ខេត្តព្រះសីហនុ ៖ អភិបាលខេត្តព្រះសីហនុ លោក យន្ត មីន បានស្នើទៅក្រុមហ៊ុនអានកូ ដែលគ្រប់គ្រងប្រភពទឹកស្អាត នៅតំបន់ក្បាលឆាយ ត្រូវផ្តល់ទឹកទឹកស្អាត ឲ្យបានគ្រប់ចំនួនជូនទៅអង្គភាពរដ្ឋាករទឹកស្វយ័តទឹកខេត្តនេះ ឲ្យបានគ្រប់ចំនួន ដើម្បីឲ្យស្ថាប័នមួយនេះ មានទឹកគ្រប់គ្រាន់ ស្រាប់ចែកជូនប្រជាពលរដ្ឋ រស់នៅទីប្រជុំជននេះ ប្រើប្រាស់ឲ្យបានគ្រប់ចំនួនឡើងវិញ។
បញ្ហានេះ លោក យន្ត មីន កាលពីចុងសប្តាហ៍កន្លងទៅនេះ បានដឹកនាំមន្ត្រីចុះទៅពិនិត្យស្ថានភាព អាងស្តុកទឹកស្អាតនៅតំបន់ក្បាលឆាយ របស់ក្រុមហ៊ុនអានកូ ព្រមទាំងបានចុះទៅពិនិត្យមើលទីតាំងស្តុកទឹក តាមទីតាំងមួយចំនួនទៀត។ ក្នុងនោះលោកក៏បានចុះទៅពិនិត្យការតភ្ជាប់បណ្ដាញទុយោទឹក នៅតាមទីតាំងខ្លះទៀត របស់ក្រុមហ៊ុនអានកូ និងអង្គភាពរដ្ឋាករទឹកខេត្តនេះ ដើម្បីរកមូលហេតុពិត ដែលបណ្តាលឲ្យទីប្រជុំជនក្រុងព្រះសីហនុ មិនមានទឹកស្អាតចែកជូនពលរដ្ឋ ឲ្យបានគ្រប់គ្រាន់។
បញ្ហាខ្វះទឹកនេះ គឺមិនមែនខ្វះតែនៅតាមផ្ទះ របស់ប្រជាពលរដ្ឋទេ សូម្បីនៅតាមស្ថាប័នរដ្ឋមួយចំនួន ជាពិសេសសូម្បីមន្ទីរពេទ្យបង្អែកខេត្តព្រះសីហនុ ក៏ខ្វះទឹកសម្រាប់ផ្តល់ជូនអ្នជំងឺ និងបុគ្គលិកពេទ្យ គ្មានទឹកប្រើប្រាស់រាប់ខែមកហើយដែរ។
ចំណុចនេះ លោក យន្ត មីន អភិបាលខេត្តព្រះសីហនុ ក៏បានជំរុញទៅក្រុមហ៊ុនអានកូ ធ្វើយ៉ាងណាត្រូវផ្គត់ផ្គង់ទឹកស្អាត ឲ្យបានគ្រប់ចំនួន ជូនទៅរដ្ឋាករទឹកស្វយ័តខេត្តព្រះសីហនុ ឲ្យបានគ្រប់ចំនួន ដើម្បីមានទឹកចែកចាយជូនពលរដ្ឋ មានទឹកប្រើប្រាស់គ្រប់ចំនួនឡើងវិញ។
ករណីនេះ លោកអភិបាល ក៏បានសុំកិច្ចអន្តរាគមន៍ដល់លោករដ្ឋមន្ត្រីក្រសួងឧស្សាកម្ម និងសិប្បកម្ម ដើម្បីស្នើសុំឲ្យជួយអន្តរាគន៍ដោះបញ្ហាខ្វះទឹកស្អាតប្រើប្រាស់ នាទីប្រជុំជនក្នុងក្រុងព្រះសីហនុ ឲ្យបានឆាប់ផង។
