ភ្នំពេញ៖ ក្រសួងការងារបណ្តុះបណ្តាលនិងវិជ្ជាជីវៈ កាលពីថ្ងៃទី២៦ ខែធ្នូ ឆ្នាំ២០១៧ បានផ្សព្វផ្សាយនូវលិខិតផ្លូវការពីក្រុមហ៊ុន Walmart ជាក្រុមហ៊ុនយក្សរបស់អាមេរិក Walmart ដែលនាំចេញផលិតផលស្បែកជើងធំជាងគេពីប្រទេសកម្ពុជា និងជាក្រុមហ៊ុនដែលនាំចេញផលិតផលសម្លៀកបំពាក់លំដាប់ទី២ពីកម្ពុជា។
ក្រុមហ៊ុនយក្សរបស់អាមេរិក Walmart បានប្រកាសប្តេជ្ញាថា នឹងបន្តបញ្ជាទិញទំនិញពីប្រទេសកម្ពុជា និងបង្កើនការវិនិយោគនៅកម្ពុជា ហើយនៅឆ្នាំ២០១៨ ខាងមុខនេះ នឹងចាប់ផ្តើមនាំផលិតផលធ្វើដំណើរដូចជា កាបូប និងវ៉ាលីសពីកម្ពុជាផងដែរ។ ជាមួយនឹងការប្រកាសនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងថា ការប្តេជ្ញាចិត្តរបស់ក្រុមហ៊ុនយក្សរបស់អាមេរិក Walmart ដែលនាំចេញផលិតផលស្បែកជើងធំជាងគេពីប្រទេសកម្ពុជា ពេលនេះគឺជាការបរាជ័យរបស់អតីតមន្ត្រីបក្សប្រឆាំងដែលត្រូវរលាយ ឲ្យទទួលបរាជ័យធ្ងន់ធ្ងរ ក្រោយក្រុមហ៊ុននេះ ប្រកាសប្តេជ្ញាថា នឹងបន្តបញ្ជាទិញទំនិញកម្ពុជា និងបង្កើនការវិនិយោគនៅកម្ពុជា។
បើតាមសេចក្តីប្រកាសព័ត៌មាន ក្រុមហ៊ុនយក្សរបស់អាមេរិក Walmart បានកោតសរសើរកម្ពុជាថា ជាប្រទេសស្រស់ស្អាត ហើយចាត់ទុកសន្តិភាព ស្ថិរភាព ភាពអាចព្យាករណ៍បាន និងនីតិរដ្ឋ គឺជាកត្តាសំខាន់ ដែលក្រុមហ៊ុនមួយនេះយកធ្វើជាមូលដ្ឋានក្នុងការបន្តបញ្ជាទិញ និងពង្រីកការវិនិយោគរបស់ខ្លួននៅប្រទេសមួយ។
ក្រុមហ៊ុន Walmart បានអះអាងដូច្នេះក្នុងលិខិតផ្លូវការមួយ ដែលបានផ្ញើជូនលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី៦ ខែធ្នូកន្លងទៅ ដើម្បីថ្លែងអំណរគុណដល់លោករដ្ឋមន្ត្រី ដែលបានទទួលជួបពិភាក្សាការងារ និងផ្លាស់ប្តូរព័ត៌មានអំពីភាពកាន់តែប្រសើរនៃលក្ខខណ្ឌការងារនៅកម្ពុជា ជាពិសេសកិច្ចខិតខំប្រឹងប្រែងបន្ថែមទៀត របស់សម្តេចតេជោ ហ៊ុន សែន នាយករដ្ឋមន្ត្រី ក្នុងការពង្រឹងលក្ខខណ្ឌការងារ និងបង្កើនការគាំពារសង្គមជូនកម្មករកម្មការិនីទាំងនៅក្នុងនិងក្រៅប្រព័ន្ធ។
ក្នុងពេលជួបពិភាក្សាការងារកន្លងទៅនេះ ក្រុមហ៊ុន Walmart ក៏បានវាយតម្លៃខ្ពស់ចំពោះកិច្ចខិតខំ ប្រឹងប្រែងរបស់រាជរដ្ឋាភិបាលកម្ពុជាក្នុងការផ្តល់ភាពស្របច្បាប់ដល់ពលករកម្ពុជានៅប្រទេសថៃ ក៏ដូចជាចំពោះកិច្ចខិតខំប្រឹងប្រែងការពារ និងផ្តល់សិទ្ធិសេរីភាព ជូនពលករកម្ពុជាយ៉ាងពេញលេញ ក្នុងការសម្រេចចិត្តចេញទៅធ្វើការងារនៅក្រៅប្រទេស ក្នុងនោះក៏មានធ្វើការនៅតាមបណ្តាអ្នកផ្គត់ផ្អង់ឱ្យទៅក្រុមហ៊ុន Walmart ផងដែរ។ ក្រុមហ៊ុននេះក៏បាន ប្តេជ្ញាថា នឹងចែករំលែកបទពិសោធន៍ល្អៗពាក់ព័ន្ធនឹងបង្កើនភាពប្រកួតប្រជែង ផលិតភាព និងប្រសិទ្ធភាពដល់រោងចក្រ ដែលផ្គត់ផ្គង់ផលិតផលដល់ខ្លួន។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថាសេចក្តីប្រកាសទាន់ពេលវេលារបស់ក្រុមហ៊ុនយក្ស Walmart គឺជាការលើកទឹកចិត្តកម្មករនិយោជិតកម្ពុជា ឲ្យកាន់តែមានកម្លាំងចិត្ត និងមានក្តីសង្ឃឹមចំពោះអនាគតការងាររបស់ខ្លួនតទៅថ្ងៃមុខទៀត។
សូមបញ្ជាក់ថា នាថ្មីៗនេះ កញ្ញា កឹម មនោវិទ្យា និងអតីតក្រុមដឹកនាំអតីតគណបក្សប្រឆាំង ដែលកំពុងបោះទីតាំងឈរជើងនៅលើទឹកដីលោកខាងលិច នៅតែបន្តធ្វើសកម្មភាពវាយប្រហារមកលើប្រទេសរបស់ខ្លួនដែលបច្ចុប្បន្នកំពុងដឹកនាំប្រមុខរាជរដ្ឋាភិបាលកម្ពុជា គឺសម្តេចតេជោហ៊ុនសែន ហើយកូនស្រីលោកកឹម សុខា រូបនេះ នៅតែជំរុញឲ្យសហគមន៍អឺរ៉ុប ដាក់ទណ្ឌកម្មសេដ្ឋកិច្ច មកលើប្រទេសកម្ពុជា តាមរយៈការស្នើឲ្យកាត់ផ្តាច់ការអនុគ្រោះពន្ធ និងការបិទការនាំចូលពីកម្ពុជា ក្នុងគោលបំណងធ្វើឲ្យប៉ះពាល់ដល់ជីវភាពរបស់កម្មករខ្មែរ រាប់លាននាក់ ដែលកំពុងរស់នៅដោយពឹងផ្អែកលើវិស័យកាត់ដេរ និងធ្វើឱ្យប៉ះពាល់ដល់រាជរដ្ឋាភិបាលកម្ពុជា៕ ដោយ៖បញ្ញាស័ក្តិ
