កំពង់ឆ្នាំង ៖ សិស្សថ្នាក់ទី១១ នៃវិទ្យាល័យព្រះបាទសុរាម្រឹតម្នាក់ ត្រូវរថយន្តដឹកគ្រឿងចក្រមួយគ្រឿង បើកទៅបុកទាំងកម្រោលពីក្រោយពេញមួយទំហឹង បណ្តាលអោយស្លាប់ភ្លាមៗនៅនឹងកន្លែង ។
ហេតុការណ៍គ្រោះថ្នាក់ចរាចរណ៍នេះកើតឡើង កាលពីវេលាម៉ោងជិត៣រសៀល ថ្ងៃទី២២ ខែធ្នូ ឆ្នាំ២០១៧ នៅលើកំណាត់ផ្លូវជាតិលេខ៥ ក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង។
ប៉ូលិសបានអោយដឹងថា ជនរងគ្រោះឈ្មោះធីម សុផាន្នី ភេទស្រី អាយុ១៧ឆ្នាំ រៀនថ្នាក់ទី១១( C ) នៃវិទ្យាល័យព្រះបាទសុរាម្រិត ខេត្តកំពង់ឆ្នាំង និង មានស្រុកកំណើត នៅភូមិប្រាសាទ ឃុំដារ ស្រុកកំពង់លែង។ រថយន្តបង្ករម៉ាក HiNO ពាក់ស្លាកលេខភ្នំពេញ3A.8579 ដឹកគ្រឿងចក្រមួយគ្រឿង ជារថយន្តរបស់ក្រុមហ៊ុនលីយូហេង ខេមបូឌា ខនស្រាក់សិន ។ រថយន្តបង្ករបើកបរក្នុងទិសដៅពីត្បូងទៅជើង និងបានបើកទៅបុកកង់ជនរងគ្រោះពីក្រោយទាំងកម្រោលពេញមួយទំហឹង ក្នុងខណៈពេលដែលជនរងគ្រោះកំពុងជិះកង់ចេញពីរៀនបណ្តាលអោយស្លាប់ភ្លាមៗនៅនឹងកន្លែងកើតហេតុតែម្តង ។
រថយន្តបង្ករត្រូវប៉ូលិសយកទៅរក្សាទុកដើម្បីរង់ចាំធ្វើការដោះស្រាយទៅតាមនិតិវិធីច្បាប់។ រីឯសពជនរងគ្រោះត្រូវបានប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណី៕ ដោយ៖ ចៅ សន
