ស្វីស៖ គណៈប្រតិភូសហភាពអឺរ៉ុប ចក្រភពអង់គ្លេស បារាំង និងអូស្ត្រាលី បានចោទប្រកាន់ មកលើរាជរដ្ឋាភិបាលកម្ពុជា ដោយខុសឆ្គងថា ការអនុវត្តច្បាប់នៅ ក្នុងប្រទេសកម្ពុជា បានធ្វើឲ្យលំហូរ នៃសិទ្ធិសេរីភាព ក្នុងការបញ្ចេញមតិរួមតូច។
ជាមួយករណីចោទប្រកាន់នេះ ស្ថានបេសកកម្មអចិន្ត្រៃយ៍ នៃព្រះរាជាណាចក្រកម្ពុជា ប្រចាំអង្គការសហប្រជាជាតិ និងអង្គការ អន្តរជាតិនានា នៅទីក្រុងហ្សឺណែវ សហព័ន្ធស្វីស បានចេញសេចក្តីឆ្លើយតប ក្នុងសម័យប្រជុំ លើកទី៤១ នៃក្រុមប្រឹក្សាសិទ្ធិមនុស្ស អង្គការសហប្រជាជាតិ ថ្ងៃទី២៥ ខែមិថុនា ឆ្នាំ២០១៩ តំណាងអចិន្រ្តៃយ៍កម្ពុជា ប្រចាំអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ ប្រទេសស្វីស បានឆ្លើយតបចំពោះ គណៈប្រតិភូអឺរ៉ុប ដែលបានចោទប្រកាន់ថា ការអនុវត្តច្បាប់នៅក្នុងប្រទេសកម្ពុជា បានធ្វើឲ្យលំហូរ នៃសិទ្ធិសេរីភាព ក្នុងការបញ្ចេញមតិរួមតូច។
តំណាងអចិន្ត្រៃយ៍កម្ពុជា បានលើកឡើងថា វាមិនមានអ្វីភ្ញាក់ផ្អើលឡើយ ដែលជាញឹកញាប់ ការអនុវត្តច្បាប់ នៅកម្ពុជា ត្រូវបានគេសន្មតថា ជាវិធានការខុសរួចជាស្រេច លើកលែងតែរាជរដ្ឋាភិបាល បង្ហាញថា វិធានការទាំងនោះ ត្រឹមត្រូវជាមុនសិន។
វាជារឿងវង្វេងវង្វាន់មួយ ដែលគណៈប្រតិភូទាំងនោះ ស្នើសុំឲ្យកម្ពុជា ពង្រឹងលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋ ប៉ុន្តែនៅពេលដែលអាជ្ញាធរ មានសមត្ថកិច្ច អនុវត្តច្បាប់ និងបទបញ្ជា ដើម្បីធ្វើតាមការស្នើសុំនោះ ពួកគេ បែរជាចោទកម្ពុជាថា រដ្ឋាភិបាល បានរឹតត្បិតសេរីភាព ក្នុងការបញ្ចេញមតិទៅវិញ។ ក្នុងន័យនេះ ជាទូទៅ គេសង្កេតឃើញថា គណៈប្រតិភូទាំងនោះ តែងតែមើលមកកែវទឹក សិទ្ធិសេរីភាព ក្នុងការបញ្ចេញមតិ នៅកម្ពុជា ថាខ្វះតែកន្លះទៀត នោះកែវទឹក នឹងទៅជាកែវទទេ។ ខណៈដែលសាធារណជនទូទៅ មើលឃើញថា ខ្វះតែកន្លះទៀតនោះ កែវនោះ នឹងមានទឹកពេញ។
ហើយអ្វីដែលកាន់តែជាភាពអកុសល ជាងនេះទៅទៀតនោះ ពួកគេ បានយកសិទ្ធិមនុស្ស ធ្វើជាចំណាប់ខ្មាំង នៅពេលនិយាយពីការផ្ដល់ប្រព័ន្ធអនុគ្រោះ ផ្នែកសេដ្ឋកិច្ច ដល់ប្រទេសកម្ពុជា។
ក្នុងនាមជាសមាជិក ដែលមានទទួលខុសត្រូវខ្ពស់ ចំពោះអង្គការសហប្រជាជាតិ ប្រទេសកម្ពុជា បានចូលរួមចំណែកយ៉ាងទៀងទាត់ និងសកម្ម ក្នុងសកម្មភាពជាច្រើន ពាក់ព័ន្ធនឹងកងកម្លាំងរក្សាសន្តិសុខ អង្គការសហប្រជាជាតិ និងសកម្មភាពមនុស្សធម៌ របស់អង្គការសហប្រជាជាតិ ជាច្រើនទៀត ដូចជា នៅក្នុងប្រទេសសាធារណរដ្ឋអាហ្វ្រិកកណ្ដាល ប្រទេសឆាត ម៉ាលី ស៊ូដង់ ស៊ូដង់ខាងត្បូង ស៊ីប និងលីបង់ ជាដើម។
ក៏ប៉ុន្តែក្នុងពេលជាមួយគ្នានេះ កម្ពុជាត្រូវការជំនួយ ដែលរួមមានទាំងគម្រោងអ្វីៗទាំងអស់ លើកលែងតែគ្រឿងសព្វាវុធ EBA របស់ EU។ ហើយលក្ខណៈអនុគ្រោះពន្ធទាំងនោះ កម្ពុជាពិតជាត្រូវការនិងឲ្យតម្លៃខ្ពស់។ ក៏ប៉ុន្តែដូចរដ្ឋដទៃផ្សេងទៀតផងដែរ អធិបតេយ្យភាព របស់ប្រទេសកម្ពុជា មិនអាចដោះដូរ ជាមួយជំនួយឡើយ។ ហើយជំនួយ ក៏មិនគួរត្រូវ បានគេយកមកធ្វើជាចំណាប់ខ្មាំង ដើម្បីជាថ្នូរជាមួយអធិបតេយ្យភាពទេ។ ចំពោះកម្ពុជា ប្រសិនបើកម្ដៅវាឡើងខ្លាំង រហូតមិនអាចទ្រាំបាន នោះយើងនឹងចាកចេញពីផ្ទះបាយនោះ ៕ដោយ៖កូឡាប
ខាងក្រោមនេះ ជាសេចក្តីឆ្លើយតបទាំងស្រុងរបស់ លោក ណី សំអុល តំណាងអចិន្រ្តៃយ៍កម្ពុជា ប្រចាំអង្គការសហប្រជាជាតិ និងអង្គការអន្តរជាតិនានា៖
