កំពង់ឆ្នាំង៖ ស្ត្រីម្នាក់បានស្លាប់ភ្លាមៗនៅនឹងកន្លែងកើតហេតុ ដោយសារម៉ូតូបុកក្នុងខណៈដែលជនរងគ្រោះដើរឆ្លងផ្លូវទៅទិញកំប៉ុងហ្គាស។ ដោយឡែកខាងភាគីម៉ូតូជាក្មេងស្រីជំទងជិះឌុបគ្នា៤នាក់រងរបួសធ្ងន់និងស្រាល ។
ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោងជាង៦ល្ងាចថ្ងៃទី២៨ ខែធ្នូ ឆ្នាំ២០១៧នៅលើកំណាត់ផ្លូវជាតិលេខ៥ ខាងមុខសាលាសង្កាត់ខ្សាម ក្រុងកំពងឆ្នាំង។
នៅកន្លែងកើតហេតុប៉ូលីសចរាចរណ៍បានឲ្យដឹងថា ស្ត្រីជនរងគ្រោះដែលស្លាប់ក្នុងហេតុការណ៍គ្រោះថ្នាក់ចរាចរណ៍នេះឈ្មោះលឹម សុវណ្ណា អាយុ៦២ឆ្នាំ មានទីលំនៅក្នុងភូមិ សង្កាត់ន្លែងកើតហេតុខាងលើនិងជាអតីតជាគ្រូបង្រៀនចូលនិវត្តន៍។ រីឯភាគីខាងម៉ូតូ ១.ឈ្មោះ កុសល ភេទស្រី អាយុ១៧ឆ្នាំ រងរបួសធ្ងន់(អ្នកបើកបរ) ២,ឈ្មោះ អឹម ថារី ភេទស្រី អាយុ១៧ឆ្នាំ រងរបួសស្រាល ៣,ឈ្មោះ អេង ឈាងហុង ភេទស្រី អាយ១៨ឆ្នាំ រងរបួសស្រាល និង ៤,ឈ្មោះ ឆន ផល អាយុ១៨ឆ្នាំ រងរបួសស្រាល។ ពួកគេទាំង៤នាក់ជាសិស្ស និងមានស្រុកកំណើត នៅឃុំជលសារ ស្រុកជលគិរី ខេត្តកំពង់ឆ្នាំង ។
ប៉ូលិសបានឲ្យដឹងថា នៅមុនពេលកើតហេតុស្ត្រីរងគ្រោះ បានដើរឆ្លងផ្លូវជាតិលេខ៥ ដើម្បីទៅដូរកំប៉ុងហ្គាស់។ ពេលដើរដល់ទ្រូងផ្លូវស្រាប់តែមានរថយន្ត១គ្រឿងបើកពីកើតទៅលិចខណៈនោះស្រីរងគ្រោះបានថយក្រោយមកវិញ ក៏ត្រូវម៉ូតូមួយគ្រឿងពាក់ស្លាកលេខបន្ទាយមានជ័យ ១H.៥៤៧៩ ជិះឌុបគ្នា៤នាក់ បើកក្នុងល្បឿនយ៉ាងលឿន បានជ្រុកទៅបុក ស្ត្រីរងគ្រោះពេញមួយទំហឹងបណ្តាលឲ្យជន រងគ្រោះដួលបោកក្បាលនឹងថ្នល់ជាតិស្លាប់នៅនឹងកន្លែងតែម្តង។ រីឯភាគីខាងម៉ូតូជាក្មេងស្រីជំទង់ជិះឌុបគ្នា៤នាក់បានរងរបួសធ្ងន់ និងស្រាលត្រូវបានគេដឹកយកទៅសង្គ្រោះមន្ទីរពេទ្យបង្អែកខេត្តកំពង់ងឆ្នាំង ៕ ដោយ៖ ចៅ សន
