ខេត្តព្រះសីហនុ៖ ប្រជាពលរដ្ឋរស់នៅតាមខេត្តជាប់ឆ្នេរសមុទ្រចំនួន ៤ បានឲ្យដឹងថា ស្ថានភាពអាកាសធាតុ នៅខេត្តកែប កំពត និងខេត្តព្រះសីហនុ នាវេលាម៉ោងប្រមាណ៤ រសៀលថ្ងៃចន្ទ ទី២៥ ខែធ្នូ ឆ្នាំ២០១៧នេះ ផ្ទៃមេឃមានសភាពអួអាប់ និងមានភ្លៀងធ្លាក់ស្រិចៗ ពិសេសមូលដ្ឋានជាប់ឆ្នេរសមុទ្រ។
ទោះជាបែបនេះក្តី ស្ថានភាពអាកាសធាតុនេះ គឺមិនរំខានដល់ការធ្វើដំណើរកម្សាន្តតាមសមុទ្រ ឬការធ្វើដំណើរកម្សាន្ត ទៅតាមតាមបណ្តាកោះ របស់ភ្ញៀវទេសចរជាតិអន្តរជាតិនោះទេ ដោយមធ្យោបាយដឹកភ្ញៀវទេសចរ បានបន្តដំណើរការតាមធម្មតា គិតមកដល់ម៉ោងជាង ៤រសៀលថ្ងៃចន្ទ ទី២៥ ខែធ្នូ។
ទាក់ទិនបញ្ហានេះ លោក យូ វាសនា ដែលបាននាំក្រុមគ្រួសារ និងមិត្តភក្តិ ទៅទស្សនាតាមតំបន់ឆ្នេរមួយចំនួន រួមមានឆ្នេរ៖ កោះតូច ឆ្នេរសុខសាន្ត និងឆ្នេរឡុងសិតជាដើម នៅលើកោះរ៉ុង បានឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុ ដឹងថា នៅលើកោះរ៉ុង មិនមានភ្លៀងធ្លាក់ខ្លាំងទេប៉ុន្តែអាកាសធាតុ មានសភាពអាប់អួ ហើយរលឹមតិចៗ។ រីឯនៅលើផ្ទៃសមុទ្រវិញ មិនមានខ្យល់ព្យុះ និងរលកសមុទ្របោកបក់ខ្លាំង រំខានដល់មធ្យោយបាយ ដឹកភ្ញៀវទេសចរនោះទេ ហើយមធ្យោបាយដឹកជញ្ជូនមានដូចជា៖ ទូក និងកប៉ាល់ បានបន្តសកម្មភាពដឹកភ្ញៀវទេសចរជាធម្មតា។
ចំណែក ប្រជាពលរដ្ឋ មានលំនៅឋាន នៅទីប្រជុំជនខេត្តកោះកុង បានឲ្យដឹងដែរថា មូលដ្ឋាននេះ មានភ្លៀងធ្លាក់ តិចៗ មានខ្យល់បោកបក់ខ្លាំង និងរលកសមុទ្រធំៗ គិតត្រឹមរសៀលម៉ោងជាង ៤រសៀល ថ្ងៃចន្ទ ទី២៥ ខែធ្នូ ឆ្នាំ២០១៧។
ប្រជាពលរដ្ឋ ឲ្យដឹងថា អាកាសធាតុនៅខេត្តកោះកុង ថ្ងៃនេះ គឺផ្ទៃមេឃមានកំដៅថ្ងៃ នៅពេលព្រឹក ប៉ុន្តែបានអាប់អួ នៅពេលរៀល ប៉ុន្តែសង្កេតឃើញថា ការធ្វើដំណើរតាមសមុទ្រ ពិសេសប្រជានេសាទ បានចេញប្រកបមុខរបរធ្វើនេសាទសមុទ្រជាធម្មតា ដោយមិនមានការរំខានពីអាកាសធាតុនោះទេ៕ ដែន សីមា
