ភ្នំពេញ ៖ រថយន្ត៣គ្រឿង បានរងការខូតខាតយ៉ាងដំណំ ដោយសារតែដើមឈើធំមួយ ទំហំ២ឱប បានដួលរលំកាត់ទទឹងមហាវិថីព្រះនរោត្តម សង្កត់ពីលើ កាលពីម៉ោង៣រសៀល ថ្ងៃទី២៦ខែវិច្ឆិកា ឆ្នាំ២០១៨ នៅចំណុចស្តុបមុខក្រសួងអប់រំ យុវជននិងកីឡា។
មន្ត្រីនគរបាលចរាចរណ៍ ប្រចាំចំណុចស្តុបនោះ បាននិយាយថា គ្រោះថ្នាក់នេះបណ្តាលមកពីមានភ្លៀងធ្លាក់ ជោកជាំតាំងពីយប់ ធ្វើឲ្យដីសើមគល់ដើមឈើ ទើបបណ្តាលឲ្យដើមឈើនេះដួលតែម្តង ហើយម្យ៉ាងទៀត ដើមឈើមួយដើមនេះ អាយុចាស់ហើយ និងមិនមានឫសមាំទាំសម្រាប់ទ្រវាបានទេ ។ សមត្ថកិច្ចនគរបាល បានបន្ថែមថា ក្នុងហេតុការណ៍នេះ មិនមានអ្នករងរបួសនោះទេ ដោយសារតែពេលរលំ មែកឈើបានសង្កត់តែលើរថយន្តប៉ុណ្ណោះ។ នៅពេលនេះ សមត្ថកិច្ចកំពុងទំនាក់ទំនង ខាងសាធារណការរាជធានី ដើម្បីមកកាត់ដើមឈើចេញ កុំកកស្ទះចរាចរណ៍ ព្រោះដើមឈើដួលកាត់ទទឹងពេញផ្លូវតែម្តង មិនអាចធ្វើចរាចរណ៍បានទេ ហើយអ្នកដែលធ្វើចរាចរណ៍តាមផ្លូវព្រះនរោត្តម មកចំណុចស្តុបមុខក្រសួងអប់រំ សូមមេត្តាធ្វើដំណើរទៅផ្លូវផ្សេង៕ ដោយ ៖ កូឡាប