បញ្ហាខ្វះទឹកនេះ ប្រជាពលរដ្ឋ អាជីវករ និងភ្ញៀវទេសចរ បានរិះគន់ដល់ការដឹកនាំ របស់រដ្ឋបាលខេត្តព្រះសីហនុ ថាមិនបានជួយរវល់អើពើដល់សុខទុក្ខ របស់ពួកគេនោះទេ ដោយទុកឲ្យប្រជាពលរដ្ឋនៅតាមមូលដ្ឋានក្នុងក្រុងព្រះសីហនុ ខ្វះទឹកស្អាតប្រើប្រាស់អូសបន្លាយពេលជាច្រើនខែមកហើយ ប៉ុន្តែនៅតែគ្មានដំណោះស្រាយជូនពួកគេទៀត។
ប្រជាពលរដ្ឋ អះអាងថា រាល់ថ្ងៃនេះ ចំពោះបញ្ហាទឹកស្អាត នាទីប្រជុំជនក្រុងព្រះសីហនុ គឺមានតំបន់ខ្លះមានទឹកប្រើប្រាស់គ្រប់គ្រាន់ ប៉ុន្តែមូលដ្ឋានមួយចំនួន គឺមិនមានទឹកស្អាតប្រើប្រាស់ទេ ហើយមានពលរដ្ឋបានបង្ខំចិត្តទិញទឹកស្អាត ដែលគេដឹកលក់តាមរថយន្ត និងលក់តាមរទេះជាដើមយកមកប្រើប្រាស់។
ជាងនេះទៀត ក៏មានប្រជាពលរដ្ឋតាមមូលដ្ឋានក្រុងព្រះសីហនុ បាននាំគ្នាជីកអណ្ដូងស្នប់ ដើម្បីយកទឹកប្រើប្រាស់ជំនួយវិញ។
ប្រជាពលរដ្ឋរស់នៅខេត្តព្រះសីហនុមួយចំនួន បានអះអាងថា នាមូលដ្ឋានក្រុងព្រះសីហនុ គឺមានក្រុមហ៊ុនផ្គត់ផ្គង់ទឹក ដែលបើកធ្វើអាជីវកម្មចែកចាយទឹកស្អាតមានចំនួន២ក្រុមហ៊ុន រួមមាន៖បណ្តាញចែកចាយទឹក រដ្ឋ របស់អង្គភាពរដ្ឋាករទឹកស្វយ័តខេត្តព្រះសីហនុ និងបណ្តាញចែកចាយទឹក របស់ឯកជន គឺក្រុមហ៊ុនអានកូ។
បណ្តាញផ្តត់ផ្គងទឹកទាំង២នេះ ត្រូវបានមតិមួយចំនួនអះអាងថា សម្រាប់ប្រជាពលរដ្ឋ ឬអ្នកតភ្ជាប់បណ្តាញទឹកស្អាត ចេញពីក្រុមហ៊ុនអានកូ គឺពួកគេមានទឹកប្រើប្រាស់បានគ្រប់គ្រាន់ ប៉ុន្តែសម្រាប់ប្រជាពលរដ្ឋ ដែលតភ្ជាប់បណ្តាញទឹករដ្ឋ របស់អង្គភាពរដ្ឋាករទឹកស្វយ័តខេត្តព្រះសីហនុវិញ គឺភាគច្រើនមិនមានទឹកប្រើឲ្យបានគ្រប់ចំនួនទេ។ ហើយថា ការខ្វះខាតទឹកស្អាតប្រើប្រាស់នេះ គឺមានរយៈច្រើនខែកន្លងមកហើយៗ នៅឡើយមិនទាន់មានដំណោះស្រាយ ជូនប្រជាពលរដ្ឋទេ គិតមកដល់ថ្ងៃចន្ទ ទី១១ ខែមីនា ឆ្នាំ២០១៩នេះ។
ទាក់ទិនបញ្ហានេះ លោក ផន រតនៈ ប្រធានអង្គភាពរដ្ឋាករទឹកស្វយ័តខេត្តព្រះសីហនុ បានឲ្យដឹងថា រាល់ថ្ងៃនេះ ប្រភពទឹកស្អាតធំ ដែលអង្គភាពរដ្ឋាករទឹកខេត្តនេះមាន គឺបានបញ្ជាទិញពីក្រុមហ៊ុនអានកូ ដើម្បីយកមកចែកចាយបន្ត ជូនប្រជាពលរដ្ឋប្រើនៅតាមតំបន់មួយចំនួន នាទីប្រជុំជនក្នុងក្រុងព្រះសីហនុ។
