កាលពីព្រឹកមិញនេះ (២១ វិច្ឆិកា) សមាជិកម្នាក់របស់ក្រុមកីឡាករទូកង សែនសិរីមានជ័យ មកពីខេត្តកំពង់ធំ បានរើសបានកាបូបលុយរបស់មន្ត្រីកងរាជអាវុធហត្ថម្នាក់ ប៉ុន្តែ ពួកគាត់ពុំបានសមគំនិតគ្នាស៊ីដាច់នោះទេ និងផ្ទុយទៅវិញ ពួកគាត់ប្រញាប់ប្រញាល់ពឹងពាក់ហ្វេសប៊ុក ដើម្បីប្រកាសរកម្ចាស់កាបូបនេះដែលមានឈ្មោះ ទី ស៊ីដេ ។
យោងតាមគណនីហ្វេសប៊ុកឈ្មោះ Ly Vet បានបង្ហោះរូបភាព និងសរសេរប្រកាសស្វែងរកម្ចាស់កាបូបថា៖ «ក្រុមកីឡាកទូកង សែនសិរីមានជ័យ មកពីខេត្តកំពង់ធំ រើសបានកាបូបលុយ របស់មន្ត្រីកងរាជអាវុធហត្ថ ឈ្មោះ ទី ស៊ីដេ បើបងប្អូនណាបានស្គាល់ ឈ្មោះនេះសូមជួយប្រាប់ដល់សាមីខ្លួនផង សូមទាក់ទងតាមទូរស័ព្ទរបស់ខ្ញុំលេខ ០១៧ ២៩១ ៨៩០ ដែលកំពុងស្នាក់នៅវិទ្យាល័យសម្តេច ជា ស៊ីម ជ្រោយចង្វារ កុំបីខាន សូមអរគុណ ។»
យើងពុំដឹងថា នៅក្នុងកាបូបនោះមានប្រាក់ចំនួនប៉ុន្មាននោះទេ ប៉ុន្តែ គ្រាន់តែឃើញតាមរយៈរូបភាពបង្ហោះមានដូចជា៖ រូបថត 4×6 ៤សន្លឹក, អត្តសញ្ញាណប័ណ្ណ១សន្លឹក និងកាតសំគាល់ខ្លួនការងារ២សន្លឹក ។
យើងពិតជាជួយត្រេកអរជំនួសជាខ្លាំង ដែលការប្រកាសស្វែងរកនេះបានរីករាលដាលយ៉ាងលឿន ហើយម្ចាស់កាបូបនោះ ក៏បានដឹងផងដែរ ។ តាមរយៈខមិន ម្ចាស់កាបូបដែលមានគណនីហ្វេសប៊ុកឈ្មោះ Ty Syde បានថ្លែងអំណរគុណដល់បងប្រុស លី វ៉េត យ៉ាងជ្រាលជ្រៅ ដែលបានជួយបង្ហោះដំណឹងនៃការបាត់កាបូបរបស់គាត់ ៕
ដោយ៖ ឧត្តម
