កូនបង្កើតរបស់ស្ត្រីរងគ្រោះ បានស្នើឲ្យអាជ្ញាធរចាត់វិធានការលើម្ចាស់ហ្វេសបុកផេកមួយឈ្មោះ Like Video Now បន្ទាប់ពីផេកនោះបានចុះផ្សាយពត៌មានមិនពិតឡើងវិញ ពីករណីឃាតកម្មកាលពីជិត ៤ឆ្នាំមុន នៅក្នុងខេត្តកោះកុង។
ក្នុងផេក Like Video Now ដែលបានចុះផ្សាយកាលពីម្សិលមិញ បានសរសេរដូច្នេះថា “អាសូរណាស់កូនអកតញូមិននឹកស្មានសោះ ថាឃាតករដែលកាប់សម្លាប់ស្ត្រីម្នាក់ នៅខេត្តកោះកុង ដើម្បីប្លន់យកទ្រព្យសម្បត្តិនោះ ជាក់ស្តែងគឺជាកូនប្រុសស្រីទាំង៣ របស់ជនរងគ្រោះ។ ពេលឃើញម្តាយស្លាប់ ធ្វើជាស្រែកយំ ដើម្បីបង្វែរដាន។ ទីបំផុត សមត្ថកិច្ចនៅតែបំបែករឿងក្តីបាន។ ហ៊ានលើកដៃសម្លាប់ម្តាយ ដែលខំចិញ្ចឹមបីបាច់តាំងពីតូច ពួកកូននរកប្រេត” !
ជុំវិញការចេញផ្សាយបែបនេះ ត្រូវបានលោក ប៉ាន់ សុភ័ក្រ ដែលជាកូនបង្កើតរបស់ស្ត្រីរងគ្រោះឈ្មោះ ម៉េង សាយ បានថ្លែងប្រាប់ CEN ថា “វាគឺជាការចុះផ្សាយមិនពិតទាំងស្រុង។ រឿងកើតឡើងជិត ៤ឆ្នាំទៅហើយ ចំណែកឃាតករពិតឈ្មោះ ជា មុំ ក៏ត្រូវតុលាការកាត់ទោសអោយជាប់គុកមួយជីវិតហើយដែរ ប៉ុន្តែហេតុអ្វីម្ចាស់ផេកមួយនេះនៅតែបន្តដាក់បន្ទុកលើកូនប្រុសស្រីដែលគ្មានកំហុស?”
“គេចោទបងស្រីខ្ញុំ ខ្ញុំមានអារម្មណ៍ឈឺចាប់រួចទៅហើយ ព្រោះខ្ញុំដឹងថាគាត់មិនមែនអ្នកធ្វើ ប៉ុន្តែម្ចាស់ផេកមួយនេះ បានចោទទាំងខ្ញុំ រួមទាំងប្អូនខ្ញុំទៀតថាបានសម្លាប់ម្តាយខ្លួនដើម្បីប្លន់យកទ្រព្យសម្បតិ្ត ខណៈខ្ញុំមិនបាននៅកន្លែងកើតហេតុសោះ។ ខ្ញុំ និងប្អូនប្រុសខ្ញុំ នៅធ្វើការនៅភ្នំពេញ ពេលឃាតកម្មកើតឡើង”។
លោក សុភ័ក្រ ក៏បានស្នើឲ្យក្រសួងមហាផ្ទៃវែកមុខម្ចាស់ផេកនេះផងដែរ ដើម្បីយកមកកាត់ទោសតាមផ្លូវច្បាប់ ព្រោះម្ចាស់ផេកនេះបានចុះផ្សាយព័ត៌មានមិនពិតទាំងស្រុង ដើម្បីផលប្រយោជន៍ខ្លួនឯង ដោយមិនគិតពីភាពត្រឹមត្រូវ និងកិត្តិយសរបស់អ្នកដទៃ។
សូមរម្លឹកថា កាលពីថ្ងៃទី ២៨ ខែឧសភា ឆ្នាំ ២០១៥ មានករណីប្លន់សម្លាប់ដ៏ក៏ក្រើកមួយកើតនៅស្ថិតនៅឃុំស្ទឹងវែង ស្រុកស្មាច់មានជ័យ ក្រុងខេមរភូមិ ខេត្តកោះកុង។ រឿងបានផ្ទុះឡើងយ៉ាងខ្លាំងទូទាំងប្រទេស ក្រោយពេលស្ត្រីឈ្មោះ ជា មុំ ដែលជាឃាតករពិតប្រាកដ បានទម្លាក់កំហុសលើកូនស្ត្រីបង្កើតរបស់ស្ត្រីរងគ្រោះឈ្មោះ ម៉េង សាយ។
សារពត៌មានក្នុងស្រុកជាច្រើនបានធ្វើចុះផ្សាយ និងដាក់បន្ទុកលើស្ត្រីឈ្មោះ ប៉ាន់ ណៃស៊ីន ថាជាឃាតករសម្លាប់ម្តាយខ្លួនឯងដើម្បីប្លន់យកមាសប្រាក់ ក្រោយពេលស្ត្រីឈ្មោះ ជា មុំ បានធ្វើការទម្លាក់កំហុសដាក់លើគាត់។
ទោះយ៉ាងណា ក្រោយពេលមានការស៊ើបអង្កេតពីខាងតុលាការ បូករួមទាំងមានចូលរួមពីសំណាក់សាក្សីយ៉ាងច្រើននាក់ ទើបការពិតត្រូវបានលាតត្រដាង ចំណែកជនដែលចោទកូនស្រីបង្កើតរបស់ស្ត្រីរងគ្រោះនោះ គឺជាឃាតករពិតប្រាកដ។
បើតាមការឆ្លើយរបស់ស្ត្រី ជា មុំ នៅក្នុងសវនាការ បានអោយដឹងថា ស្ត្រីរូបនោះជាជនញាណល្បែង និងតែងតែទៅលេងល្បែងនៅកាស៊ីណូ បណ្តាលឲ្យចាញ់ និងជំពាក់បំណុលគេជាច្រើន រហូតដល់ហ៊ានធ្វើរឿងខាងលើ៕ ដោយ ៖ សុភ័ក្ត្រ
