ភ្នំពេញ ៖ ស្ត្រីស្រស់ស្អាតម្នាក់ស្រវឹងស្រាជោកជាំ បានបើករថយន្តឡង់គ្រីស៊័រស៊េរីទំនើប ទៅបុកគូទរថយន្តប្រមូលសំរាម ពីក្រោយ បណ្ដាលឲ្យរថយន្តបង្ករងការខូចខាតយ៉ាងដំណំ និងអ្នកប្រមូលសំរាមម្នាក់រងរបួសធ្ងន់ នៅ តាមបណ្ដោយផ្លូវជាតិលេខ៥ ស្ថិតនៅក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ នាវេលាម៉ោង១យប់ ថ្ងៃទី១៣ ខែធ្នូ ឆ្នាំ២០១៨។
មុនពេលកើតហេតុគេឃើញរថយន្តស៊េរីទំនើបមួយគ្រឿង ម៉ាក Land Cruiser ពណ៌ស ពាក់ស្លាកលេខភ្នំពេញ 2AV-9595 ដែលបើកបរដោយស្ត្រីម្នាក់ស្រវឹងស្រាជោកជាំ ធ្វើដំណើរតាមបណ្ដោយផ្លូវជាតិលេខ៥ លុះមកដល់ចំណុចជិតស្ថានីយប្រេងសូគីមិច បុកគូទរថយន្តស៊ិនទ្រី ដែលកំពុងឈប់ប្រមូលសំរាម ចំហៀងខាងស្ដាំបណ្ដាយឲ្យបុគ្គលិកស៊ិនទ្រីម្នាក់ បានបោកផ្ទប់ទៅនឹងរថយន្តយរងរបួសធ្ងន់។ ចំណែកឯរថយន្តបង្កវិញបានក្រឡាប់ជាច្រើនត្រឡប់ផ្ងារជើង ផ្ទុះពោងរងការខូចខាតរថយន្តផ្នែកខាងមុខ តែសំណាងល្អអ្នកបើកបរមិនរងរបួស៕ ដោយ ៖ បញ្ញាស័ក្តិ
