ខេត្តតាកែវ ៖ នគរបាលស្រុកគិរីវង់ បានបង្ក្រាបទីតាំងដាំដំណាំកញ្ឆាខុសច្បាប់ ចំនួន១៥ទីតាំង និងបានដកបំផ្លាញចោលនូវដើមកញ្ឆាចំនួន៦.៣២១ដើម និងអាងប្រស់ទឹកចំនួន១៥អាង ហើយកំពុងស្រាវជ្រាវស្វែងរកម្ចាស់អ្នកដាំដំណាំកញ្ឆាដើម្បីយកមកផ្តន្ទាទោសតាមច្បាប់។
បើតាមនគរបាលខេត្តតាកែវ បានឲ្យដឹងថា ក្រោមការយកចិត្តទុកដាក់ចំពោះបញ្ហាដំណាំកញ្ឆាខុសច្បាប់នៅស្រុកគិរីវង់ ពីសំណាក់លោក ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ នៅថ្ងៃសៅរិ៍ ទី១៦ ខែធ្នូ ឆ្នាំ២០១៧ វេលាម៉ោង៦ព្រឹក។ កម្លាំងអធិការដ្ឋាននគរបាលស្រុក ដឹកនាំដោយលោកវរសេនីយ៍ឯក យុគ សារ៉ាត់ អធិការនគរបាលស្រុកគិរីវង់ បានដឹកនាំកម្លាំងឡើងល្បាតត្រួតពិនិត្យទីតាំងដាំដំណាំកញ្ឆាខុសច្បាប់នៅចំណុចដុបដាថ្លាត់ ស្ថិតនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ហើយក៏បានប្រទះឃើញទីតាំងដែលជនល្មើសលួចទន្ទ្រានដីភ្នំដាំដំណាំកញ្ឆាចំនួន១៥ទីតាំង និងបានដកបំផ្លាញចោលនូវដើមកញ្ឆាចំនួន៦.៣២១ដើម និងអាងប្រស់ទឹកចំនួន១៥អាង ។ បច្ចុប្បន្នកម្លាំងជំនាញ់កំពុងស្រាវជ្រាវស្វែងរកម្ចាស់អ្នកដាំដំណាំកញ្ឆាដើម្បីយកមកផ្តន្ទាទោសតាមច្បាប់៕ ដោយ ៖ បញ្ញាស័ក្តិ