ភ្នំពេញ ៖ ប្រជាពលរដ្ឋរស់នៅលើដីឯកជនរបស់រដ្ឋនៅភូមិ៩និងភូមិ១៦ ក្នុងសង្កាត់ទន្លេបាសាក់ ខណ្ឌចំការមនចំនួន៦២២គ្រួសារ បានទទួលវិញ្ញាបនបត្រសំគាល់អចលនទ្រព្យ (ប្លង់រឹង) ពីរដ្ឋបាលរាជធានីភ្នំពេញ ដោយចាប់ផ្តើមប្រគល់ជូនចាប់ពីថ្ងៃទី១៣រហូតដល់ថ្ងៃទី២០ធ្នូ នៅក្នុងបរិវេណទីតាំងខារ៉ាអូខេសូល ។
ពិធីនេះបានធ្វើឡើងនៅរសៀលថ្ងៃទី១៣ធ្នូ ឆ្នាំ២០១៧ នៅក្នុងបរិវេណទីតាំងខារ៉ាអូខេសូល ស្ថិតក្នុងសង្កាត់ទន្លេបាសាក់ ខណ្ឌចំការមន ក្រោមអធិបតីភាព លោកឃួង ស្រេង អភិបាលរាជធានីភ្នំពេញ។
លោកខាត់ ណារិទ្ធ ចៅសង្កាត់ទន្លេបាសាក់បានលើកឡើងថា ក្នុងនាមតំណាងអោយប្រជាពលរដ្ឋ រស់នៅលើដីក្នុងតំបន់វិនិច្ឆ័យរបស់រដ្ឋនៅមុខក្រសួងកសិកម្មរុក្ខាប្រមាញ់និងនេសាទ ពិតជារីករាយណាស់ដែលរដ្ឋបាលរាជធានី ចែកវិញ្ញាបនបត្រសំគាល់អចលនវត្តនេះ ក្រោយពីពួកគាត់បានរងចាំជាយូមកហើយ បន្ទាប់ពីបានស្នើសុំទៅថ្នាក់ខណ្ឌ រាជធានីភ្នំពេញ រហូតដល់ មានការសម្រេចពីសម្តេចតេជោ ហ៊ុន សែន ប្រគល់ជូនដីនេះអោយមកប្រជាពលរដ្ឋយើង ហើយត្រូវបានប្រជាជនកន្លងមកនេះបានប្តេជ្ញាចិត្តគាំទ្រគោលនយោបាយរបស់សម្តេចតេជោ ។សម្រាប់ការប្រគល់វិញ្ញាបនបត្រសំគាល់អចលនវត្ត ពីរដ្ឋបាលរាជធានីភ្នំពេញនេះ យើងនឹងចាប់ផ្តើមប្រគល់ជូនចាប់ពីថ្ងៃទី១៣រហូតដល់ថ្ងៃទី២០ធ្នូ នៅក្នុងបរិវេណទីតាំងការ៉ាអូខេសូល ។
លោក សារិន វណ្ណា ប្រធាន មន្ទីររៀបចំដែនដីនគរូបនីយកម្ម សំណង់ និងសុរិយោដី រាជធានីភ្នំពេញ បានថ្លែងថា ការចុះបញ្ជីដីធ្លីមានលក្ខណៈជាប្រព័ន្ធ ជាវិធីសាស្ត្រមួយ ដែលយើងអាចធ្វើការចុះបញ្ជីដីធ្លី បានយ៉ាងច្បាស់មានប្រសិទ្ធិភាព មានតម្លាភាព និងធានាបាននូវភាពកក់ក្តៅ ជូនបងប្អូនប្រជាពលរដ្ឋ ក្នុងការកាន់កាបដីធ្លី និងធានាសុវត្ថិភាពដីធ្លី ។ ការគ្របគ្រងដីធ្លីបានល្អ ជាមូលដ្ឋានអោយរដ្ឋ គិតគូរប្រមូលចំណូលចូលថវិកាជាតិ និងផ្តល់លក្ខណៈងាយស្រួល ដល់ការជំរុញកិច្ចវិនិយោគ លើកស្ទួយសេដ្ឋកិច្ចជាតិ ។ ម្យ៉ាងទៀត គឺជាការរួមចំណែកយ៉ាងពិតប្រាកដ ក្នុងការអនុវត្តនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រ ការអភិវឌ្ឍន៍សង្គមប្រកបដោយចីរភាព ។
