ភ្នំពេញ ៖ អង្កភាពប្រឆាំងអំពើពុករលួយ បានបើកយុទ្ធនាការអភិបាលកិច្ចល្អ ជាគ្រឹះនៃការប្រយុទ្ធប្រឆាំងអំពើពុករលួយ ក្នុងគោលបំណង ផ្សព្វផ្សាយ និងបញ្ជ្រាបការយល់ដឹងពីទិវាអន្តរជាតិ ទិវាជាតិប្រយុទ្ធប្រឆាំងអំពើពុករលួយ និងផលវិបាននៃអំពើពុករលួយ សំដៅបំផុសចលនាមហាជនគ្រប់មជ្ឈដ្ឋាន ជាពិសេស ក្នុងស្រទាប់យុវជនឲ្យយល់ដឹង និងចូលរួមប្រយុទ្ធប្រឆាំងអំពើពុករលួយ។
បើតាមសេចក្តីប្រកាសរបស់អង្កភាពប្រឆាំងអំពើពុករលួយ ក្នុងឱកាសអបអរសាទរទិវាអន្តរជាតិ ទិវាជាតិប្រយុទ្ធប្រឆាំងអំពើពុករលួយ ៩ធ្នូ ក្រោមប្រធានបទ អភិបាលកិច្ចល្អ ជាគ្រឹះនៃការប្រយុទ្ធប្រឆាំងអំពើពុករលួយ ។ ក្រុមការងារអង្កភាពប្រឆាំងអំពើពុករលួយ ចំនួន៨ក្រុម បានចុះផ្សព្វផ្សាយអំពីទិវានេះ ផ្សារភ្ជាប់នឹងការផ្សព្វផ្សាយ អំពីលិខិតបទដ្ឋានគតិយុត្តិ និងបេសកកម្មការងារ ពាក់ព័ន្ធនឹងការប្រឆាំងអំពើពុករលួយ នៅតាមគោលដៅចំនួន៣៧ នៅរាជធានីភ្នំពេញ ខេត្តចំនួន៨ រួមមាន រាជធានីភ្នំពេញ ខេត្តកំពង់ចាម កំពត បាត់ដំបង សៀមរាប ក្រចេះ និងស្ទឹងត្រែង ចាប់ពីផ្តើមពីថ្ងៃទី៣០វិច្ឆិកា រហូតដល់ថ្ងៃទី៨ខែធ្នូ ឆ្នាំ២០១៨ ដោយមានការចូលរួមពីសំណាក់មន្ត្រី រាជការ ប្រជាពលរដ្ឋមូលដ្ឋាន គណៈគ្រប់គ្រងសាលា សាកលវិទ្យាល័យ លោកគ្រូ អ្នកគ្រូ និងសិស្សានុសិស្សសរុបជាង១៥.០០០នាក់។
អង្កភាពប្រឆាំងអំពើពុករលួយ បានប្រកាសថា យុទ្ធនាការនេះធ្វើឡើង ក្នុងគោលបំណង ផ្សព្វផ្សាយ និងបញ្ជ្រាបការយល់ដឹងពីទិវាអន្តរជាតិ ទិវាជាតិប្រយុទ្ធប្រឆាំងអំពើពុករលួយ និងផលវិបាននៃអំពើពុករលួយ សំដៅបំផុសចលនាមហាជនគ្រប់មជ្ឈដ្ឋាន ជាពិសេស ក្នុងស្រទាប់យុវជនឲ្យយល់ដឹង និងចូលរួមប្រយុទ្ធប្រឆាំងអំពើពុករលួយក្នុងរូបភាពផ្សេងៗ ស្របតាមគោលបំណងមានចែងក្នុងអនុក្រឹត្យលេខ១៥០ អនក្រ.បក ចុះថ្ងៃទី៦ខែធ្នូឆ្នាំ២០១០ ស្តីពីទិវាជាតិប្រយុទ្ធប្រឆាំងអំពើពុករលួយ ៩ធ្នូ របស់រាជរដ្ឋាភិបាលកម្ពុជា៕ ដោយ ៖ កូឡាប
