ខេត្តស្វាយរៀង ៖ លោក ម៉ែន វិបុល ប្រធានគណៈកម្មាធិការសាខា សមាជិកគណៈកម្មាធិការសាខា ក្រុមប្រតិបត្តិសាខា តំណាងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែនការសកម្មភាពរួមអគ្គលេខាធិការអង្គការ សហប្រជាជាតិដើម្បីសុខភាពស្ត្រី និងកុមារ នាថ្ងៃព្រហស្បតិ៍ ២រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី ២១ ខែកុម្ភៈ ឆ្នាំ ២០១៩នេះ បាននាំយកអំណោយមនុស្សធម៌របស់សាខា ចុះសួរសុខទុក្ខស្ត្រីទើបសម្រាលកូន ចំនួន ២៤ នាក់ នៅមន្ទីរពេទ្យបង្អែកខេត្តស្វាយរៀង ។
សកម្មភាពមនុស្សធម៌នាព្រឹកនេះមានគោលបំណងលើកកម្ពស់សុខភាពមាតា ទារក និងកុមារ ដើម្បីឈានទៅសម្រេចគោលដៅសកលថ្មី ដែលរាជរដ្ឋាភិបាលកម្ពុជា បានប្តេជ្ញានឹងធ្វើឲ្យបានគឺគោលដៅប្រកបដោយចីរភាពឆ្នាំ ២០៣០ ។
ក្នុងឱកាសនោះដែរ លោកប្រធាន បាននាំមកនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋងាយរងគ្រោះ និងរងគ្រោះដោយសារគ្រោះមហន្តរាយផ្សេងៗ ពិសេសស្ត្រី និងកុមារ ដោយមិនប្រកាន់វណ្ណៈ ពូជសាសន៍ ពណ៌សម្បុរឬនិន្នាការនយោបាយអ្វីឡើយ ។
អំណោយដែលបានផ្តល់សម្រាប់ម្តាយ ២៤ នាក់ ក្នុងម្នាក់ទទួលបាន ៖ ឃីតមួយកញ្ចប់ (ភួយ ១ ក្រមា ១ សារុង ១) ទឹកដោះគោខាប់ ៥ កំប៉ុង ស្ករស ២ គ.ក្រ ថវិកា ៥០,០០០ រៀល និងសម្រាប់ទារក កន្សែងធំ ១ កន្សែងតូច ១ មុងទារក ១ សាប៊ូកូនក្មេង ១ ដប ម្សៅកូនក្មេង ១ ដប មួក ១ អាវ ២ ស្រោមដៃ ស្រោមជើង ១ កំប្លេ និងក្រណាត់ត្រីកោណ ១ ដុំ ៕ ដោយ ៖ វ៉ៃកូ