លោកបន្តថា សម្រាប់ក្រុងព្រះសីហនុទាំងមូល គឺ តម្រូវការប្រើប្រាស់ទឹក ក្នុងមួយថ្ងៃៗ អាចប្រមាណ ៤ម៉ឺនម៉ែត្រគូប ទើបគ្រប់គ្រាន់តម្រូវការប្រើប្រាស់។ ប៉ុន្តែរាល់ថ្ងៃនេះ ក្រុមហ៊ុនអានកូ បានផ្តល់ទឹកជូនអង្គភាពរដ្ឋាករទឹក បានចន្លោះពី ២៨,០០០ ទៅ៣០,០០០ម៉ែត្រគូបតែប៉ុណ្ណោះ។
ត្រង់ចំណុចនេះ លោក ផន រតនៈ បញ្ជាក់ថា ការផ្តល់បរិមាណទឹក មិនគ្រប់ចំនួននេះ ទំនងជាអាចជាដើមហេតុ នាំឲ្យប្រជាពលរដ្ឋ រស់នៅតាមតំបន់មួយចំនួន ខ្វះទឹកប្រើប្រាស់ អូសបន្លាយពេលយូរខែ។ លោកបន្តថា បញ្ហាខ្វះទឹកស្អាតប្រើប្រាស់នៅក្រុងព្រះសីហនុរាល់ថ្ងៃនេះ ប្រសិនបើក្រុមហ៊ុនអានកូ ជួយពន្លឿន សម្មភាពតភ្ជាប់បណ្តាញទុយោទឹកមានទំហំធៗ ដើម្បីចែកចាយទឹកស្អាត ឬបញ្ជូនទឹក មកឲ្យអង្គភាពរដ្ឋាករទឹកខេត្តព្រះសីហនុបានគ្រប់ចំនួន នោះបញ្ហាខ្វះទឹកស្អាតប្រើប្រាស់នៅទីប្រជុំជនក្រុងព្រះសីហនុ នឹងលែងជាបញ្ហាចោទទៀតហើយ។
ចំណែក តំណាងក្រុមហ៊ុនអានកូ លោក ស៊ុន ងី បានឲ្យប្រព័ន្ធផ្សព្វផ្សាយដឹងថា ក្រុមហ៊ុននេះ បានផ្គត់ផ្គង់ទឹក ជូនអង្គភាពរដ្ឋាករទឹកស្វយ័តខេត្តព្រះសីហនុ ប្រមាណ៣ម៉ឺនម៉ែត្រគូបក្នុងមួយថ្ងៃៗ។ លោកន្តថា រាល់ថ្ងៃនេះ ប្រភពទឹកស្អាតនៅតំបន់ក្បាលឆាយ គឺមានទឹកមិនខ្វះទេ សម្រាប់ចែកជូនឲ្យពលរដ្ឋប្រើប្រាស់។ ប៉ុន្តែលោកថា មូលហេតុនៃការបញ្ជូនទឹក ឲ្យមិនគ្រប់ចំនួននាពេលកន្លងមកនេះ អាចដោយសារការតភ្ជាប់ទុយោមេ ឆ្ពោះ ទៅស្ថានីយ៍ស្តុកទឹកមួយចំនួន គឺអ្នកបច្ចេកទេសស្ថាបនាមិនទាន់មិនទាន់រួចរាល់។
លោក ស៊ុន ងី បន្តថា បញ្ហានេះក្រុមអ្នកបច្ចេកទេសជំនាញ របស់ក្រុមហ៊ុនអានកូ បានបន្តសកម្មភាពចុះតភ្ជាប់បណ្តាញទុយោមេមមាញឹករាល់ថ្ងៃ ដើម្បីឈានទៅដោះស្រាយបញ្ហាខ្វះទឹកស្អាត ដើម្បីចែកជូនប្រជាពលរដ្ឋ រស់នៅក្នុងក្រុងព្រះសីហនុ ឲ្យមានទឹកប្រើប្រាស់គ្រប់ចំនួនវិញ។
