ខេត្តកោះកុង៖ អភិបាលស្រុកមណ្ឌលសីមា លោក ហាក់ ឡេង មានជំនឿថា អាចចន្លោះពី ២ ទៅ ៣ឆ្នាំខាងមុខនេះ វត្តមានដ៏ស្រស់ស្អាត នៃផ្កាសាគូរ៉ា និងលេចនូវរូបរាងដ៏ស្រស់ស្អាត ហើយអាចទាក់ទាញកំណើនភ្ញៀវទេសចរជាតិ និងអន្តរជាតិ ឲ្យចូលមកទស្សនាកម្សាន្ត នាមូលដ្ឋានខេត្តកោះកុងបានច្រើនថែមទៀត។
លោកភុបាលឲ្យដឹងដូច្នេះ នៅក្នុងឱកាស ដឹកនាំមន្ត្រីចុះដាំផ្កាសាគូរ៉ា នៅតាមផ្លូវមួយកន្លែង កាលពីថ្ងៃទី២៣ ខែកក្កដា ឆ្នាំ២០១៩។
ឆ្លៀតឱកាសនោះ លោក ហាក់ ឡេង ក៏បានស្នើរដល់អាជ្ញាធរភូមិឃុំ ឲ្យជួយយកចិត្តទុកដាក់មើលថែរ និងស្រោចទឹកដើមផ្កា ដែលបានដាំរួចនៅអមសងខាងផ្លូវ។ ជាពិសេសជាងនេះ ត្រូវជួយណែនាំអប់រំដល់បងប្អូនប្រជាពលរដ្ឋក៏ដូចជាកម្មករកម្មការិនីរោងចក្រទាំងអស់ ឲ្យចូលរួមថែរក្សាអនាម័យបរិស្ថាន ឲ្យបានទាំងអស់គ្នា ចៀសវាងការបោះចោលសំរាម ក្នុងសួនច្បារជាពិសេសត្រូវថែរក្សាដើមផ្កាសាគូរ៉ា ដែលទើបដាំរួចថ្មីៗនេះ។
លោកអភិបាលអំពាវនាវថា យើងត្រូវរួមគ្នាមិនបោះសំរាមចោលផ្តេសផ្តាស មានន័យថា បងប្អូនពិតជាបានរួមចំណែកមួយយ៉ាងធំធេង ដែលមិនអាចខ្វះបាន នៅក្នុងមូលដ្ឋានរបស់ខ្លួន ដើម្បីជាការលើកកម្ពស់បរិស្ថាន និងសោភ័ណភាពតាមដងផ្លូវសាធារណៈ។
សូមបញ្ជាក់ថា ឆ្លៀតពេលដ៏មមាញឹកពីការងារ លោក ហាក់ ឡេង អភិបាលស្រុកមណ្ឌលសីមា កាលពីថ្ងៃទី២៣ ខែកក្កដា បានដឹកនាំមន្ត្រីក្រោមឱវាទ ចុះដាំដើមផ្កាសាគូរ៉ា លាតសន្ធឹងតាមបណ្តោយផ្លូវជាតិលេខ៤៨ ចាប់ពីចំណុចគល់ស្ពានកោះកុង ត្រើយខាងលិច រហូតដល់មុខសាលាស្រុកមណ្ឌលសីមា៕ ដោយ៖ ដែន សីមា
