ខេត្តព្រះសីហនុ៖ សមត្ថកិច្ចនគរបាលស្រុកព្រៃនប់ បានឲ្យដឹងថា គ្រោះថ្នាក់ចរាចរបានបណ្តាលឲ្យមានមនុស្សម្នាក់ទៀតស្លាប់ ដោយសាររថយន្ត បុជាមួយម៉ូតូ។
សមត្ថកិច្ចបញ្ជាក់ថា គ្រោះថ្នាក់នេះ កើតឡើងនៅព្រឹកថ្ងៃទី២៤ ខែកក្កដា ឆ្នាំ២០១៩ តាមផ្លូវបេតុង ក្នុងរោងចក្រតំបន់សេដ្ឋកិច្ចពិសេសឃុំបិតត្រាំង ស្ថិតក្នុងស្រុកព្រៃនប់។
មន្ត្រីនគរបាលឲ្យដឹងថា នៅមុនកើតហេតុគេឃើញមានម៉ូតូ ១គ្រឿង ម៉ាក HONDA-DREAM ពណ៌ខ្មៅ ពាក់ផ្លាកលេខភ្នំពេញ 1BS-3164 បើកបរដោយឈ្មោះ ជន សីហា ភេទប្រុស អាយុ ២៥ឆ្នាំ មានទីលំនៅភូមិអូរម្កាក់ ឃុំដំបូកខ្ពស់ ស្រុកអង្គជ័យ ខេត្តកំពត បានជិះបុកពីក្រោយរ៉ឺម៉កសណ្តោងរថយន្ត ១គ្រឿង (គ្មានក្បាលរថយន្ត) ដែលចតទុកនៅតាមចិញ្ចើមផ្លូវ បណ្តាលឲ្យឈ្មោះ ជន សីហា អ្នកបើកបរម៉ូតូ ស្លាប់នៅនឹងកន្លែងកើតហេតុ។
សមត្ថកិច្ចឲ្យដឹងបន្តថា បច្ចុប្បន្ន នេះ សាកសពជនរងគ្រោះ អាជ្ញាធរកំពុងស្រាវជ្រាវរកសាច់ញាតិ ដើម្បីនាំយកទៅធ្វើបុណ្យតាមប្រពៃណី។ ចំណែកវត្ថុតាងម៉ូតូ និងរ៉ឺម៉ក ត្រូវបានសមត្ថកិច្ចនាំយកមករក្សាទុកជាបណ្តោះអាសន្ន នៅអធិការដ្ឋាននគរបាលស្រុកព្រៃនប់៕ ដោយ៖ ដែន សីមា