ខេត្តកំពត៖ ព្រះវិហារកាតូលិក នៅលើកំពូលភ្នំបូកគោ ក្នុងឧទ្យានជាតិព្រះមុនីវង្សបូកគោ ត្រូវបានប្រគល់ទៅឱ្យព្រះសហគមន៍កាតូលិក នៅព្រះរាជាណាចក្រកម្ពុជា ដើម្បីគ្រប់គ្រង ជួសជុល និងប្រើប្រាស់ជាប្រយោជន៍ក្នុងវិស័យសាសនា។ ព្រះវិហារកាតូលិកនេះ ត្រូវបានកសាងឡើងតាំងពីសម័យសង្គមរាស្ត្រនិយម។
ពិធីប្រគល់ទទួលការប្រគល់ព្រះវិហារកាតូលិកនេះ នៅព្រឹកថ្ងៃទី២៤ ខែធ្នូ ឆ្នាំ២០១៧ ដែលមានលោក សាយ សំអាល់ រដ្ឋមន្ត្រីក្រសួងបរិស្ថានក៏បានអញ្ជើញជាអធិបតី។ នៅក្នុងពិធីប្រគល់ទទួលនេះ លោករដ្ឋមន្ត្រី បានគូសបញ្ជាក់ អំពីសារសំខាន់ នៃសុខដុមនីយកម្មផ្នែកសាសនា នៅក្នុងសង្គមជាតិយើង ដែលជាក់ស្តែងយើង មានវត្តអារាមខ្មែរ និងព្រះវិហារកាតូលិកនៅលើកំពូលភ្នំបូកគោនេះ។ លោករដ្ឋមន្ត្រី ក៏បានលើកឡើងផងដែរ អំពីតម្លៃមរតកវប្បធម៌ និងបេតិកភណ្ឌធម្មជាតិ នៅតាមទីតាំងប្រវត្តិសាស្ត្រនានា របស់កម្ពុជា ហើយក៏បានណែនាំឱ្យអ្នកពាក់ព័ន្ធទាំងអស់ចូលរួមការពារ អភិរក្ស និងប្រើប្រាស់បុរាណស្ថាន ទីសក្ការៈ បេតិកភណ្ឌធម្មជាតិទាំងអស់នេះ ដើម្បីជាប្រយោជន៍ក្នុងការលើកកម្ពស់តម្លៃវប្បធម៌ជាតិ និងការអភិរក្សជីវៈចម្រុះសម្រាប់មនុស្សគ្រប់ជំនាន់៕ ដោយ ៖ កូឡាប
