អាយុ២៥ឆ្នាំ ដែលជនសង្ស័យទាំងនេះ រស់នៅក្រុងសៀមរាប ។
លោក ភឹង ចិន្តារ៉េត មានប្រសាសន៍ទៀតថា បន្ទាប់ពីចាប់ឃាត់ខ្លួនជនសង្ស័យ និងបក្ខពួក កម្លាំងសមត្ថកិច្ចបានធ្វើការដកហូតនូវវត្ថុតាងមួយចំនួន រួមមាន : រថយន្តម៉ាកកាមរីបាឡែន ចំនួន០១គ្រឿង , ម៉ូតូចំនួន០៣គ្រឿង , កាំភ្លើងអាកា ៤៧ មួយដើម បង់ដាក់គ្រាប់ចំនួន០១ , គ្រាប់កាំភ្លើងចំនួន ១១គ្រាប់ , ម្សៅក្រាមពណ៌សថ្លា ចំនួន៥កញ្ចប់ធំ និង២៣ កញ្ចប់តូច , ដាវ , កាំបិត និងបំពង់ទីប ធ្វើដែកជាច្រើនដើម និង ទូរស័ព្ទចំនួន ១១ គ្រឿង ហើយជនទាំង០៩នាក់នេះ នឹងត្រូវបញ្ជូនទៅតុលាការខេត្តនៅថ្ងៃទី២០ ខែតុលា ឆ្នាំ២០១៨ នេះ ដើម្បីចាត់ការតាមច្បាប់ ។
ដោយឡែកក្នុងចំណោមជនសង្ស័យខាងលើ មានជនសង្ស័យម្នាក់ឈ្មោះពៅ វណ្ណៈ ហៅ បារាំង ហៅកុត ភេទប្រុសអាយុ២៦ឆ្នាំ រស់នៅភូមិតាភុល សង្កាត់ស្វាយដង្គុំ ក្រុងខេត្តសៀមរាប កាលពីចន្លោះវេលាម៉ោង១០ ទៅ ម៉ោង១១យប់ ថ្ងៃទី១៧ ខែតុលា ឆ្នាំ២០១៨ បានធ្វើសកម្មភាពយកកាំភ្លើងខាងលើ បាញ់ឡើងលើចំនួន២គ្រាប់ នៅចំណុចខាងមុខផ្ទះរបស់ឈ្មោះត្រា (មិនស្គាល់ត្រកូល) ភេទប្រុសអាយុ ២២ឆ្នាំ រស់នៅភូមិភ្ញាជ័យ សង្កាត់ស្វាយដង្គំ និងការស្រាវជ្រាវបន្តឃើញជននេះកន្លងមក មានដីកាបង្គាប់ឲ្យចាប់ខ្លួន របស់សាលាដំបូងខេត្តសៀម រាបចំនួន៣ដីកាផងដែរ ពាក់ព័ន្ធនឹងគ្រឿងញៀន។ លោកភឹង ចិន្តារ៉េត បានឲ្យដឹងទៀតថា ករណីនេះយើងកំពុងស៊ើបអង្កេតបន្ត ហើយកសាងសំណុំរឿងបញ្ជូន ទៅសាសាដំបូងចាត់តាមនីតិវិធីច្បាប់៕ ដោយ៖បញ្ញាស័ក្តិ
