ខេត្តព្រះសីហនុ៖ ប្រជាពលរដ្ឋរស់នៅភូមិតានៃ ស្រុកព្រៃនប់ ខេត្តព្រះសីហនុ បង្ហាញអារម្មណ៍រីករាយ ចំពោះទឹកចិត្តសប្បុរសធម៌របស់ប្រជាពលរដ្ឋ ក៏ដូចជារដ្ឋាភិបាលប្រទេសកូរ៉េ ដែលបានជួយឧបត្ថម្ភ ថវិកា សម្រាប់សង់ស្ពានឆ្លងព្រែកទឹកសាបមួយកន្លែង ជូនប្រជាពលរដ្ឋពួកគាត់ប្រើប្រាស់ជាប្រចាំថ្ងៃមានភាពងាយស្រួល។
អ្នកភូមិអន្លង់ក្រពើ ឃុំតានៃ ថ្លែងថា ដើមឡើយរាល់ការធ្វើដំណើរឆ្លងកាត់ព្រែកទឹកសាបខាងលើ គឺមានផលវិបាកជាប្រចាំ ជាពិសេសកុមារតូចៗ ដែលត្រូវចេញចូលទៅសាលារៀន ប៉ុន្តែពេលនេះ ប្រជាពលរដ្ឋ ក៏ដូចជាសិស្សានុសិស្ស ឬកុមារតូច នឹងលែងមានផលវិបាក ក្នុងការឆ្លងកាត់ព្រែកទឹកសាបខាងលើនេះទៀតហើយ ដោយបានអ្នកសប្បុរសធម៌ជនជាតិកូរ៉េ បានផ្តល់ថវិកាសាងសង់ស្ពាន និងបានបើកសម្ភោធដាក់ឲ្យប្រជាពលរដ្ឋពួកគាត់ ប្រើប្រាស់នៅថ្ងៃទី២៩ ខែកក្កដា ឆ្នាំ២០១៩នេះ។
អាជ្ញាធរឃុំតានៃ ស្រុកព្រៃនប់ បានឲ្យដឹងថា ស្ពានថ្មីមួយកន្លែងសង់គ្រឹះពីបេតុង និងក្រាលឈើពីលើ ដែលទើបជួសជុលសាងសង់រួច និងដាក់ឲ្យប្រើប្រាស់នៅពេលនេះ គឺជាស្ពានសង់ថ្មី ជំនួសឲ្យស្ពានឈើចាស់ទ្រុឌទ្រោម។ ស្ពាននេះមានបណ្តោយ ២០ម៉ែត្រ និងទទឹង ៣,៥០ម៉ែត្រ ឆ្លងកាត់ព្រែកទឹកសាប និងជាតម្រូវការចាំបាច់ ក្នុងការធ្វើដំណើរឆ្លងកាត់ទៅមក ជាប្រចាំថ្ងៃ របស់ប្រជាពលរដ្ឋ និងសិក្សានុសិស្ស នៅតំបន់ដាច់ស្រយាលឆ្ងាយពីទីប្រជុំជន ស្ថិតក្នុងភូមិអន្លុងក្រពើ ឃុំតានៃ ស្រុកព្រៃនប់ ខេត្តព្រះសីហនុ។
សម្ពោធថ្មីនេះ បានធ្វើពិធីសម្ភោធដាក់ឲ្យអ្នកភូមិប្រើប្រាស់ កាលពីព្រឹកថ្ងៃទី២៩ ខែកក្កដា ឆ្នាំ២០១៩ នេះ ក្រោមជំនួយឧបត្ថម្ភពីសប្បុរសជនកូរ៉េរួមមាន៖
១) វិទ្យាស្ថានផលផ្លែ នៃសេចក្តីស្រឡាញ់
២) Samsung អេឡិចត្រូនិច
៣) វិទ្យាស្ថាន និងបច្ចេកទេសគ្មានព្រំដែន ដែលមានទីតាំងនៅក្នុងខេត្តព្រះសីហនុ
ស្ពានឆ្លងកាត់ព្កទឹកសាបខាងលើនេះ ចំណាយអស់ថវិកាសរុប ៣២.០០០ដុល្លារសហអាមេរិក។
នាឱកាសបើកសម្ភោធស្ពានថ្មីនេះ លោក អ៊ុក សាវឿន មេឃុំតានៃ បានដឹងថា ដើមឡើយស្ពានខាងលើនេះ ជាស្ពានឈើចាស់ទ្រុឌទ្រោម ពិបាកធ្វើដំណើរឆ្លងកាត់ ជាពិសេសបង្កផលវិបាកដល់សិស្សានុសិស្ស ឬកុមារតូចៗធ្វើដំណើរឆ្លងទៅសាលារៀនជាដើម។
ឆ្លៀតឱកាសនោះ លោកមេឃុំ តានៃ ជំនួសមុខឲ្យប្រជាពលរដ្ឋក្នុងមូលដ្ឋាននេះ ក៏ដូចជាប្រជាពលរដ្ឋខ្មែរគ្រប់រូប សូមថ្លែងអំណរគុណដល់សប្បុរសជនកូរ៉េ នុងអ្នកពាកព័ន្ធទាំងអស់ ដែលបានជួយឧបត្ថម្ភថវិកា សម្រាប់ការចំណាយទៅលើការជួសជុលសាងសង់ស្ពានឆ្លងកាត់ព្រែកទឹកសាប ប្រកបដោយគុណភាពជាថ្មី តាមរយៈអាជ្ញាធរមូលដ្ឋាន ឃុំតានៃ ដើម្បីបម្រើដល់ផលប្រយោជន៍ របស់ប្រជាពលរដ្ឋទូទៅបានប្រើប្រាស់មានភាពងាយស្រួល៕ ដោយ៖ ដែន សីមា
