ខេត្តព្រះសីហនុ៖ ថ្នាក់ដឹកនាំរដ្ឋបាលខេត្តព្រះសីហនុ និងសភាពាណិជ្ជកម្មខេត្តនេះ បានសហការរៀបចំកម្មវិធីប្រគុំតន្ត្រីសម័យ ព្រមទាំងតាំងពិព័រណ៍ផលិតផលទំនិញរាប់រយស្តង់ ដើម្បីស្វាគមន៍ភ្ញៀវទេសចរជាតិអន្តរជាតិ ដែលចូលមកទស្សនាខេត្តនេះ នាឱកាសពិធីបុណ្យឆ្លងឆ្នាំសកលឆ្នាំ២០១៧-២០១៨ ឲ្យមានភាពសប្បាយរីករាយ។
បុណ្យឆ្លងឆ្នាំសកលឆ្នាំនេះ លោក យន្ត មីន អភិបាលខេត្តព្រះសីហនុ បានអំពាវនាវដល់ប្រជាពលរដ្ឋ នៅទូទាំងប្រទេសកម្ពុជា ឬភ្ញៀវទេសចរជាតិអន្តរជាតិ ឲ្យចូលមកទស្សនាខេត្តជាប់ឆ្នេរសមុទ្រមួយនេះ ឲ្យបានច្រើនកុះករ ព្រោះរដ្ឋបាលខេត្តនេះ បានត្រៀមរៀបចំកម្មវិធីកម្សាន្តជាច្រើនប្រភេទ រង់ចាំស្វាគមន៍ភ្ញៀវទេសចរក្នុងរយៈពេល ៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ ខែធ្នូ ឆ្នាំ២០១៧។ ជាពិសេសជាងនេះ លោកថា រដ្ឋបាលខេត្ត ក៏បានត្រៀមកម្លាំងការពារសន្តិសុខ ជូនភ្ញៀវទេសចរនៅគ្រប់ច្រកល្ហកទាំងយប់ថ្ងៃ ដើម្បីរក្សាសុវត្ថិភាពភ្ញៀវទេសចរ ដោយការទទួលខុសត្រូវខ្ពស់។
ពិធីបុណ្យឆ្លងឆ្នាំសកលឆ្នាំនេះ រដ្ឋបាលខេត្តព្រះសីហនុ សហការជាមួយសភាពាណិជ្ជកម្មខេត្តនេះ បានរៀបចំពិធីក្រុងពាលី កាលពីព្រឹកថ្ងៃទី២៩ ខែធ្នូ ឆ្នាំ២០១៧ ដើម្បីទទួលស្វាគមន៍ភ្ញៀវទេសចរ នៅទីតាំងប្រារព្វពិធី នាឆ្នេរឯករាជ្យ។
នាឱកាសនោះ លោក យន្ត មីន មានប្រសាសន៍ថា រដ្ឋបាលខេត្ត និងសភាពាណិជ្ជកម្មខេត្តនេះ បានរៀបចំកម្មវិធីប្រគំតន្ត្រីសម័យ ដោយមានតារាចំរៀង ប្រចាំផលិតកម្មល្បីៗ នៅក្នុងព្រះរាជាណាចក្រកម្ពុជា មកចូលរួមសម្តែង រយៈពេល ៣យប់ជាប់ៗគ្នា និងមានចាក់ផ្សាយបន្តផ្ទាល់តាមកញ្ចក់ទូរទស្សន៍ក្នុងស្រុកផងដែរ។ លោកបន្តថាវង់តន្ត្រីសម័យ មិនតិចជាង ៥ក្រុមហ៊ុនទេ បានមកអង្រួនរាត្រីឆ្លងឆ្នាំសកល ២០១៧- ២០១៨ នាខេត្តព្រះសីហនុ ដើម្បីផ្តល់ភាពសប្បាយរីករាយជូនភ្ញៀវទេសចរជាតិអន្តរជាតិ ពិសេសប្រជាពលរដ្ឋមកពីគ្រប់ទិសទី នៃប្រទេសកម្ពុជា។
លោក យន្ត មីន ឲ្យដឹងដូច្នេះ រួមបន្ថែមថា ពិធីឆ្លងឆ្នាំសកលឆ្នាំនេះ ក៏មានស្តង់តាំងលក់ផលិតផលផ្សេងៗរាប់រយស្តង់ នៅឆ្នេរឯករាជ្យ ដើម្បីស្វាគមន៍ភ្ញៀវទេសចរ និងផ្តល់ជម្រើសកម្សាន្តជូនភ្ញៀវទេសចរ។