យ៉ាងនេះក្តី លោក ស៊ុន ងី មិនបានបញ្ជាក់ថា ក្រុមការងារបច្ចេកទេសក្រុមហ៊ុនអានកូ នឹងបញ្ចប់ការងារតភ្ជាប់បណ្តាញទុយោមេ សម្រាប់ចែកចាយទឹកឲ្យរួចរាល់ និងអាចឈានដល់ផ្តល់ប្រភពទឹកស្អាត ចែកចាយជូនប្រជាពលរដ្ឋមានទឹកប្រើប្រាស់ ឲ្យបានគ្រប់ចំនួននៅខែណា ឬឆ្នាំណា ឲ្យពិតប្រាកដនោះទេ..?។
ទោះជាបែបនេះក្តី ប្រជាពលរដ្ឋមួយចំនួន បានអះអាងថា រាលថ្ងៃនេះ គេឃើញសកម្មភាព ក្រុមការងារបច្ចេកទេស របស់ក្រុមហ៊ុនអានកូ បានមមាញឹកក្នុងការចុះភ្ជាប់ទុយោមេមានទំហំធំៗ ឆ្ពោះទៅកាន់ការដ្ឋានសំណង់អគារធំៗទើបសាងសង់ថ្មីៗ ដែលភាគច្រើនវិនិយោគដោយក្រុមហ៊ុនចិន។ ហើយថា អតិថិជនទាំងឡាយណា ដែលតភ្ជាប់បណ្តាញទឹកចេញពីក្រុមហ៊ុនអានកូ គឺពួកគេមិនខ្វះទឹកស្អាតប្រើប្រាស់នោះទេ។ វាលើកលែងតែប្រជាពលរដ្ឋ ឬអ្នកតភ្ជាប់បណ្តាញទឹកចេញពីអង្គភាពរដ្ឋាករទឹកស្វយ័តខេត្តព្រះសីហនុ គឺភាគច្រើនមិនមានទឹកស្អាតប្រើប្រាស់ឲ្យបានគ្រប់ទេរហូតមកដល់ពេលនេះ។
ចំណុចនេះ ប្រជាពលរដ្ឋ និងអ្នកឃ្លាំមើលសង្គមមួយចំនួន យល់ថា បញ្ហាអង្គភាពរដ្ឋាករទឹកខេត្តព្រះសីហនុ មិនមានទឹក សម្រាប់ចែកជូនប្រជាពលរដ្ឋរស់នៅទីប្រជុំជនក្រុងព្រះសីហនុ ប្រើប្រាស់ ឲ្យបានគ្រប់ចំនួន អាចទំនងជាបណ្តាលមកពី ការមិនសហការ ឬការចាច់កុងគ្នាក្នុងរបររកស៊ី រវាងក្រុមហ៊ុនអានកូ និងអង្គភាពរដ្ឋាករទឹកស្វយ័តខេត្តព្រះសីហនុ។
ផ្តើមពីបញ្ហានេះ ប្រជាពលរដ្ឋរស់នៅខេត្តព្រះសីហនុ ក៏បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកកម្ពុជា ឲ្យជួយអន្តរាគន៍ទៅក្រុមហ៊ុនអានកូ ធ្វើយ៉ាងណា ត្រូវផ្គត់ផ្គង់ទឹកស្អាត ជូនអង្គភាពរដ្ឋាករទឹកស្វយ័តខេត្តព្រះសីហនុ ឲ្យមានទឹកស្អាតគ្រប់គ្រាន់ សម្រាប់ចែកជូនប្រជាពលរដ្ឋ រស់នៅទីប្រជុំជនក្រុងព្រះសីហនុ ឲ្យមានទឹកប្រើប្រាស់ឡើងវិញ នៅគ្រាអាងស្តុកទឹកស្អាត ដែលគ្រប់គ្រងដោយក្រុមហ៊ុនអានកូ នៅតំបន់ក្បាលឆាយ មានទឹកស្តុកមិនខ្វះ ប៉ុន្តែមិនគួរណា ប្រជាពលរដ្ឋភាគច្រើន រស់នៅទីប្រជុំជនក្រុងទេសចរណ៍មួយនេះ មិនមានទឹកប្រើប្រាស់ឲ្យបានគ្រប់ចំនួននោះទេ..?៕ ដោយ ៖ ដែន សីមា
