ភ្នំពេញ ៖ ប្រធានគណបក្សយុវជនកម្ពុជាបានលើកឡើងថាអ្នកឃ្លាំមើលការអនុវត្តច្បាប់ លោកសូមស្នើដល់លោក នេត សាវឿន និងអ្នកអនុវត្តច្បាប់ដទៃទៀត សូមចាត់ការបុគ្គលនេះតាមវិន័យច្បាប់ឲ្យបានតឹងរឹងបំផុត ដើម្បីធានាបាននូវការពង្រឹងអំណាចច្បាប់ និងលើកមុខមាត់ស្ថាប័នកងកម្លាំងឡើងវិញ ។ ជាមួយករណីនេះដែរអ្នកនាំពាក្យអគ្គនាយកដ្ឋានពន្ធនាគារតាមរយៈសំណេររបស់លោកក្នុងន័យបញ្ឆិតបញ្ឆៀងនោះក៏បានលើកឡើងផងដែរថាបើខ្ញុំច្រឡំពាក់ចិញ្ជៀនពេជ្រចូលដៃហើយដើរចេញទៅបាត់កុំចោទថាខ្ញុំចោរឲ្យសោះ។
លោកពេជ្រស្រស់ប្រធានគណបក្សយុវជនកម្ពុជានិងជាសមាជិកឧត្តមក្រុមប្រឹក្សាពិគ្រោះនិងផ្ដល់យោបល់នៅថ្ងៃទី 31 ខែឧសភានេះបានសរសេរលើហ្វេសប៊ុកថា ករណីនេះមិនត្រូវបញ្ចប់ដោយបែបនេះទេ ពីព្រោះទង្វើរនេះ គឺ ជាទង្វើបន្ថោកបន្ទាប ដល់កេរ្តិ៍ឈ្មោះ មន្ត្រីប៉ូលីសផ្សេងទៀត ហើយក៏អោយមហាជនអស់ជំនឿលើអ្នកអនុវត្តច្បាប់ផងដែរ ដូច្នេះគឺក្នុងនាមខ្ញុំជាអ្នកឃ្លាំមើលការអនុវត្តច្បាប់ ខ្ញុំសូមស្នើដល់ឯកឧត្តម នេត សាវឿន និងអ្នកអនុវត្តច្បាប់ដទៃទៀត សូមចាត់ការបុគ្គលនេះតាមវិន័យច្បាប់ឲ្យបានតឹងរ៉ឹងបំផុត ដើម្បីធានាបាននូវការពង្រឹងអំណាចច្បាប់ និងលើកមុខមាត់ស្ថាប័នកងកម្លាំងឡើងវិញ”។
ជាមួយនឹងករណីនេះដែរលោកនុត សវនា អ្នកនាំពាក្យអគ្គនាយកដ្ឋានពន្ធនាគារ នៅថ្ងៃទី 31 ឧសភា ក៏បានសរសេរលើហ្វេសប៊ុកផងដែរថា “ជូនចំពោះបងប្អូនអ្នកលក់ពេជ្យទាំងឡាយ បើខ្ញុំលួចហើយ ច្រឡំដើរចេញទៅបាត់ដោយមិនបានបង់ប្រាក់ សូមកុំចោទខ្ញុំថាចោរ ចាំខ្ញុំនឹកឃើញយកមកសងពេលណា យើងរួចគ្នាពេលនោះ”។
សូមបញ្ជាក់ផងដែរថា មន្ដ្រីនគរបាលពាក់ស័ក្ដិ៣ ដែលបន្លំលួច iPad មិនមែនជាករណីលួចទេ គឺជាករណីច្រឡំ នេះជាការលើកឡើងរបស់លោកនាយឧត្តមសេនីយ៍អគ្គស្នងការនគរបាលជាតិ។ លោកនាយឧត្តមសេនីយ៍នេតសាវឿន អគ្គស្នងការនគរបាលជាតិ បានបញ្ជាក់ថា ករណីមន្ដ្រីនគរបាលពាក់ស័ក្ដិ៣ ដែលបន្លំលួច iPad នៅហាងវេរលុយវីងនោះ មិនមែនជាករណីលួចទេ គឺជាករណីច្រឡំ ហើយភាគីទាំងពីរទាំងខាងម្ចាស់ហាង និងមន្ត្រីនគរបាល ក៏បានសម្របសម្រួលបញ្ចប់។
មន្ដ្រីនគរបាលពាក់ស័ក្ដិ៣ នៅនាយកដ្ឋានការពារព្រំដែនទឹក ដែលបន្លំលួច iPad មួយគ្រឿង នៅហាងវីងមួយកន្លែង នៅខណ្ឌទួលគោក ហើយត្រូវបានបញ្ជូនបន្ដមកសួរនាំ នៅនាយកដ្ឋាននគរបាលព្រហ្មទណ្ឌនោះ នៅពេលនេះសមត្ថកិច្ចបានអនុញ្ញាតឲ្យត្រឡប់ទៅផ្ទះវិញហើយ ក្រោយធ្វើកិច្ចសន្យា និងមានអ្នកធានា។
នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានថ្លែងប្រាប់ ឲ្យដឹងនៅព្រឹកថ្ងៃទី៣១ ខែឧសភា ឆ្នាំ២០១៩នេះថា បន្ទាប់ពីបញ្ចប់ការសួរនាំនៅ នាយកដ្ឋាននគរបាលព្រហ្មទណ្ឌ មន្ដ្រីនគរបាលខាងលើ ត្រូវបានអនុញ្ញាតឲ្យត្រឡប់ទៅផ្ទះវិញហើយ ក្រោយធ្វើកិច្ចសន្យាអប់រំ និងអ្នកធានាត្រឹមត្រូវ។ ករណីនេះ មិនមែនជាករណីលួចទេ គឺជាករណីច្រឡំ ហើយភាគីទាំងពីរទាំងខាងម្ចាស់ហាង និងមន្ត្រីនគរបាល ក៏បានសម្របសម្រួលបញ្ចប់ហើយដែរ។ ម្ចាស់ហាងក៏មិនបានដាក់ពាក្យបណ្តឹងអ្វីដែរ។
មន្ត្រីនគរបាលពាក់ស័ក្តិ៣ បានធ្វើសកម្មភាពលួច iPad ក្នុងហាងមួយកន្លែង និងត្រូវម្ចាស់ហាងយកវីដេអូដែលថតដោយកាមេរ៉ាសុវត្ថិភាព មកបង្ហោះតាមបណ្តាញទំនាក់ទំនងសង្គមហេ្វសប៊ុក កាលពីថ្ងៃទី៣០ ខែឧសភា ឆ្នាំ២០១៩ ធ្វើឲ្យមហាជនមានការចាប់អារម្មណ៍ និងរិះគន់ជាខ្លាំង។
បើតាមការបញ្ជាក់បានឱ្យដឹងថា មន្ត្រីនគរបាលរពឹសដៃរូបនោះមានឈ្មោះហេង ហាប់ អាយុ២៥ឆ្នាំ បម្រើការងារនៅនាយកដ្ឋានព្រំដែនទឹក ក្រសួងមហាផ្ទៃ។
លោក សុខ ហេង អធិការនគរបាលខណ្ឌទួលគោក បានឲ្យដឹងថា ក្រោយមានព័ត៌មាននេះភ្លាម កម្លាំងនគរបាលរបស់លោក សហការជាមួយកម្លាំងនគរបាលសន្ដិសុខ នៃស្នងការដ្ឋាននគរបាលរាជធានីភ្នំពេញ ក្រោមការបញ្ជារបស់លោកឧត្តមសេនីយ៍ស្នងការ បានចុះស្រាវជ្រាវ បុរសម្នាក់ដែលពាក់ឯកសណ្ឋានជានគរបាល និងពាក់ស័ក្ដិ៣ ចូលទៅលួច iPad មួយគ្រឿង ក្នុងហាងមួយកន្លែងនៅខណ្ឌទួលគោក។
សូមបញ្ជាក់ថា មន្ត្រីនគរបាលរូបនេះ កាលពីព្រឹកថ្ងៃទី៣០ ខែឧសភា ឆ្នាំ២០១៩ បានចូលទៅដកលុយនៅហាងវីង រស្មី សាមគ្គី ស្ថិតនៅក្នុងខណ្ឌទួលគោក ស្រាប់តែបន្លំលួចយក iPad មួយគ្រឿងទៅបាត់ រួចក៏ត្រូវម្ចាស់ហាងយកទៅបង្ហោះល្បីពេញបណ្តាញសង្គម Facebook និងមានគេ Share រាប់ពាន់នាក់។
ក្រោយពីបានបង្ហោះវីដេអូ នៃការលួចបន្លំ iPad ខាងលើនេះ នាំឲ្យមានប្រតិកម្មយ៉ាងខ្លាំងៗ ពីមហាជននៅលើបណ្តាញសង្គម Facebook នោះស្រាប់តែនៅល្ងាចថ្ងៃដដែលនេះ ម្ចាស់ Account leakhenana Jeanana បានលុបចោលវីដេអូនេះចេញបាត់ ហើយបានបង្ហោះខ្លឹមសារថ្មីថា ជាការយល់ច្រឡំទៅវិញ។
Account Facebook ដែលជាម្ចាស់ហាងរូបនេះ បានបង្ហោះយ៉ាងដូច្នេះថា មុននេះមានករណីបាត់ iPad ដោយបងប៉ូលីសម្នាក់ បានមកដកលុយរួចកាន់យកទៅ។ ប្រហែល ២ម៉ោងក្រោយ ខ្ញុំបានបង្ហោះ Facebook ពេលនេះ គាត់បានប្រគល់ iPad មកឲ្យខ្ញុំវិញហើយ ដោយគាត់និយាយថា គាត់យល់ច្រឡំកាន់ចេញទៅ។
សម្រាប់ប្រជាពលរដ្ឋជាច្រើននៅតាមបណ្តាញសង្គម និងថ្នាក់ដឹកនាំនគរបាល ហាក់មិនជឿនោះឡើយ។ តាមរយៈសកម្មភាពនៅក្នុងវីដេអូខាងលើនេះ បានបង្ហាញថា ជាទង្វើលួចដោយទុច្ចរិតយ៉ាងពិតប្រាកដ ដែលត្រូវទទួលទោសតាមច្បាប់ និងប៉ះពាល់ដល់កិត្តិយសនគរបាលជាតិ៕ ដោយ៖កូឡាប
