សៀមរាប ៖ ជនសង្ស័យម្នាក់ ត្រូវបាននគរបាលក្រុងសៀមរាប ធ្វើការឃាត់ខ្លួន បន្ទាប់ពីធ្វើសកម្មភាពលួច រំលងបានពីរថ្ងៃ ហើយត្រូវបាននគរបាលក្រុងសៀមរាប កសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់។ ចំណែកបក្ខពួកជនសង្ស័យម្នាក់ទៀតរត់គេចខ្លួន នគរបាលកំពុង ស្នើសុំសាលដីកាពីតុលាការ ដើម្បីស្វែងរកចាប់ខ្លួន។
នគរបាលព្រហ្មទណ្ឌ នៃអធិការដ្ឋាននគរបាល ក្រុងសៀមរាប នៅថ្ងៃទី៥ខែធ្នូ បានឲ្យដឹងថា កាលថ្ងៃទី៣ ខែធ្នូ ឆ្នាំ ២០១៨ វេលាម៉ោង១៧ បន្ទាប់ពីទទួលពាក្យបណ្ដឹងពី ឈ្មោះ ម៉ហ្កេន ចន ភេទ ជនជាតិ អាមេរិក ជាជនរងគ្រោះ កម្លាំងនគរបាលប៉ុស្តិ៍រដ្ឋបាលសង្កាត់គោកចក និងកម្លាំងផ្នែកព្រហ្មទណ្ឌ ដឹកនាំដោយលោក វរសេនីយ៍ឯកទេព ចាន់ណា អធិការនៃអធិការដ្ឋាននគរបាលក្រុងសៀមរាប បានចុះទៅពិនិត្យកន្លែងកើតហេតុ បើកការស៊ើបអង្កេត ឈានការកំណត់កំណត់អត្តសញ្ញាណជនសង្ស័យ និង ធ្វើការនាំខ្លួនជនសង្ស័យចំនួនម្នាក់ ឈ្មោះ ជុន តុលា ភេទប្រុស អាយុ ១៦ឆ្នាំ មុខរបរគ្នាន រស់នៅភូមិ នគរក្រៅ សង្កាត់គោកចក នាំមកធ្វើការសាកសួរ។
ក្រោយពីការសាកសួរជនសង្សយ័បានសារភាពថា កាលពីថ្ងៃទី១ ខែធ្នូ ឆ្នាំ២០១៨ វេលាម៉ោង ១៧ ស្ថិតនៅភូមិនគរក្រៅ សង្កាត់គោកចកក្រុង/ខេត្ត សៀមរាបខ្លួន បានធ្វើសកម្មភាពលួច ជាមួយបក្សពួកម្នាក់ទៀត ឈ្មោះ គឿន កយ ភេទ ប្រុស អាយុ ១៨ឆ្នាំ(រត់គេចខ្លួនបាត់)បានឡើង ចូលក្នុងផ្ទះ របស់ជនរងគ្រោះ ឈ្មោះ ម៉ហ្កេន ចន ភេទ ជាជនជាតិ អាមេរិក ហើយធ្វើសកម្មភាព លួចបានសម្ភារៈមួយចំនួននិងលុយ យកមកចែកគ្នា។
យោងតាមចម្លើយសារភាពរបស់ជនសង្ស័យ និងវត្ថុតាងដែលដកហូតបាន ជនសង្ស័យត្រូវបាននគរបាលផ្នែកព្រហ្មទណ្ឌ នៃអធិការដ្ឋាននគរបាលក្រុងសៀមរាប កសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់។ ចំណែកបក្ខពួកជនសង្ស័យម្នាក់ទៀតរត់គេចខ្លួន នគរបាលយើងកំពុង ស្នើសុំសាលដីកាពីតុលាការ ដើម្បីស្វែងរកចាប់ខ្លួនយកមកផ្តន្ទាទោសតាមផ្លូវច្បាប់៕ ដោយ ៖ បញ្ញាស័ក្តិ
