ស្ត្រីថៃម្នាក់បានមានការស្លុតរន្ធត់យ៉ាងខ្លាំង ខណៈនាងបានរកឃើញឃើញពស់វែក១ក្បាល កំពុងសម្ងំលាក់ខ្លួនពួនអាត្មានៅខាងក្នុងភួយ នៅក្នុងបន្ទប់គេងរបស់នាងបែបនេះ ។
បើតាមសារព័ត៌មាន Love Pattaya បានចុះផ្សាយឲ្យដឹងថា ក្រុមសង្គ្រោះនៅក្នុងខេត្ត Saraburi កាលពីព្រឹកម្សិលមិញនេះ បានទទួលការហៅទូរស័ព្ទ ពីស្ត្រីម្នាក់ឈ្មោះ Suthamat Sangsai អាយុ ២២ ឆ្នាំ ដែលជាម្ចាស់ផ្ទះឈើ២ជាន់ ។ នាង Suthamat បានប្រាប់ក្រុមសង្គ្រោះថា ខណៈនាងកំពុងដេកនៅលើគ្រែ, លេងទូរស័ព្ទ និងគិតគូរអំពីរឿងរកស៊ីផ្ទាល់ខ្លួន នៅពេលនោះ នាងក៏បានលឺសត្វឆ្កែរបស់នាងព្រួសខ្លាំងៗដ៏ចម្លែក នៅខាងក្រៅផ្ទះ ។
ទោះយ៉ាងណា នាងពុំចាប់អារម្មណ៍រឿងនេះ រហូតដល់មិត្តភក្តិម្នាក់របស់នាងបានស្ទុះចូលក្នុងបន្ទប់ ហើយចាប់ផ្តើមវែករកអ្វីៗដែលគួរឲ្យសង្ស័យ ។ នៅពេលនាងតាមដានមើលអ្វីដែលសត្វឆ្កែរបស់នាងកំពុងព្រួស ទីបំផុត នាងបានឃើញពស់វែក១ក្បាលកំពុងរមូរនៅក្នុងភួយតែម្តង ។ ភ្លាមៗនោះ Suthamat បានរត់ចេញពីបន្ទប់ ដើម្បីប្រាប់ឪពុកម្តាយរបស់នាង ដែលបន្ទាប់មក បានទូរស័ព្ទទៅកាន់ក្រុមសង្គ្រោះជាបន្ទាន់ ។
ក្រុមសង្គ្រោះបានចំណាយពេលជាង ១០ នាទីដើម្បីចាប់ពស់វែកនេះយកចេញពីផ្ទះរបស់នាង និងបន្ទាប់មក ពួកគេក៏បាននាំយកវាទៅព្រលែងនៅធម្មជាតិរបស់វាវិញផងដែរ ។
បន្ទាប់ពីហេតុការណ៍នេះ ក្រុមសង្គ្រោះបានចេញសារព្រមាននៅលើបណ្តាញសង្គមថា៖ «សូមបងប្អូនទាំងអស់ បង្កើនការប្រុងប្រយ័ត្នខ្ពស់នៅក្នុងផ្ទះ នៅក្នុងអំឡុង «រដូវរងារ» នេះ ។ ព្រោះថា សត្វល្មូនជាច្រើន នឹងអាចចូលទៅសម្ងំរកភាពកក់ក្តៅរបស់ពួកវា ខណៈអាកាសធាតុចុះត្រជាក់នៅក្នុងរដូវនេះ ៕ ដោយ៖ ឧត្តម (ប្រភព៖ pattayaone.news)
