ភ្នំពេញ៖ លោកទេសរដ្ឋមន្ត្រី ឱម យិនទៀង ជាប្រធានអង្គភាពប្រឆាំងអំពើពុករលួយ បានប្រកាសបើកសិក្ខាសាលាស្តីពី អ្នកសារព័ត៌មាន និងការប្រយុទ្ធប្រឆាំងអំពើពុករលួយ នៅអង្គភាពប្រឆាំងអំពើពុករលួយ នាព្រឹកថ្ងៃចន្ទ ទី២៥ ខែធ្នូ ឆ្នាំ២០១៧ ដែលមានការចូលរួមពីថ្នាក់ដឹកនាំ មន្ត្រីអង្គភាពប្រឆាំងអំពើពុករលួយ កងកម្លាំងសមត្ថកិច្ចមួយចំនួន និងអ្នកសារព័ត៌មាន តំណាងឲ្យអង្គភាពជាច្រើនស្ថាប័ន ។
វគ្គបណ្តុះបណ្តាលនេះបានធ្វើឡើងក្នុងគោលបំណងចំនួន៣សំខាន់ គឺពង្រឹងសមត្ថភាពលើអ្នកសារព័ត៌មាននិងច្បាប់ស្តីពីការប្រឆាំងអំពើពុករលួយ និងវិធានការប្រឆាំងអំពើពុករលួយនៅកម្ពុជា ។ ជំរុញលើកទឹកចិត្តឲ្យអ្នកសារព័ត៌មានសហការជាមួយអង្គភាពប្រឆាំងអំពើពុករលួយ កាន់តែជិតស្និទ្ធនិងជួយផ្សព្វផ្សាយអប់រំដល់យុវជន និងសាធារណជនចូលរួមប្រយុទ្ធប្រឆាំងអំពើពុករលួយនៅកម្ពុជា ។ ជាឱកាសឲ្យអ្នកសារព័ត៌មាន ពិភាក្សានិងផ្លាស់ប្តូរយោបល់គ្នា លើការរាយការណ៍នៃអំពើពុករលួយ និងបញ្ហាប្រឈមដែលបានកើតមាននិងជួបប្រទះ។
ក្នុងឱកាសនោះដែរ លោក ឱម យិនទៀង បានថ្លែងនិងពន្យល់ធ្វើបទបង្ហាញស្តីពី ទិដ្ឋភាពទូទៅនៃច្បាប់ នៃការប្រយុទ្ធប្រឆាំងអំពើពុករលួយ។ ក្នុងនោះ លោក ឃាង សេង អនុប្រធានអង្គភាពប្រឆាំងអំពើពុករលួយ ក៏បានអញ្ជើញឡើងធ្វើបទបង្ហាញស្តីពី បទល្មើសពុករលួយ និងអំណាចស៊ើបអង្កេត របស់អង្គភាពប្រឆាំងអំពើពុករលួយ។
សិក្ខាសាលានេះមានអត្ថប្រយោជន៍ខ្ពស់ក្នុងការចូលរួមក្នុងសមរភូមិដើម្បីលុបបំបាត់នូវអំពើពុករលួយ ក៏ដូចជាការជាប់ទោសទណ្ឌនៃការប្រព្រឹត្តអំពើពុករលួយ ខណៈប្រទេសជាតិគ្រប់គ្រងដោយច្បាប់ និងតម្រូវឲ្យមានសិទ្ធិទទួលខុសត្រូវតាមផ្លូវច្បាប់ស្មើៗគ្នា។
លោក ឱម យិនទៀង បានបន្តទៀតថា អង្គភាពប្រឆាំងអំពើពុករលួយបានរៀបចំសិក្ខាសាលាជាមួយអ្នកសារព័ត៌មាននាពេលនេះ សំដៅរួមគ្នាឲ្យមានមានប្រសិទ្ធភាពថែមទៀតក្នុងការប្រយុទ្ធប្រឆាំងអំពើពុករលួយ ៕ ដោយ៖កូឡាប
