បើតាមសេចក្តីថ្លែងការណ៍របស់អង្គការលីកាដូនៅថ្ងៃទី២៥កក្កដា បានឲ្យដឹងថា លោក គង់ រ៉ៃយ៉ា និង លោក សួង នាគព័ន្ធ ត្រូវបានសាលាដំបូងរាជធានីភ្នំពេញបដិសេធសំណើរសុំនៅក្រៅឃុំ នារសៀលថ្ងៃពុធថ្ងៃនេះ។ អ្នកទាំងពីរ គឺជាសកម្មជនពីររូបត្រូវបានឃាត់ និងឃុំខ្លួនកាលពីថ្ងៃទី៩ និង១០ ខែកក្កដាកន្លងទៅ ខណៈពេលដែលអ្នកទាំងពីរប្រារព្ធពិធីរំលឹកខួបនៃការបាញ់សម្លាប់លោកបណ្ឌិត កែម ឡី ។
អ្នកទាំងពីរ ត្រូវបានចាប់ខ្លួន បន្ទាប់ពីបានអនុវត្តសិទិ្ធសេរីភាពក្នុងការបញ្ចេញមតិរបស់ខ្លួន ហើយត្រូវបានតុលាការចោទប្រកាន់ពីបទល្មើសញុះញង់ឲ្យប្រព្រឹត្តបទឧក្រិដ្ឋជាអាទិ៍។ រ៉ៃយ៉ា ដែលមានអាយុ ២៨ ឆ្នាំ ត្រូវបានចាប់ខ្លួនកាលពីថ្ងៃទី៩ ខែកក្កដា ឆ្នាំ២០១៩ បន្ទាប់ពីលោក បានបង្ហោះសារនៅក្នុងគណនីហ្វេសប៊ុករបស់លោក លក់អាវយឺតដែលមានរូបលោកបណ្ឌិត កែម ឡី និងបង្ហោះលេខទូរស័ព្ទរបស់អ្នករត់ម៉ូតូឌុប ដែលនឹងដឹកជញ្ជូនពលរដ្ឋណាដែលមានបំណងទៅចូលរួមរំលឹកខួបនៃការបាញ់សម្លាប់លោកបណ្ឌិត។ នាគព័ន្ធ ដែលមានអាយុ ២៩ ឆ្នាំ ត្រូវបានចាប់ខ្លួននៅក្រៅស្ថានីយ៍ប្រេងឥន្ធនៈកាលតិចសាខាបូកគោ មួយថ្ងៃក្រោយ ការចាប់ខ្លួន រ៉ៃយ៉ា។ ស្ថានីយ៍ប្រេងឥន្ធនៈកាលតិចសាខាបូកគោ គឺជាកន្លែងដែលលោកបណ្ឌិត កែម ឡី ត្រូវបានគេបាញ់សម្លាប់ កាលពីបីឆ្នាំមុន។ នាគព័ន្ធ ដែលជាអតីតសមាជិកម្នាក់នៃក្រុមយុវជនបណ្ឌិតកែមឡី បានកាន់ក្រដាសមួយសន្លឹកដែលមានសរសេរថា “បញ្ឈប់ការសម្លាប់មនុស្សក្រៅប្រព័ន្ធតុលាការ” នៅមុនពេលមានការចាប់ខ្លួនរបស់លោក។
តាមមតិសាធារណជន និងសង្គមស៊ីវិល អ្នកទាំងពីររូប មិនគួរត្រូវបានចាប់ និងឃុំខ្លួនក្នុងពន្ធនាគារ ដោយគ្រាន់តែអនុវត្តន៍នូវសិទិ្ធសេរីភាពនៃការបញ្ចេញមតិរបស់ខ្លួនឡើយ ដែលសេរីភាពទាំងនេះ ត្រូវបានធានាដោយរដ្ឋធម្មនុញ្ញនៃព្រះរាជាណាចក្រកម្ពុជា និងអនុសញ្ញាអន្តរជាតិដែលកម្ពុជាបានផ្តល់សច្ចាប័ន។
ដូចទៅនឹងការអំពាវនាវរបស់ក្រុមសង្គមស៊ីវិលទាំង ៨៧ ស្ថាប័ន អង្គការ លីកាដូ សូមធ្វើការលើកឡើងជាថ្មីម្តងទៀត ដោយសំណូមពរយ៉ាងទទូចដល់អាជ្ញាធរកម្ពុជា សូមមេត្តាដោះលែងអ្នកទាំងពីរ និងលើកចោលការចោទប្រកាន់មកលើអ្នកទាំងពីរ៕ ដោយ ៖ បញ្ញាស័ក្តិ
