ភ្នំពេញ៖ លោកស្រី Gao Yan អនុរដ្ឋមន្ត្រីក្រសួងពាណិជ្ជកម្មចិន បានសន្យានឹងជួយអភិវឌ្ឍន៍វិស័យកសិកម្មរបស់កម្ពុជា ឲ្យកាន់តែល្អប្រសើរ ហើយលោកស្រីថា ភាគីចិនព្រមទទួលយកទៅពិនិត្យ ក្នុងការរៀបចំអនុវត្តពិធីសារ អនុស្សរណៈ ស្តីអំពីការនាំចេញទំនិញកសិផល ពីកម្ពុជាទៅកាន់ប្រទេសចិន ដោយអនុគ្រោះពន្ធចំនួន ៨.០៣០ មុខទំនិញ។
នៅព្រឹកថ្ងៃព្រហស្បតិ៍ ៤កើត ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២១ ខែធ្នូ ឆ្នាំ២០១៧ គណៈប្រតិភូជាន់ខ្ពស់ដឹកនាំដោយោក យឹម ឆៃលី ឧបនាយករដ្ឋមន្ត្រីនៃព្រះរាជាណាចក្រកម្ពុជា និងអមដំណើរដោយលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានចូលជួបសម្តែងការគួរសម និងពិភាក្សាការងារជាមួយលោកស្រីGao Yan អនុរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិន នៅទីស្ដីការក្រសួងពាណិជ្ជកម្ម ទីក្រុងប៉េកាំង នៃសាធារណរដ្ឋប្រជាមានិតចិន។
សូមបញ្ជាក់ថា ភាគីទាំងពីរបានវាយតម្លៃខ្ពស់ចំពោះ លទ្ធផលនៃកិច្ចសហប្រតិបត្តិការនៃប្រទេសយើងទាំងពីរ(កម្ពុជានិងចិន) នាពេលកន្លងមក ហើយភាគីចិនបានទទួលយកសំណូមពររបស់ភាគីកម្ពុជាយកទៅពិនិត្យនិងជួយ ជំរុញក្នុងការអនុវត្តនាពេលខាងមុខ ក្នុងនោះរួមមាន៖ ទី១ សន្យាជួយគាំទ្រគម្រោងនានា ដែលក្រសួងកសិកម្ម រុក្ខាប្រមាញ់ និងនេសាទកម្ពុជាបានស្នើសុំហិរញ្ញប្បទានសម្បទានពីរដ្ឋាភិបាលចិន ដើម្បីអភិវឌ្ឍវិស័យកសិកម្មកម្ពុជា។ ទន្ទឹមនឹងនេះ ភាគីចិននិងជួយរៀបចំផែនការមេស្តីពីការធ្វើទំនើបកម្ម ពិពិធភាវូបនីយកម្ម និងពាណិជ្ជូបនីកម្មកសិកម្មដើម្បីបង្កើនជីវភាពប្រជាជនឆ្លើយតបទៅនឹងកំណើនសេដ្ឋកិច្ចកម្ពុជា។
ទី២ ក្រសួងពាណិជ្ជកម្មចិនឯកភាពជំរុញអង្គភាពនាយកដ្ឋានរដ្ធបាល ត្រួតពិនិត្យគុណភាព អធិការកិច្ច និងចត្តាឡីស័ក ធ្វើការសម្រួល និងពន្លឿនពិធីសារបន្ថែមមុខទំនិញផលិតផលកសិកម្មឲ្យច្រើនជាងបច្ចុប្បន្ន។ ទី៣ ភាគីចិនព្រមទទួលយកទៅពិនិត្យក្នុងការរៀបចំអនុវត្តពិធីសារអនុស្សរណៈស្តីអំពីការនាំចេញទំនិញកសិផលពីកម្ពុជាទៅកាន់ប្រទេសចិនដោយអនុគ្រោះពន្ធចំនួន ៨.០៣០មុខទំនិញដែលបានចុះហត្ថលេខាកាលពីខែមិនាឆ្នាំ២០១៦។
ទី៤ ភាគីទាំងពីរបានឯកភាពលើការជំរុញការហោះហើរត្រង់ពីចិនទៅកម្ពុជាឲ្យបានច្រើន ដើម្បីជំរុញកំណើនទេសចរណ៍ចិនទៅកាន់កម្ពុជា។ ទី៥ នឹងជួយគាំទ្រដល់ក្រុមហ៊ុន ហ័រថុងឈីនតាវ អភិវឌ្ឍន៍តំបន់សេដ្ឋកិច្ចពិសេសនៅខេត្តព្រះសីហនុ ស្របតាមគោលនយោបាយផ្លូវមួយខ្សែក្រវ៉ាត់មួយ និងធ្វើឲ្យគម្រោងនេះក្លាយជាគម្រោងគំរូនៅក្នុងតំបន់អាស៊ីអាគ្នេយ៍៕ ដោយ៖កូឡាប