បន្ទាយមានជ័យ៖ នៅថ្ងៃទី៣០ ខែធ្នូ ឆ្នាំ២០១៧ យុវជន និងយុវនារីចំនួន១២នាក់ ជាជនសង្ស័យលួចលក់និងជក់គ្រឿងញៀន ត្រូវបានកសាងសំណុំរឿងបញ្ជូនទៅតុលាការចេញដីការឃុំឃាំង និងមួយចំនួនធំបញ្ជូនទៅមណ្ឌលអប់រំស្តារនីតិសម្បទា ។
ជនទាំងនោះត្រូវកំលាំងនគរបាលក្រុងសិរីសោភ័ណ ធ្វើការបង្ក្រាបកាលពីម៉ោង ២រសៀល ថ្ងៃទី២៩ ខែធ្នូ ឆ្នាំ២០១៧ ក្នុងបន្ទប់ជួលលេខ ២០៧ ក្នុងផ្ទះសំណាក់ម្កុដមាស ភូមិ ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
សមត្ថកិច្ចអោយដឹងថា ដំបូងគេបានឃាត់ខ្លួនជនសង្ស័យបានចំនួន ២នាក់(ស្រី ១នាក់) ឆែកឆេរកឃើញវត្ថុតាងថ្នាំញៀនចំនួន ៥កូនថង់តូច ជញ្ជីងថ្លឹងថ្នាំញៀន ១ កូនថង់សម្រាប់ច្រកថ្នាំញៀន សម្ភារៈសម្រាប់ប្រើប្រាស់សារធាតុញៀនមួយចំនួន ម៉ូតូ១គ្រឿង។ គេបានបន្តឃាត់ខ្លួនអ្នកប្រើប្រាស់បានចំនួន ១០នាក់(ស្រី១នាក់) និងចុងក្រោយបន្តថែមទៀតសរុបមានចំនួន១២នាក់ ។
លោកឧត្តមសរនីយ៍ចាប សុផាឬទ្ធិ ស្នងការរងខេត្តបន្ទាយមានជ័យទទួលបន្ទុកបង្ក្រាបគ្រឿងញៀនបានឲ្យដឹងថា: សមត្ថកិច្ចទទួលព័ត៌មានពីប្រជាពលរដ្ឋ ទើបឆ្មក់ចុះបង្ក្រាបបានជនសង្ស័ប្រុសស្រី១២នាក់នោះ តែម្តង។ សង្ស័យបានទទួលស្គាល់ថា ពួកខ្លួនខ្លួនបានលួកលក់ និងជក់គ្រឿងញៀននេះដោយសារតែធ្វើតាមគ្នា មានគេបង្ខំនិងធ្លាក់ខ្លួនជាអ្នកសេពគ្រឿងញៀនរហូតញៀន កែលែងបាន ។
ប៉ូលិសបានកសាងសំណុំរឿងបញ្ជូនជនទាំងនេះទៅតុលាការដើម្បីចាត់ការបន្តនិងចេញដីកាឃុំខ្លួនបណ្តោះអាសន្ន៕ ដោយ៖បន្ទាយ