ភ្នំពេញ៖ ស្ត្រីក្រីក្រស៊ីឈ្នួលលាងចានបត់ក្រដាសឲ្យគេតាមរោងការម្នាក់ ត្រូវក្រុមជនពាលចាប់រំលោភនិងសម្លាប់ ហើយបង្កអោយមានការភ្ញាក់ផ្អើលនៅវេលាម៉ោង៦និង៣០នាទី ព្រលប់ថ្ងៃទី២២ ខែធ្នូ ឆ្នាំ២០១៧ នេះនៅចំណុចប្រឡាយទឹកស្អុយអមតាមផ្លូវលេខ៥៩៨ ជិតផ្លូវរថភ្លើង ភូមិទំនប់ សង្កាត់ភ្នំពេញថ្មី ខណ្ឌសែនសុខ។
សាកសពនាងគ្រោះឈ្មោះ ឈុន មុំសុខស៊ីវុត្ថា អាយុ២៨ឆ្នាំ (ស្ត្រីមេម៉ាយ)មានទីលំនៅ និងស្រុកកំណើត ភូមិព្រៃបាយ ឃុំព្រៃយុត្ឋការ ស្រុកកោះអណ្តែតខេត្តតាកែវ។ សព្វថ្ងៃស្នាក់នៅបន្ទប់ជួលភូមិបុរី១០០ខ្នង សង្កាត់ទឹកថ្លា ខណ្ឌសែនសុខ ដើម្បីមកធ្វើការស៊ីឈ្នួលលាងចានអោយគេតាមរោងការ។
ពាក់ព័ន្ធការស្លាប់នេះ បើតាមប្រជាពលរដ្ឋនៅក្បែរកន្លែងកើតហេតុបាននិយាយថា កាលពីវេលាម៉ោងប្រហែលជា១០យប់(ថ្ងៃទី២១/១២)ពួកគាត់បានឮសូរសម្លេង មនុស្សស្រីស្រែកអោយគេជួយបានមួយភ្លែតក៏ស្ងាត់ឈឹង ដោយសារយប់ងងឹតមិនមានអ្នកណាហ៊ានទៅមើល។ មួយស្របក់ក្រោយមកដំណឹងនេះបានដឹងដល់ថៅកែរបស់នាង ក៏បានចាត់ចែងមនុស្សនាំគ្នាមករកមើលនៅទីនោះដែរ តែរកមិនឃើញ។
លុះស្អែកឡើងថ្ងៃទី២២ ខែធ្នូ ឆ្នាំ២០១៧នេះ បាត់នាង ឈុន មុំសុខស៊ីវុត្ថា មិនឃើញមកធ្វើការដូចសព្វដងរហូតដល់ពេលល្ងាចមានការសង្ស័យថា នាងអាចត្រូវគេចាប់រំលោភសម្លាប់ ក៏នាំគ្នាទៅរកមើលម្តងទៀតនៅត្រង់ចណុចដែលគេឮសម្លេងស្រែកនោះ ទើបប្រទះឃើញសាកសពរបស់នាងត្រូវគេសម្លាប់ទំលាក់ចូលលូក្នុងសភាពអាក្រាតកាយ។
ប៉ូលិសនិយាយថា នាងត្រូវគេចាប់រំលោភ ហើយវាយសម្លាប់ដោយវត្ថុរឹង មានស្នាមរបួសនៅត្រង់ក្បាលនិងក។ ប៉ូលិសបានព្យាយាមប្រមូលវត្ថុតាងផ្សេងៗនៅកន្លែងកើតហេតុ ដើម្បីតាមចាប់ខ្លួនឃាតកយកមកផ្តន្ទាទោស៕ ដោយ៖បញ្ញាស័ក្តិ