ភ្នំពេញ ៖ ក្នុងប្រតិបត្តិការបង្ក្រាបក្រុមចោរប្លន់ និងទទួលផលចោរកម្មមួយសំបុកធំចំនួន៧នាក់ ក្រុមនេះដែលធ្លាប់ធ្វើសកម្មភាពកាប់ វាយប្លន់យកម៉ូតូ ក្នុងនោះមានម្នាក់ ជាមេក្លោងទទួលផលចោរកម្ម និងរៀបចំគំរោងធ្វើ សកម្មភាពទាំងអស់ ត្រូវបានកម្លាំងនគរបាលខណ្ឌពោធិ៍សែនជ័យ ដឹកនាំបញ្ជាផ្ទាល់ពីលោក យឹម សារ៉ាន់ អធិការនគរបាលខណ្ឌ បើកប្រតិបត្តិការចុះបង្ក្រាប។
លោក យឹម សារ៉ាន់ បានឱ្យដឹងថា ៖ ប្រតិបត្តិការបង្ក្រាបក្រុមចោរប្លន់ និងទទួលផលចោរកម្ម ដែលធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ បានកើតមានឡើង បន្ទាបពីជនសង្ស័យបានកាប់ វាយប្លន់យកម៉ូតូស្កុបពីមួយគ្រឿង កាលពីយប់ថ្ងៃទី១៩ ខែធ្នូ ឆ្នាំ២០១៧ នៅភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ ។ ប្រតិបត្តិការធ្វើឡើងនៅ រសៀល ថ្ងៃទី២០ ខែធ្នូ ឆ្នាំ២០១៧កង កម្លាំងនគរបាល ចាប់ជនសង្ស័យចោរប្លន់ បានទាំងសម្បុក នៅក្នុងភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ និងចុះទៅដល់កន្លែងទទួលផលចោរកម្ម នៅផ្ទះជាងជួសជុលទិញ លក់ម៉ូតូ តាមផ្លូវបេតុង ភូមិសាមគ្គី សង្កាត់ត្រពាំងក្រសាំង ដោយរកឃើញម៉ូតូជាច្រើនគ្រឿង មិនប្រក្រតី។
លោក យឹម សារ៉ាន់ បានបញ្ជាក់ថា ជនសង្ស័យ និងជនពាក់ព័ន្ធទាំង៧នាក់ ដែលត្រូវបានកម្លាំងនគរបាលរបស់លោកចាប់ខ្លួននោះរួមមាន៖
ទី១៖ ឈ្មោះ ហួន វិចិត្រ អាយុ២៦ឆ្នាំ មុខរបរជាងជួសជុលម៉ូតូ និងទិញលក់ម៉ូតូជាប់ពាក់ព័ន្ធទទួលផលចោរកម្ម
ទី២៖ ឈ្មោះ ផល ចារ៉ាន់ អាយុ១៧ឆ្នាំ មុខរបរមិនពិតប្រាកដ មានទីលំនៅភូមិ តាឥន្ទ សង្កាត់ស្នោ
ទី៣៖ ឈ្មោះ វ៉ាន់ សុខនីត អាយុ១៧ឆ្នាំ មុខរបរមិនពិតប្រាកដ មានទីលំភូមិសាមគ្គី៥ សង្កាត់ត្រពាំងក្រសាំង
ទី៤៖ ឈ្មោះ អេង លីហុ័ង អាយុ១៧ឆ្នាំ មុខរបរមិនពិតប្រាកដ មានទីលំនៅ ភូមិស្រែអំពិល សង្កាត់សំរោងក្រោម
ទី៥៖ ឈ្មោះ ប៊ុត ជាលីនុ អាយុ១៧ឆ្នាំ មានទីលំនៅភូមិសាមគ្គី១ សង្កាត់ត្រពាំងក្រសាំង
ទី៦៖ ឈ្មោះ ភាព មករា អាយុ១៧ឆ្នាំ មុខរបរមិនពិតប្រាកដ មានទីលំនៅ ភូមិស្រែតេជ្ជៈ សង្កាត់សំរោងក្រោម
ទី៧៖ ឈ្មោះ លី សុគន្ធបញ្ញា អាយុ១៧ឆ្នាំ មុខរបរមិនពិតប្រាកដ មានទីលំនៅ ភូមិសាមគ្គី៣ សង្កាត់ត្រពាំងក្រសាំង ខណ្ឌពោធិ៍សែនជ័យ។ ចំណែក ជនរងគ្រោះលើកចុងក្រោយឈ្មោះ ឈាង ផាន្នី ភេទប្រុស អាយុ២៣ឆ្នាំ មុខរបររត់ម៉ូតូកង់បី មានទីលំនៅភូមិកៅ ឃុំបែកចាន ស្រុកអង្គស្នួល ខេត្តកណ្តាល។ ក្រោយប្រតិបត្តិការសមត្ថកិច្ចបានរកឃើញម៉ូតូដែលក្រុមជនសង្ស័យវាយប្លន់ យកកាលពីវេលាម៉ោង៩យប់ថ្ងៃទី១៩ ខែធ្នូ ឆ្នាំ២០១៧ នៅភូមិព្រៃបឹង សង្កាត់កន្ទោក ម៉ាក ស្កុបពី ពណ៌ស ពាក់ស្លាកលេខ ភ្នំពេញ 1AE-9384 ត្រូវបានរកឃើញនៅផ្ទះទទួលបញ្ចាំ ទិញលក់ខាងលើ តែត្រូវបានម្ចាស់ផ្ទះ ដោះគ្រឿងបំបែកចេញអស់ សល់តែតួឆ្អឹងប៉ុណ្ណោះ។
លោក យឹម សារ៉ាន់ បានបន្តទៀតថា ក្រោយពីស្រាវជ្រាវតាមចាប់ក្រុមចោរប្លន់សកម្មក្នុងមូលដ្ឋាន ហើយឈានដល់ឃាត់ខ្លួនអ្នកទទួលផលចោរកម្ម និងឆែកឆេរផ្ទះ ក៏រកឃើញផ្ទះចំនួន៤កន្លែង ស្តុក ទុកម៉ូតូ ចម្រុះ មានទាំងម៉ូតូបញ្ចាំ ម៉ូតូ ទិញពីក្រុមចោរលួច ចោរប្លន់ ជាច្រើនគ្រឿង ក្រោមការសម្របសម្រួលពីលោក រៀល សុភិន ព្រះរាជអាជ្ញារងអមសាលាដំបូងរាជធានីភ្នំពេញ ដឹកនាំដោយកម្លាំង ចុះឆែកត្រួតពិនិត្យ ផ្ទះទាំង៤ រកឃើញទាំងសម្ភារ គ្រឿង សម្រាប់ផ្លាស់ប្តូ កែច្នៃបំភ័ណ្ឌម៉ូតូទៀតផង។
លោកបន្តទៀតថា៖ជនសង្ស័យ និងជនពាក់ព័ន្ធ រួម និងម៉ូតូទាំងអស់ ព្រមទាំងគ្រឿងម៉ូតូជាច្រើន ត្រូវបានសមត្ថកិច្ចដឹកយកទៅរក្សាទុកនៅ អធិការដ្ឋានខណ្ឌពោធិ៍សែនជ័យ ដើម្បីបន្តស្រាវជ្រាវរកម្ចាស់ និងសាកសួរជនសង្ស័យ ដើម្បីកសាងសំណុំរឿង បន្តតាមនីតិវិធីច្បាប់៕ ដោយ ៖ បញ្ញាស័ក្តិ