ផ្តើមពីបញ្ហានេះ លោក យន្ត មីន បានអំពាវនាវ និងប្រកាសស្វាគមន៍ភ្ញៀវទេសចរជាតិ និងអន្តរជាតិ មកពីគ្រប់ទិសទី ទាំងក្នុង និងក្រៅប្រទេស ឲ្យចូលមកទស្សនាខេត្តព្រះសីហនុ នាឱកាសឆ្លងឆ្នាំសកល ចាប់ពីថ្ងៃទី២៩ ដល់ថ្ងៃទី៣១ ខែធ្នូ ឲ្យបានច្រើនកុះករ ជាពិសេសមកចូលរួមទស្សនា សោភ័ណភាពភ្លើងបំភ្លឺចម្រុះពណ៌នៅតាមសួនច្បារ និងតាមផ្លូវសាធារណៈ នាពេលរាត្រី ដែលរដ្ឋបាលខេត្តព្រះសីហនុ សហការជាមួយសភាពាណិជ្ជកម្មខេត្តនេះ ទើបបានអភិវឌ្ឍថ្មី សម្រាប់ផ្តល់ជូនភ្ញៀវទេសចរជាតិអន្តរជាតិ ក៏ដូចជាបង្ហាញពីភាពរីកចម្រើន របស់រដ្ឋបាលខេត្តព្រះសីហនុ ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាអ្នកដឹកនាំដ៏ល្អ។
ងាកមក លោកឧកញ៉ា ឡាវ កាំង ប្រធានសភាពាណិជ្ជកម្មខេត្តព្រះសីហនុ ដែលបានរួមចំណែកក្នុងការរៀបចំកម្មវិធីកម្សាន្តឆ្លងឆ្នាំសកលឆ្នាំ២០១៧- ២០១៨នេះ មានប្រសាសន៍ថា ស្ថាប័នលោកបានចំណាយថវិកាជាង ១០ម៉ឺនដុល្លារសហរដ្ឋអាមេរិក ដើម្បីរៀបចំកម្មវិធីឆ្លងឆ្នាំសកលឆ្នាំនេះ។ ក្នុងនោះបានរៀបចំឲ្យមានកម្មវិធីកម្សាន្តមួយចំនួន ជូនភ្ញៀវទេសចរ រួមមានការប្រគំតន្ត្រីសម័យ ដែលមានតារាចម្រៀងល្បីៗ កំពុងពេញនិយម នៅក្នុងប្រទេសកម្ពុជា ចូលរួមសម្តែង ជូនភ្ញៀវទេសចរ រយៈពេល ៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ ខែធ្នូឆ្នាំ២០១៧។
លោកឧកញ៉ា ឡាវ កាំង បន្ថែមថា គោលបំណង នៃការបង្កើតកម្មវិធីកម្សាន្តផ្សេងៗ ដោយចំណាយលុយអស់រាប់សែនដុល្លារ របស់សភាពាណិជ្ជកម្មនៅពេលនេះ ប្រយោជន៍ចង់ផ្តល់ជម្រើសជូនប្រជាពលរដ្ឋ ពិសេសភ្ញៀវទេសចរជាតិអន្តរជាតិ ដែលចូលមកទស្សនាខេត្តព្រះសីហនុ នាឱកាសពិធីបុណ្យឆ្លងឆ្នាំសកលឆ្នាំនេះ មិនឲ្យខុសបំណង និងទទួលបានភាពសប្បាយរីករាយ ដើម្បីបំបាត់ទុក្ខកង្វល់ផ្សេងៗ ដែលមាននៅឆ្នាំចាស់កន្លងទៅ។
លោកបន្តថា ឆ្លងឆ្នាំសកលឆ្នាំនេះ មានវង់តន្ត្រីសម័យ មិនតិចជាង ៥ក្រុមហ៊ុនទេ បានមកប្រគំសម្តែង ជូនភ្ញៀវទេសចរ ព្រមទាំងមានដាក់តាំងពិព័រណ៍ផលិតផលលក់ទំនិញគ្រប់ប្រភេទ ជូនភ្ញៀវទេសចរ ដែលចូលមកកម្សាន្តនាខេត្តព្រះសីហនុ។ ជាងនេះ ការប្រគុំតន្ត្រីសម័យ ដែលរៀបចំដោយសភាពាណិជ្ជកម្មខេត្តព្រះសីហនុ ក៏មានផ្សាយបន្តផ្ទាល់តាមកញ្ចក់ទូរទស្សន៍ក្នុងស្រុកផង ដើម្បីទាក់ទាញភ្ញៀវទេសចរជាតិ និងអន្តរជាតិ ឲ្យចូលមកទស្សនាខេត្តនេះ បានកាន់តែច្រើនថែមទៀត។
