ភ្នំពេញ៖ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម នៅព្រឹកថ្ងៃទី២៦ ខែកុម្ភៈ ឆ្នាំ២០១៩នេះ បានដឹកនាំសហការីមកកាន់ វិមានរដ្ឋសភា ដើម្បីជម្រាបជូនគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភា ដែលមាន លោក ជា វ៉ាន់ដេត ជាប្រធានគណៈកម្មការ អំពីលទ្ធផលការងារ បញ្ហាប្រឈម និងទិសដៅការងារ ដែលក្រសួងធនធានទឹក និងឧតុនិយម ត្រូវអនុវត្តបន្ត សម្រាប់នីតិកាលទី៦នៃរដ្ឋសភា។
លោក លឹម គានហោ បានមានប្រសាសន៍ទៀតថា កន្លងមករហូតដល់បច្ចុប្បន្ន ក៏ដូចជាទិសដៅដែលត្រូវអនុវត្តបន្ត ក្រសួងធនធានទឹក និងឧតុនិយម មានផែនការសកម្មភាព និងវិធានការដោះស្រាយច្បាស់លាស់លើវិស័យធនធានទឹក និងឧតុនិយម ដែលមានដូចជា ការអនុវត្ត យុទ្ធសាស្ត្រពាងទឹក ការគ្រប់គ្រងអាងទន្លេ និងធនធានទឹកចម្រុះ ការព្យាករណ៍អាកាសធាតុ ការគ្រប់គ្រងគ្រោះទឹកជំនន់ និងគ្រោះរាំងស្ងួត ការកសាងមូលដ្ឋានបច្ចេកទេស ការជំរុញលើការសិក្សាស្រាវជ្រាវ និងអភិវឌ្ឍន៍ ការពង្រឹងសមត្ថភាព ការពង្រឹងកិច្ចសហប្រតិបត្តិការ និងភាពជាដៃគូ ជាមួយផ្នែកពាក់ព័ន្ធជាដើម។
លោករដ្ឋមន្ត្រីក្រសួងធនធានទឹក និងឧតុនិយម បានលើកឡើងដែរថា ទន្ទឹមនឹងលទ្ធផលដែលក្រសួងសម្រេចបាន ក៏នៅមានបញ្ហាប្រឈម មួយចំនួនដែលត្រូវដោះស្រាយបន្តផងដែរ ដោយលោករដ្ឋមន្ត្រីបានសំណូមពរដល់រដ្ឋសភា សូមជួយអន្តរាគមន៍ គាំទ្រ ជំរុញក្នុងការបង្កើនថវិកា សម្រាប់ការងារស្រាវជ្រាវវិស័យធនធានទឹក និងឧតុនិយម ឲ្យបានកាន់តែប្រសើរឡើងថែមទៀត។
លោក ជា វ៉ាន់ដេត ប្រធានគណៈកម្មការទី៣នៃរដ្ឋសភា បានវាយតម្លៃខ្ពស់ចំពោះកិច្ចខិតខំប្រឹងប្រែង បំពេញការងាររបស់ក្រសួងក្រោមការដឹកនាំ ផ្ទាល់របស់លោកមរដ្ឋមន្ត្រី ដោយបានសម្រេចនូវសមិទ្ធផលសំខាន់ៗជាច្រើន ក្នុងក្របខ័ណ្ឌវិស័យធនធានទឹក និងឧតុនិយម ដែលបានរួមចំណែក យ៉ាងធំធេង ក្នុងការអភិវឌ្ឍលើគ្រប់វិស័យនៃសេដ្ឋកិច្ចជាតិ។
លោកប្រធានគណៈកម្មការទី៣នៃរដ្ឋសភា ក៏បានបង្ហាញនូវក្តីសង្ឃឹម និងជំនឿជឿជាក់យ៉ាងមុតមាំថា តាមរយៈទិសដៅជាយុទ្ធសាស្ត្រ និង ផែនការសកម្មភាពជាអាទិភាពដែលក្រសួងបានដាក់ចេញសម្រាប់នីតិកាលទី៦នៃរដ្ឋសភា និងធ្វើឲ្យវិស័យធនធានទឹក ដើរតួនាទីកាន់តែសំខាន់ ថែមទៀត ក្នុងដំណើរការទ្រទ្រង់ការអភិវឌ្ឍសេដ្ឋកិច្ចសង្គមប្រកបដោយចីរភាព៕ ដោយ៖បញ្ញាស័ក្តិ
