ខេត្តព្រះសីហនុ៖ កម្លាំងកងរាជអាវុធហត្ថ និងនគរបាលខេត្តព្រះសីហនុ បានឲ្យដឹងថា កាលពីម៉ោង ១១ និង៣០នាទី យប់ថ្ងែទី២៣ ខែកក្កដា ឆ្នាំ២០១៩ មានករណីឃាតកម្មមួយបានកើតឡើង នៅចំកណ្តាលក្រុងព្រះសីហនុ ហើយឃាតករបានគេចខ្លួនដោយសុវត្ថិភាព។
ឃាតកម្មនេះ ជនមិនស្គាល់អត្តសញ្ញាណ បានបាញ់សម្លាប់ ស្ត្រីរងគ្រោះ ស្លាប់នៅតាមផ្លូវសាធារណៈ ស្ថិតភូមិិ៣ សង្កាត់៣ ក្រុងព្រះសីហនុ(ម្តុំឧត្តនិយម)។
សេចក្តីរាយការណ៍ចុងក្រោយ បានឲ្យដឹងថា ស្ត្រីរងគ្រោះខាងលើជាជនជាតិចិន ធ្វើការជាបុគ្គលិកកាស៊ី ត្រូវបានឃាតករជនជាតិចិនដូចគ្នាបាញ់សម្លាប់ កាលពីវេលាម៉ោង១១ និង៣០នាទីយប់ថ្ងៃ២៣ ខែកក្កដា ឆ្នាំ២០១៩ នៅម្តុំឧតុនិយម ស្ថិតក្នុងសង្កាត់លេខ៣ ក្រុងព្រះសីហនុ ខេត្តព្រះសីហនុ។
មន្ត្រីនគរបាលខេត្តព្រះសីហនុ បានឲ្យដឹងទៀតថា ជនសង្ស័យទំនងជាអាចមានគ្នា៣នាក់ ហើយបានធ្វើសកម្មភាពបាញ់ស្ត្រីរងគ្រោះឈ្មោះ Zhang Dan ភេទស្រី អាយុ២៥ឆ្នាំ ជនជាតិចិន មុខរបរ បុគ្គលិកកាស៊ីណូអ៊េសវី ផ្នែកនាំភ្ញៀវ មានទីលំនៅភូមិ៣ សង្កាត់៣ ក្រុងព្រះសីហនុ។
តាមសមត្ថកិច្ចបញ្ជាក់ថា ឃាតកម្មនេះ បានកើតឡើងនៅពេលស្ត្រីរងគ្រោះ និងមិត្តភក្តិប្រុសឈ្មោះ Xiao LiZhi ជនជាតិចិនម្នាក់ទៀត កំពុងដើរចេញពីក្នុងកាស៊ីណូ អ៊េសវី ជាកន្លែងធ្វើការ របស់ស្ត្រីរងគ្រោះ ដើរសំដៅទៅកាមហាងលក់ទំនិញមួយកន្លែងឈ្មោះ គ័រជីអ៊ិហាវ។ ប៉ុន្តែពេលកំពុងដើរដល់ចំណុចផ្លូវបត់មួយកន្លែង គឺ ជិតដល់ហាងកាហ្វេឈ្មោះ ៨៨១១ ក៏ឃើញមានរថយន្ត១គ្រឿង បានចតនៅទីនោះ ។ បន្ទាប់មកស្រាប់តែមានជនជាតិ២នាក់ ភេទប្រុស បានចុះមកពីលើរថយន្ត ហើយបម្រុងចាប់អូសស្ត្រីរងគ្រោះ និងមិត្តប្រុសចូលក្នុងរថយន្ត ប៉ុន្តែពេលនោះត្រូវជនរងគ្រោះរើបម្រាស់ រួចក៏មានការផ្ទុះអាវុធ បណ្តាលឲ្យស្ត្រីរងគ្រោះ ត្រូវគ្រាប់កាំភ្លើងចំកញ្ចឹងកខាងឆ្វេង ធ្លាយមកគល់ដោះខាងស្តាំ បណ្តាលឲ្យស្លាប់ភ្លាមៗនៅកន្លែងកើតហេតុ។
សមត្ថកិច្ចបន្តទៀតថា ក្រោយមកក្រុមជនសង្ស័យ បានជិះរថយន្តរត់គេចខ្លួនបាត់ ដោយសុវត្ថិភាព។
បច្ចុប្បន្នកម្លាំងកងរាជអាវុធហត្ថ កំពុងសហការណ៍ជាមួយកម្លាំងស្នងការនគាបាលខេត្តព្រះសីហនុ ដើម្បីស្រាវជ្រាវវែករកមុខជនសង្ស័យ ឬឃាតករបាញ់សម្លាប់ស្ត្រីរងគ្រោះខាងលើ យកមកផ្តន្ទាទោសតាមច្បាប់៕ ដោយ៖ ដែន សីមា