ត្រង់ចំណុចនេះ លោកឧកញ៉ា ឡាវ កាំង មានមោទនៈភាពថា បុណ្យឆ្លងឆ្នាំសកលឆ្នាំនេះ នឹងផ្តល់ជម្រើសសប្បាយរីករាយទ្វេដងជូនភ្ញៀវទេសចរជាតិអន្តរជាតិ ប្រសិនបើពួកគេ ជ្រើសយក ខេត្តទេសចរណ៍ជាប់ឆ្នេរសមុទ្រមួយនេះ សម្រាប់ដំណើរកម្សាន្តឆ្លងឆ្នាំសកលឆ្នាំ២០១៧ ឆ្នាំ២០១៨នេះ។
យ៉ាងនេះក្តី ភ្ញៀវទេសចរជាតិភាគច្រើន ពួកគេបានបង្ហាញការព្រួយបារម្ភ ចំពោះតម្លៃសេវាស្នាក់ និងម្ហូបអាហារ នាពិធីបុណ្យឆ្លងឆ្នាំសកលឆ្នាំនេះ ខ្លាចត្រូវប្រតិបត្តិករទេសចរមូលដ្ឋាននេះ តម្លើងតម្លៃខ្ពស់កប់ពពក ជាពិសេសមិនមានសណ្ឋាគារ ឬផ្ទះសំណាក់ ឲ្យបានគ្រប់ចំនួន សម្រាប់ ឲ្យពួកគេជួលស្នាក់នៅទៀតទេ ព្រោះទទួលបានព័ត៌មានមកថា សណ្ឋាគារ និងផ្ទះសំណាក់ភាគច្រើន ត្រូវអ្នកវិនិយោគជនជាតិចិន ជួលធ្វើកាស៊ីណូ និងក្លឹបកម្សាន្តផ្សេងៗ ស្ទើទាំងស្រុងទៅហើយ។
ភ្ញៀវទេសចរជាតិមួយចំនួន ដែលមានបំណងចូលមកទស្សនាខេត្តព្រះសីហនុ នាឱកាសបុណ្យឆ្លងឆ្នាំសកលឆ្នាំនេះ បង្ហាញការព្រួយបារម្ភ ខ្លាចតម្លៃសេវាស្នាក់នៅ ថ្លៃជួលទីកន្លែងអង្គុយ និងតម្លៃម្ហូបអាហារ ត្រូវប្រតិបត្តិករមូលដ្ឋានេះ បានកំណត់តម្លៃខ្ពស់ ខុសពីថ្ងៃធម្មតាទ្វេដង ព្រោះតាមការកត់សម្គាល់កន្លងមក នៅពេលមានពិធីបុណ្យជាតិធំៗ ឬពិធីបុណ្យឆ្លងឆ្នាំសកលចូលមកដល់ម្តងៗ ជាហេតុនាំឲ្យពួកគេខ្លាចរអា និងរារែក ក្នុងការធ្វើដំណើរកម្សាន្តមកកាន់ ខេត្តព្រះសីហនុនាពេលកន្លងមកនេះ។
យ៉ាងណាក៏ដោយចុះ លោក យន្ត មីន អភិបាលខេត្តព្រះសីហនុ នៅតែទទូច និងអំពាវនាវដល់ភ្ញៀវទេសចរជាតិអន្តជាតិ ឲ្យចូលមកទស្សនាខេត្តនេះនាឱកាសឆ្លងឆ្នាំសកល ២០១៧- ២០១៨នេះ ឲ្យបានច្រើន ដើម្បីលុបបំបាត់ ឬជម្រះនូវទុក្ខកង្វល់ផ្សេងៗ ដែលកើតមានសម្រាប់ឆ្នាំចាស់នាពេលកន្លងមទៅនេះ។ ជាងនេះទៀត លោកថា កម្លាំងសមត្ថកិច្ចជំនាញគ្រប់ស្ថាប័ន មានកម្លាំងនគរបាល និងកងរាជអាវុធហត្ថខេត្តព្រះសីហនុ ជាដើម បានត្រៀមកម្លាំងការពារសន្តិសុខជូនភ្ញៀវទេសចរ នៅតាមគោលដៅនានាទាំងយប់ថ្ងៃ ដោយការទទួលខុសត្រូវខ្ពស់ ជាពិសេសបានពង្រាយកម្លាំងប្រចាំការនៅតាមរមណីយដ្ឋានធម្មជាតិ និងតាមតំបន់ឆ្នេរនានា ទាំងឆ្នេរសមុទ្រនៅលើកោះជាដើម ដែលភ្ញៀវទេសចរជាតិ និងអន្តរជាតិ និយមចូលទៅកម្សាន្ត៕ ដែន សីមា
