ខេត្តកែប ៖ សម្តេចតេជោ ហ៊ុន សែន បានថ្លែងថា “ខ្ញុំសូមអរគុណ ដល់បងប្អូនប្រជាពលរដ្ឋ នៅក្នុងខេត្តកែបទាំងមូល ដែលតែងតែគាំទ្រដល់ការដឹកនាំរបស់ខ្ញុំ និងបានបោះឆ្នោតជូន គណបក្សប្រជាជនកម្ពុជា។
សម្តេចតេជោ បានលើកឡើងថា ទោះបីជាខេត្តនេះតូចបន្តិចមែន តែរាល់ការបោះឆ្នោតកន្លងមក គឺគណបក្សប្រជាជន តែងតែឈ្នះដាច់ ឈ្នះរហូតដល់ជាង៩០%។ តាមរយៈលទ្ធផលនេះ គឺបង្ហាញពីការគាំទ្រយ៉ាងពេញទំហឹង ចំពោះការដឹកនាំរបស់គណបក្រប្រជាជន។ សូមជូនពរប្អូននជនរួមជាតិជួបតែសេចក្តីសុខ និងសំណាងល្អគ្រប់ៗគ្នា។
បើតាមប្រសាសន៍របស់សម្តេចតេជោ “ខ្ញុំសូមអរគុណបងប្អូនប្រជាពលរដ្ឋ លោកគ្រូអ្នកគ្រូ និងកូនក្មួយសិស្សានុសិស្ស ដែលបានទទួលខ្ញុំយ៉ាងរាក់ទាក់ នៅលើទឹកដីខេត្តកែប។ ទន្ទឹមនឹងនេះដែរ ខ្ញុំក៏សូមជម្រាបជូនបងប្អូនទូទាំងប្រទេស ឲ្យបានជ្រាបថា នៅថ្ងៃទី ២៦-២៨ ធ្នូនេះ នឹងមានភ្លៀងធ្លាក់ខ្លាំង ជាពិសេសនៅតាមតំបន់មាត់សមុទ្រ។ សូមបងប្អូនរស់នៅ និងប្រកបការងារតាមសមុទ្រសូមមានការប្រុងប្រយ័ត្នខ្ពស់”។
ដោយមើលឃើញពីតម្រូវការខ្វះខាតចាំបាច់បន្ថែមនៅក្នុងបវិវេណ “សាលាបឋមសិក្សា និងវិទ្យាល័យ ប៊ុន រ៉ានី ហ៊ុនសែន ចរិយាវង្ស” សម្តេចតេជោ ហ៊ុន សែន បានផ្តល់ជូនបន្ថែមនូវអគារសិក្សាថ្មី១ខ្នង កម្ពស់៤ជាន់ មាន២០បន្ទប់ (ជាន់ទី១ទី២ និង៣សំរាប់ថ្នាក់សិក្សា និងបន្ទប់ពិសោធន៍ ជាន់ទី៤សំរាប់កាត់ដេរ និង Computer) ថែមអាគារស្នាក់នៅសម្រាប់គ្រូបង្រៀន និងអាគារស្នាក់នៅរបស់សិស្ស១ខ្នង២ជាន់១០បន្ទប់ និងផ្តល់ជូន Computer ៤០គ្រឿង Printer ១០គ្រឿង Copy machine ២គ្រឿង ដល់វិទ្យាល័យ ប៊ុន រ៉ានី ហ៊ុនសែន ចរិយាវង្ស ផងដែរ។
សម្តេចនាយករដ្ឋមន្ត្រី បានឲ្យក្រសួងអប់រំជាសហការជាមួយអាជ្ញាធរខេត្ត ធ្វើការសិក្សាក្នុងការបង្កើត សាកលវិទ្យាល័យនៅខេត្តកែបនេះ ដែលអាចជួយសម្រួលដល់ក្មួយៗនៅទីនេះ និងក្មួយៗមកពីខេត្តកំពត ក៏អាចមកសិក្សានៅទីនេះបានដែរ។ សម្តេច ក៏បានកោតសរសើរនូវការខិតខំរបស់លោកគ្រូអ្នកគ្រូទាំងអស់ ដែលបានខិតខំបង្រៀនកូនក្មួយ ដែលមានអត្រាប្រឡងជាប់ជាង៩០%។ ខ្ញុំសូមជូនពរបងប្អូនប្រជាពលរដ្ឋ និងកូនក្មួយក្នុងខេត្តកែបទាំងអស់ ហើយសង្ឃឹមថានៅ ថ្ងៃទី ២៩ ខែ កក្កដា ឆ្នាំ២០១៨ បងប្អូនទូទាំងខេត្តនឹងបន្តបោះឆ្នោតអោយ គណបក្សប្រជាជនកម្ពុជាជាបន្តទៀត។ សង្ឃឹមថា សមិទ្ធផលថ្មីៗជាច្រើន ដែលបានកសាង និងកំពុងកសាងបន្ថែម នៅទីនេះ នឹងបានជាប្រយោជន៍ដល់កូនក្មួយ បានសិក្សាយ៉ាងហោចណាស់ក៏រយៈពេល ៥០ឆ្នាំទៅមុខទៀតដែរ៕ ដោយ ៖ កូឡាប