លោក សារិន វណ្ណា បានបន្តថា កម្មវិធីអនុវិស័យដីធ្លី រាជធានីភ្នំពេញ បានសម្រេចផ្តល់ប័ណ្ណកម្មសិទ្ឋិ ជូនប្រជាពលរដ្ឋ នៅភូមិ៩ និងភូមិ១៦ សង្កាត់ទន្លេបាសាក់ ចំនួន ៦២២ប័ណ្ណ ។ ការប្រគល់ជូននេះ រាជរដ្ឋាភិបាលបានប្រគល់ជូនបងប្អូនប្រជាពលរដ្ឋប្រមាណជិត២ម៉ឺនគ្រួសារ ឬបណ្ណស្មើនឹងដីប្រមាណជស៨០ហិចតា ។
យើងបានប្រទានកម្មដីឯកជនរបស់រដ្ឋនេះប្រគល់ជូនប្រជាពលរដ្ឋ រហូត១៦កន្លែង ដើម្បីកាត់បន្ថយភាពក្រីក្រនិងទំនាស់ដីធ្លី បងប្អូនមានកម្មសិទ្ធិ គឺដីឡើងថ្លៃ មានតម្លៃ។ តំបន់ទាំងមូលបានចុះបញ្ជីហើយ តែក៏មានដីខ្លះក៏មិនទាន់បានចុះបញ្ជីដី បើមិនទាន់ត្រូវទៅចុះបញ្ជីនៅមន្ទីរសុរិយោដីរាជធានី។
លោកឃួង ស្រេង អភិបាលរាជធានីភ្នំពេញ បានមានប្រសាសន៍ថា សម្តេចតេជោ ហ៊ុន សែនធ្នាប់បានមានប្រសាសន៍ហើយថា ដីនេះជាដីរបស់យើង ប្រគល់ជូនពួកគាត់ទៅ មានជម្រកគឺមានភាពនឹងនក្នុងចិត្ត។ លោកថា អ្នកក្រនៅស្រុកស្រែនិងអ្នកក្រនៅភ្នំពេញខុសគ្នា បើអ្នកក្រនៅភ្នំពេញគឺគ្មានអ្វីសោះ រស់នៅចំណីសាធារណៈរបស់រដ្ឋ បើនៅស្រែក្រមែនតែមានដី មានស្រែមានផ្ទះស្នាក់នៅ។
លោកបន្តថា កន្លងមកនេះលោកទទួលស្គាល់ថា មានមន្ត្រីរបស់លោកមួយដូចជាប៉ូលីសចរាចរនិងអាជ្ញាធរមូលដ្ឋានមួយចំនួនណានោះ មានសំដីមិនល្អជាមួយប្រជាពលរដ្ឋ កត្តាទាំងអស់នេះ ក៏ព្រោះតែពួកគាត់បំរើការងារហត់ពេក។ប៉ុន្តែទោះបីជាយ៉ាងណាក្តីលោកនឹងធ្វើការកែទម្រង់ បញ្ហានេះអោយបានល្អប្រសើរឡើង ធ្វើយ៉ាងណាអោយមន្ត្រីរបស់យើង ស្មោះត្រង់ជាមួយប្រជាពលរដ្ឋដែលអាចអោយពួកគាត់ទទួលស្គាល់ថាយើងល្អ ហើយបោះឆ្នោតជូនគណបក្សប្រជាជនបន្តទៀត។
លោកបន្តថា ការផ្តល់ជូននូវវិញ្ញាបនបត្រសំគាល់អចលនវត្ត ពីរដ្ឋបាលរាជធានីភ្នំពេញនេះជាកាដូដ៏ធំធេងណាស់ដែលសម្តេចតេជោផ្តល់ជូនបងប្អូនប្រជាពលរដ្ឋ យើង សម្តេចតេជោតែងគិតគូរជានិច្ចពីសុខទុក្ខនិងការលំបាករបស់ប្រជាពលរដ្ឋ ដោយមិនអោយមានប្រជាពលរដ្ឋណាម្នាក់ស្លាប់ដោយការអត់បាយនោះទេ៕ ដោយ៖កូឡាប